2 Samuele 21 - La Bible en Otetela (Bible K'Ekila) 1991

Esombweyo kʼAsi Ngibiyona

¹ Ndjala ka kasha kakayala lu nshi ya Davidi deku satu etundu. Ku Davidi akatumbula Latuyalaka. Latuyalaka akûkaluya diui ati: Lu dikambu dia Saulu la wa lu luudu landi, atundjishi wa dikila, mbambuyala dikambu ne, ne dia ndi akadiaki asi Ngibiyona.

² Khumʼekanga aketi asi Ngibiyona dia nsawula la wo. (Asi Ngibiyona tawaki asi Isariyele, keli vo waki atshikadi wʼasi Amora. Asi Isariyele wakakote la wo lusalu diaha mbadiaka. Keli Saulu akayangi mbadiaka lu saki kandi le Isariyele la le Juda.)

³ Davidi akambula asi Ngibiyona ati: Alanganyu dimi nyutshela na? Ukundi ayumutunga ekesanelu dia nyu ntshokola ukito wa Latuyalaka?

⁴ Asi Ngibiyona wakûkaluya diui vati: Dikambu ne dieko lʼasasu la Saulu, ndu lʼasasu la wa lu luudu landi, diaha dia fesa la paunyi, ndu dio kema dikambu dia untu omotshi mvo lu Isariyele. Ku ndi akawambula ati: Ku kakona kalanganyu dimi nyutshela?

⁵ Vo wakakaluya khumʼekanga diui vati: Untu one akalangi ntushika lushika ndu akasanguya dia ntushila ushiki, dia ntushisha uma lu kete tshe ya Isariyele.

⁶ Okone utusha anʼandi wʼapami esambeli keli ntu hane la ntundu ka Latuyalaka la Ngiba ka Saulu, osonami wa Latuyalaka. Ku Khumʼekanga aketawo ati: Layunyushawo.

⁷ Keli khumʼekanga akahandja Mefiboshete, onʼa Jonatana, onʼa Saulu, nedia daka diakawatalakanyi la ntundu ka Latuyalaka, ndi la Jonatana, onʼa Saulu.

⁸ Khumʼekanga akandi Aramoni la Mefiboshete, ana apami ahendi wakuti Rizipa, onʼa Aya, la Saulu, la ana apami atanu wakuti Merabe, onʼa Saulu la umuntu ndi la Aderiyele, onʼa Barazilai, usi Mehola.

⁹ Ndi akakimo lʼanya wʼasi Ngibiyona, ku vo wakatahane lʼukungu la ntundu ka Latuyalaka. Vo tshe esambeli wakavu kame, wakadiakema lu nshi yʼetatelu ka dinela diʼepunga.

¹⁰ Rizipa, onʼa Aya la umuntu, akose dikutu, ukadiali ladiku dia dive, aketamaka loko uma lʼetatelu ka dinela edja ndu lamʼakalo mvula. Ndi akatshanyaka fudu yakayakaka uya le wo la yanyi ndu nyama yakayakaka lʼutshu.

¹¹ Wakatutela Davidi dikambu diakatshaka Rizipa, onʼa Aya, usika waki Saulu.

¹² Davidi akatshu, akatosa weka wa Saulu la wʼonʼandi Jonatana uma la le asi Jabeshe-Ngiliyade, wakawatosa lu usheshe uma lʼosese wa Bete-Shana, lene akahane asi Filistiya lu lushi lakawadiaki Saulu la Ngiliboa.

¹³ Wakela weka wa Saulu la wa onʼandi Jonatana, wakatosa ndu weka wa waku wakahane asi Ngibiyona.

¹⁴ Vo wakatukhunde weka wa Saulu, la wa onʼandi Jonatana la Zela lu diumbu diaki Kisha, shi, lu kete ya Bendjamina. Vo wakatshi akambu tshe wakawatela khu mʼekanga. Lʼokongo diku Unyashungu akawaukela lu dikambu dia kete.

Abishai Ambushimbela Davidi Uma le Dikunguti

¹⁵ Asi Filistiya wakalo lʼasi Isariyele ntu. Okone Davidi akatshu ndi la ekambi andi, akatolo lʼasi Filistiya. Ku Davidi akatokomo dimba.

¹⁶ Ishibi-Benobe, onʼa omotshi a lʼatei wʼakunguti, laki la dikonga dia wutshu wa toshekele kama shatu, lakasome yombo yʼuyuyu, aki la kanyi ya ndjaka Davidi.

¹⁷ Keli Abishai, onʼa Zeruya, akashimbela Davidi, akakomola usi Filistiya, akûdiaki. Ku alimbi wa Davidi wakatshibi, wawutela vati: Tutshoki la su lu ta ntu, utukutudima tala dia Isariyele.

Asika Davidi Wambudiaka Akunguti

¹⁸ Lʼokongo wʼakambu aso, vo wakalo lʼasi Filistiya ntu la Ngobo. Sibekai, usi Husha, akadiaki Safu, otoi omotshiuma lʼatei wʼakunguti.

¹⁹ Wakalo lʼasi Filistiya ntu la Ngobo. Ku Elehanana, onʼa Jare-Orengime, usi Betelehema, akadiaki Ngoliyate, usi Ngata, lakakimelaka dikonga diaki la ulanga uku ukanda watuwotokaka asami.

²⁰ Wakalo ta ntu la Ngata, lene aki pami kemotshi ka dihanoki kaki la pita shamalu shamalu lu anya ndu lʼekulu, tshe kame akumi ahendi la nyei. Ndi aki otoi omotshi lʼatei wʼakunguti.

²¹ Ndi akadji Isariyele tofwefwe, ku Jonatana, onʼa Shimei, onangu Davidi, akudiaki.

²² Antu anei aso waki ana wʼakunguti wa la Ngata. Vo wakadiakema le Davidi la ekatnbi andi.