Biblia Todo Logo
Bìoball air-loidhne

- Sanasan -

2 Samuele 22 - La Bible en Otetela (Bible K'Ekila) 1991


Usambu wʼEtshungwelu wa Davidi
( Esam. 18:1-50 )

1 Davidi akimbela Latuyalaka usambu la aui ane lamʼakutshungula Latuyalaka uma lʼanya wʼatunyi andi tshe ndu uma lu anya wa Saulu,

2 ati: Latuyalaki eli dive diami dia wuki, wumbe ami wa ta, la utshungudi ami.

3 Unyashungu eli Dive diami dia wuki, lene atumushamaka, Engawu kami, wulu wa panda kami, Lungeli lami la wuki, la eshamelu kami. We Ushimbedi ami, we katunshimbelaka uma lu akambu wa wulu.

4 Dimi layuhangohangoka nti: Latuyalaka atumbwami! Ku layushimbamela uma le atunyi ami.

5 Asukhu wa nyoi watonkomolaka, La dula diʼelanyelu diatumbutshaka woma.

6 Ekodi wa diumbu watunyingaka, Tulunga ta nyoi tatuntshimbaka.

7 Lamʼakimi la asui, laketi Latuyalaka, Ee, Lakalelela, Unyashungu ami. Uma lu luudu landi lʼekila, ndi akuki diui diami. Ndu delu diami diakukema lu atui andi.

8 Ku kete yakasukasuka, yakadidima. Atshina wʼulungu wakayekayeka, Wakasutshasutshama, ne dia ndi akumala.

9 Dinga diakatumbi uma lʼehembe andi, La lumbi la dja la dikita uma lʼunyo andi, Akalanga wakahete la lumu lako.

10 Ndi akahuluya ulungu, akakiti, Dingi dia tshududu diaki la tshina diʼakaka andi.

11 Ndi akahema ladiku dia okeruba, akafumbo, Ndi akenama, atafumbo lu lopepe.

12 Ndi akete udjima luudu la dipema lʼutshimba andi, Emotelo kʼashi la angi wʼedima wakudingi.

13 Uma lu ngaingai kakatetaka la ntundu kandi, Kakafukofukoka akalanga wa dja.

14 Latuyalaka akakhungula lʼulungu, Khumʼulungu akadikitsha diui diandi,

15 Ndi akuki atunyi ami pitu, akahandjula. Ndi akahenyahenya la ndjadi.

16 Kete ya la tshina diʼashi yakenama, Atshina wʼandja wakashwama Uma lu luhangu la Latuyalaka, Ndu uma lu lundju lʼefufelu kʼehembe andi.

17 Ndi akasimbula lunya landi uma lʼulungu, akankimela. Ndi akantundja uma lʼashi a waki.

18 Ndi akantshungula uma le utunyi ami a wulu, Uma le ampetshi ami wakandeki wulu.

19 Vo wakayi le mi lama akimi la pa, Keli Latuyalaka aki usuko ami.

20 Ndi akanombola uya lu dihuli dia hwe. Ndi akanshimbela, ne dia ndi ngenangenakami.

21 Latuyalaka akantshela uku ololo ami, Ndi akanfuti uku pudipudi kʼanya ami.

22 Dimi lakatakolamelaka lu mbuka ya Latuyalaka, Dimi kundjala la dikambu dia kolo dia minyami uma le Unyashungu ami.

23 Adjangu andi tshe waki la ntundu kami, Dimi kombetola uma lʼelembe andi.

24 Ndu dimi laki ololo uma lʼelembe andi, Dimi lakayalamt uma lu kolo.

25 Okone Latuyalaka akanfuti uku ololo ami, Ndu uku pudipudi kami lu ashu andi.

26 Le kanga kolamelu, we ndjaenyaka kanga kolamelu; Le one laha la unungu, we ndjaenyaka aha la unungu.

27 Le kanga pudipudi, we ndjaenyaka kanga pudipudi; Le one lahasimbwi, we atuyaenyaka kanga ngala.

28 We atushimbelaka akanga a ndjakitshakitsha, Keli ashu ave watendaka akanga wʼutaku dia mbakitshakitsha.

29 Ee, We Latuyalaka keli usasi ami, Latuyalaka atuminyiyaka udjima.

30 Uma lu wulu aye mbatumolembiaka alimbi, Uma lu wulu wa Unyashungu mbatumulimboka eheli ka lukumbu.

31 Mbuka ka Unyashungu katuyalaka ololo tshe, Alaka wa Latuyalaka weli mete. Ndi eli engawu ka wane tshe watuwekamaka.

32 Akona eli Unyashungu, naka aha Latuyalaka? Ndu akona eli Dive dia Wuki, naka aha Unyashungu asu?

33 Unyashungu eli lungeli lami la wulu, Ndi atonombolaka lu mbuka kʼusimbwi.

34 Ndi ateteka ekulu ami usadi uku lufumbo. Ndi atunkitshaka lu ahuli wa ladiku.

35 Ndi atukalanganyaka anya ami dia ndo ta, Ku anya ami wateyaka nema uta wʼohotela.

36 We ambumbisha engawu ka panda kaye, Memakana kaye kambumbete wuki.

37 We atokokwelaka ekulu ami mbuka, Ku akaka ami hawutoseloka.

38 Dimi lakayelaka atunyi ami, lakalanyaka. Dimi kunkalulaka ntundu vo watalanyema.

39 Dimi lakawediawedia edja ndu hawuyeya munela, lakatshumbi. Vo wakako la tshina diʼakaka ami.

40 We atunkikitshaka lu ta, We atonembiyaka wane watondoshaka.

41 We atukadimulaka ekongo wʼatunyi ami uya le mi, Ku dimi latushilaka wane watumpetshaka ushiki.

42 Vo watendaka, ku nduku untu lâshimbela! Watulelaka le Latuyalaka, ku ndi hatakaluyaka nduku diui.

43 Dimi latatshutshunaka uku ditshu dia Kete, Lâtadianganyaka, latahotshahotshaka uku loteke la lu esese.

44 We atuntshungulaka uma lu tamu ta wudja ami. We atunkitshaka ladiku dia wudja tshe, Ku wudja wakimi kumbeya watunkambelaka ulimu.

45 Asi wedja watuyakitshakitshaka la ntundu kami, Vo watukitanyiaka aui ami kamʼateketami.

46 Asi wedja watuyalaka etema ashi atu, Watutumbaka uma lu ahuli awo wʼeshamelu wayadidima.

47 Latuyalaka eko la lumu; Dive dia Wuki atumbwami! Unyashungu, Dive dia Wuki dia panda kami ediami.

48 We Unyashungu katosomboyaka lu dikambu diami, Katunkitshikitshiyaka wedja.

49 We keli one latuntshungulaka uma le atunyi ami, We atumbediaka ladiku dia waku watondoshaka. We atunshimbelaka uma le akanga a ngala.

50 Okone mbayumukukaka lusaka lʼatei a wedja tshe, we Latuyalaka! Dimi layimbaka esambu wa diandu lu lukumbu laye.

51 Ndi atushaka khumʼekanga kandi atshungwelu wa mamba. Ndi atukaka one lakandakiti iso ketshi, Ee, Davidi, la tukanuia tandi pundju.

La Bible en Otetela © Allianee Biblique de la Republique Democratique du Congo, 1991 

Bible Society of the Democratic Republic of Congo
Lean sinn:



Sanasan