2 Samuele 19 - La Bible en Otetela (Bible K'Ekila) 1991

Davidi Ambukalula la Jerusalema

¹ Wakatutela Joaba vati: Henyi, khumʼekanga ulela, ukiyana lu dikambu dia Abisaloma.

² Lushi lako elembielo kakakadimo delu le wudja tshe, ne dia antu wakuki lukumu vati:

³ Khumʼekanga eko la lunyangu lu dikambu dia onʼandi.

⁴ Antu wakomomo lushi lako uku atomomoka andawi uma lu ta, wakakalula utsha lʼusumba. Khumʼekanga akakumbi elundji, akaleli wulu ati: Yee, onʼami Abisaloma li! Yee, Abisaloma, onʼami li! onʼami li!

⁵ Joaba akoto lu luudu, lene aki khumʼekanga; akatuwutela ati: We ambukia ekambi aye tshe wakashimbedi lumu laye, nyumu yʼana aye wʼapami la ya ana aye wʼamantu, ndu ya wadieye la esika aye, sonyi elo.

⁶ Mete, we atulangaka waku watukuhetshaka, la atuhetshaka waku watukulangaka. We ambutenya elo wati: Ewandji la ekambi weli anyanya lu ashu aye, ne dia lambulimbitela elo nti: Utunduyala Abisaloma akatshikadi la lumu la shu tshe takavwi, tshiki we utongenangena.

⁷ Okone uneli kakiane, utumbi, utusambi ekambi aye. Keli naka we hatumbi, lambutshiba le Latuyalaka nti: Nduku pami kayutshikala la ye uishu one Ku sui so diayuleka asui tshe wakayakaka le ye umaka nshi yakiye olongo a pami edja ndu kakiane wulu.

⁸ Ku khumʼekanga akunela, akatudjase lʼeotwelo kʼusumba. Wakatutela antu tshe vati: Khumʼekanga ambudjase lʼeotwelo kʼusumba, ku antu ishe wakayi la ntundu kandi. Laso ku asi Isariyele tshe wakashili ndawo utsha la wakawo.

⁹ Antu tshe wakadjana tamu lu wedja tshe wa Isariyele, watanela vati: Khumʼekanga akatutshungula uma lu anya wʼatunyi asu, ndi akatushimbela uma lʼanya wʼasi Filistiya. Keli ndi akahumbi ndawo Abisaloma utsha lu kete kina.

¹⁰ Abisaloma one lakatakiti iso dia ntulela ambutuvo lu ta. Dikambu kuna diahatati diui, dia nkaluya khumʼekanga kasu?

¹¹ Khumʼekanga Davidi akatumela Zadoka la Abiyatara diui ati: Nyutumbuli dihangamendi dia Juda nyati. Dikambu kʼina diambunyuyala lʼokongo dia nkaluya khumʼekanga lu luudu landi? Nyu hanyuki lukumu nyati: Asi Isariyele tshe wambutumela khumʼekanga diui dia mbukaluya lu luudu landi?

¹² Nyu mbeli analingu, ee, weka ami la umunyi ami mbenyu. Dikambu kuna diambunyuyala lʼokongo dia nkaluya khumʼekanga?

¹³ Nyutumumbweli ndu Amasa nyati: Aha weka ami la umunyi ami mbeye? Unyashungu antsheli dikambu diuleki wulu, naka we hayadi olombodi w alimbi ami pundju lu dihuli dia Joaba.

¹⁴ Davidi akalembia etema wʼasi Juda tshe uku utema wʼuntu otoi. Okone vo wakatumela khumʼekanga diui vati: Ukaluli, we la ekambi aye tshe.

¹⁵ Okone khumʼekanga akakalula, akatukuma pulu ndu la Jorodana. Asi Juda wakayi la Ngilingala dia ndjulungula khumʼekanga la dia mbutehuya Jorodana.

¹⁶ Shimei, onʼa Ngera, usi Bendjamina, uma la Bakurima, akasamanya dia mpulo kame la asi Juda, dia ndjuhumana la khumʼekanga Davidi.

¹⁷ Asi Bendjamina kinunu waki kame la ndi. Ndu Ziba, ukambi wa luudu la Saulu, akakhunguso utsha la Jorodana lu ashu wa khumʼekanga, ndi la anʼandi wʼapami dikumi la atanu ndu la ekambi andi akumi ahendi kame la ndi.

¹⁸ Vo wakateho Jorodana dia ntutehuya wa lu luudu la khumʼekanga, la dia ntsha kene tshe kakandalangi. Lamʼakateho khumʼekanga Jorodana, Shimei, onʼa Ngera, akakhusama la ntundu kandi.

¹⁹ Ndi akasengasenga khumʼekanga ati: We khumemi, tumendaki uku kanga unungu, tuhoki kolo kakamakutshela utshelatshela lushi lakayatumbi uma la Jerusalema. We khumemi, khumʼekanga, tumbidjelaki ukhumba wa dikambu ne lʼutema.

²⁰ Mete, dimi uki mbi aye mbeyaka nti: Lakatshi kolo. Diako mbamuuiuya elo untu la ntundu uma lu luudu la Josefu dia ndjuhumana la ye, we khumemi, khumʼekanga.

²¹ Ku Abishai, onʼa Zeruya, akahula diui ati: Undi, Shimei hadiakema lu dikambu diakandakanula ukitami wʼiso wa Latuyalaka?

²² Davidi akûkaluya diui ati: Na dikambu diasami la nyu, nyu ana wa Zeruya dia nyu ndjala atunyi ami elo? Ololo untu ndjakema elo lu Isariyele uka? Dimi kaheyi nti: Dimi lambuyala khumʼekanga ka Isariyele elo?

²³ Khumʼekanga akatela Shimei ati: We havu! Ku khumʼekanga akutshmela.

²⁴ Ndu Mefiboshete, ukana a Saulu, akayi dia ndjuhumana la khumʼekanga. Umaka lushi lakunela khumʼekanga edja ndu lushi lakandakalula lakandi la ki, Mefiboshete konongosola ekulu, kuyanga nkolonga loledu kana nsula ahondo.

²⁵ Lamʼakandatshu la Jerusaiema dia ntenana la khumʼekanga, khumʼekanga akawumbula ati: Mefiboshete li, ukundi akiye kuntsho le mi?

²⁶ Ndi akûkaluya diui ati: We khumemi khumʼekanga, ukambi ami akankese. Dimi, ukambi aye, leko ekusi mbakamati nti: Dimi layahe edie lu punda, layahema ladiku diato, layutsho la khumʼekanga.

²⁷ Ndi akansonganya la ye. Keli we khumemi, khumʼekanga, eli uku ondjelo wa Unyashungu. Okone utshi uku alangaye.

²⁸ Mete, wa lu luudu la papa tshe wakakuki ndjakema la ntundu kaye we khumemi khumʼekanga, keli we akambidjasha lʼului wa waku wakalekaka ma lu mesa aye. Keki la mi ntu, dia dimi nkolomba ntu we khumʼekanga?

²⁹ Knumʼekanga akûkaluya diui ntu ati: Akayatadienyi la mvuta akambu a so tshe na? Dimi lambetawo nti: We la Ziba, nyayukahana kete.

³⁰ Mefiboshete akûkaluya diui ati: Ziba ose kuyanga yo tshe, ne dia khumemi khumʼekanga ambukalula la ki lakandi.

³¹ Barazilai usi Ngiliyade, akayi uma la Rongelime. Ndi akateho Jorodana kame la khumʼekanga, ayûtshindela pulu ndu la wedi wa Jorodana.

³² Barazilai aki usumbi a lukusumbi, wa deku akumi enanei. Ndi kakashaka khumʼeicanga mbu ya nde lamʼakandatusl ama la Mahanayima, ne dia ndi aki kanga ongonyi a wulu.

³³ Khumʼekanga akalombe Barazilai ati: Yeti, tutshu lakami ku layutukukimanyia la ehumba aye tshe la Jerusalema.

³⁴ Barazilai akakaluya khumʼekanga diui ati: Nshi ngana yeki la mi ntu, dia dimi ntsho la khumʼekanga utsha la Jerusalema?

³⁵ Dimi laya deku akumi enanei elo. Laso dimi leki la wulu wa ntshikitanya ololo la kolo? Dimi, ukambi aye, lakeyi munganela kene kalemi la kene kanomi? Undi, dimi lakuki esambu wimba apami la amantu Ya ukundi ukukimi nkukitshiya wutshu ntu, we khumemi khumʼekanga?

³⁶ Dimi ukambi aye layutukutshindela yema edja ndu la wedi wa Jorodana, we khumʼekanga. Ukundi, alangaye ntshelami ololo wuhu one?

³⁷ Dimi lambukosengasenga nti: Etawo dia dimi nkalula lʼusumba ami, lasuki la diumbu dia papa la dia nyomi. Keli enda, ukambi aye Kimihame one. Ndi ateho la ye we khumemi, khumʼekanga. Kututshelaki kene tshe keli ololo lu ashu aye.

³⁸ Khumʼekanga akûkaluya diui ati: Kimihame ayuteho la mi, Dimi layututshela wuhu wayukongenyangenya. La wuhu tshe wayuyulanga, mbayumutsheia.

³⁹ Ku antu tshe wakateho Jorodana ndu khumʼekanga pupu. Khumʼekanga akalakana la Barazilai, akotshokola. Ku Barazilai akakalula utsha lakandi.

⁴⁰ Khumʼekanga akelela utsha la Ngilingala, ndu Kimihame akatshu kame la ndi. Asi Juda tshe la etenyi ka hendi kʼasi Isariyele wakatshu kame la khumʼekanga.

⁴¹ Enda, asi Isariyele tshe wakayi le khumʼekanga wakayuwumbula vati: Okoko wana wakayukuva anengesu, asi Juda, wakawakutehuya Jorodana vame we khumʼekanga, la wa lu luudu laye, ndu alimbi aye tshe?

⁴² Asi Juda tshe wakakaluya asi Isariyele diui vati: Khumʼekanga mbutoka la su, okoko wana watukanyu kele lu dikambu ne? Undi, diango diandi mbakatale? Eshasha mbakandatusha uka?

⁴³ Asi Isariyele wakakaluya diui vati: Shu nyuleka tena dikumi le khumʼekanga. Okoko wana wakanyatonyola? Aha shu mbakasanguya ntundu dia nkaluya khumʼekanga kasu? Aui wʼasi Juda wakaleki aui wʼasi Isariyele ngala.