2 Samuele 20 - La Bible en Otetela (Bible K'Ekila) 1991

Etombokwelo ka Sheba

¹ Untu a kolo omotshi akiko, lukumbu landi Sheba, onʼa Bikiri, usi Bendjamina. Ndi akadi dimama ati: Shu kema la etenyi kame la Davidi, kuyanga etenyi kʼukito kame la onʼa Jese. Isariyele li! nyutshu, nyu tshe untu lʼuntu utsha lakandi.

² Ku asi Isariyele tshe wakamo uma le Davidi, wakayeli Sheba, onʼa Bikiri. Keli asi Juda wakatshu la ndi uma la Jorodana pulu ndu la Jerusalema.

³ Davidi akakumi lakandi la Jerusalema. Ndi akose esika andi dikumi wakandatshiki dia nama luudu, akadihi lu luudu. Ndi akawashaka mbu ya nde, keli kumbeyana la wo. Okone vo wakayala uku wadi waki edu, wakadihama edja ndu lushi lawo la nyoi.

⁴ Khumʼekanga akatela Amasa ati: Umbeteli apami wa Juda, kawusangani kame lʼokongo wa nshi shatu. Ndu we kuyali laawo.

⁵ Amasa akatshu dia nteta asi Juda dia vo nsangana. Ndi akatu-tshimbatshimba, akalekanya nshi yakawawutela.

⁶ Davidi akatela Abishai ati: Kakiane Sheba, onʼa Bikiri, uyanga ntutshela kolo kuleki ka Abisaloma. Ose ekambi wa khumeye, uyelani la ndi, ndi atukutukuma lʼesumba a wulu, ku ndi ntushisho.

⁷ Abishai akatumbi uma la Jerusalema, ndi lʼalimbi wa Joaba, asi Kerete, asi Pelete, la ahuka a wulu tshe, dia ndjelana la Sheba, onʼa Bikiri.

⁸ Lamʼakawakumi la dive dia wuki dia Ngibeyona, Amasa akayi dia ndjuhumana la wo. Joaba akalote eloto wa ta. Yombo yaki lu dihusu diakakelekami lʼuya wakandayahe ladiku diʼeloto. Lamʼakandatatshokaka, yombo yako yakasomo uma lu dihusu.

⁹ Joaba akambula Amasa ati: Onalingu, we la wulu? Ku Joaba akiikimela lu loledu la lunya la pami dia nonana la ndi.

¹⁰ Keli Amasa kumambala yombo yaki lu lunya la Joaba. Ku ndi akuhikeyo lu dikundju, akatundja esohi lʼandja, aha mbusihuya ntu. Ku ndi akavu. Ku Joaba la Abishai, onangu, wakayelana la Sheba, onʼa Bikiri.

¹¹ Dimbi dimotshi dia Joaba, akemala lasuki la Amasa, akati ati: Untu tshe lalanga Joaba la untu tshe lalanga Davidi ayeli Joaba.

¹² Amasa aki lu mingito lu dikila diandi lʼatei a osese. Untu tshe lakawenyi, akemala. Lamʼakenyi pami kako ati: Antu tshe wawena, ndjemalaka la le ndi, ndi akanya Amasa uma lʼosese, akotole utsha lʼekambo kemotshi, akukumbi dihondo.

¹³ Lamʼakandawunya uma lʼosese, antu wakatshu lʼokongo a Joaba dia ndjelana la Sheba, onʼa Bikiri.

¹⁴ Sheba akatenanya wedja tshe wa Isariyele pulu ndu la Abele ka la Bete-Maka. Asi Beri tshe wakasangana, wakuyeli lʼusumba.

¹⁵ Apami tshe waki kame la Joaba wakakumi la Abele ka la Bete-Maka, wakudingi loko. Vo wakatshela usumba difuku lʼutshimba wa lukumbu. Alimbi wa Joaba tshe wakatshimi lukumbu dia lunyukula.

¹⁶ Ku umuntu omotshi kanga yimba akahangohango uma lʼusumba ati: Nyulungi, nyulungi! lambunyosengasenga nti: Nyuteli Joaba asukani lane keli ntekete la ndi.

¹⁷ Joaba akasukana la le ndi, ku umuntu akawumbula ati: We keli Joaba? Ndi akûkaluya diui ati: Elu, dimi. Ku ndi akawutela ati: Ulungi aui ami, dimi ukambi aye a umuntu. Joaba akûkaluya diui ati: Dimi oso alunga.

¹⁸ Umuntu akawutela ati: Wakataka nshi kina vati: Wambuli dikambu lu Abele, ku dikambu diako nshila.

¹⁹ Usumba asu weli usumba waki la kolamelu lu Isariyele. Keli we nangaka nanya usumba weli umbutshi lu Isariyele! Ukundi alangaye nanya ukito wa Latuyalaka?

²⁰ Joaba akûkaluya diui ati: Kema, kanyi sho ya mpandjula kana nanya yeko etali uma le mi.

²¹ Dikambu so kema osoku. Keli Sheba, onʼa Bikiri, uma lʼukungu wa Efarayima, akedia lunya landi dia ntombokwela khumʼekanga Davidi. Nyumbishandi ndame, ku dimi layumo uma lʼusumba. Ku umuntu akûkaluya diui ati: Kawo, wayukadja ote andi uma ladiku diʼeheli.

²² Ku umuntu ako akatshu le antu tshe lʼaui andi wa yimba. Vo wakahimbula Sheba, onʼa Bikiri, ote, wakawuki Joaba lʼandja. Joaba akadi dimama, ku antu tshe wakadiangana uma lʼusumba. Untu lʼuntu akatshu utsha lakandi. Joaba akakalula le khumʼekanga la Jerusalema.

Elombodi wa lʼOkongo wa Davidi

²³ Joaba aki olombodi wʼalimbi tshe wa Isariyele; Benaya, onʼa Jehoyada, aki olombodi wʼasi Kerete, la wʼasi Pelete.

²⁴ Adorama aki kapita kʼantu wakawakambiaka ulimu la wulu; Jehoshafata, onʼa Ahilude, aki okondodi wʼekondo.

²⁵ Sheva aki ufundji; Zadoka la Abiyatara waki elombedi,

²⁶ la Ira, usi Jaira, aki olombedi wa Davidi.