2 Samuele 18 - La Bible en Otetela (Bible K'Ekila) 1991

Nyoi ka Abisaloma

¹ Davidi akali antu waki kame la ndi, akadji elombodi wa antu kinunu kinunu, wa antu lukama lukama ladiku diawo.

² Ndi akatumi antu etenyi ka satu lʼokongo a Joaba, etenyi ka satu lʼokongo a Abishai, onʼa Zeruya, onangu Joaba, la etenyi ka satu lʼokongo a Itai, usi Ngata. Khumʼekanga akatela antu ati: Ndu dimi layutsho kame la nyu.

³ Keli antu wakûkaluya diui vati: We hutsho la su. Naka shu tayulawo, vo hawukani dikambu diasu. Tshikima etenyi ka hendi kasu kambuvo, ku vo kana dikambu diasu. Keli we eko uku nunu dikuni diasu. Uleki dimena dia we ntutumela ekimanyela uma lʼusumba.

⁴ Khuumʼekanga akakaluya diui ati: Uku alanganyu mbayumutsha. Khumʼekanga akemala lʼeotwelo, ku antu tshe wakatumbi lu elui wa lukama lukama la wa kinunu kinunu.

⁵ Khumʼekanga akadjangela Joaba, Abishai la Itai ati: Kanyutsheli Abisaloma, olongo a pami uku, la ketshi lu dikambu diami. Antu tshe wakuki lamʼakadjangela khumʼekanga elombodi didjangu lu dikambu dia Abisaloma.

⁶ Okone antu wakatumbi lʼusui dia ntolo la Isariyele. Wakatolo la wo lʼukunda wa Efarayima.

⁷ Ekambi wa Davidi wakalembia asi Isariyeie lushi lako. Vo wakadiaki antu efula, uku antu nunu akumi ahendi.

⁸ Ta diakadiangana lu leke lako tshe. Ku ukunda akateki yombo nshila antu efula.

⁹ Abisaloma akatuhumana la ekambi wa Davidi shashimuya. Abisaloma akatatshokaka atahemi lu punda kandi Punda aketi la tshina dia uwamba, ku kingu ka Abisaloma kakatuhakema lʼasa tahi ya uwamba. Punda akanmo uma lʼesi andi, ku ndi akalendalenda lʼasa tahi la kete.

¹⁰ Untu omotshi akenyi dikambu diako, akatutela Joaba, ati: Ulungi, lakenyi Abisaloma alendalenda lʼuwamba.

¹¹ Joaba akakaluya pami kakawela lukumu diui ati: Naka we akenyi dikambu diako, okoko wana wakiye kumbudiaka kaku? Tshiki dimi lutukusha enyi dia fesa dikumi la uya.

¹² Pami kako akakaluya Joaba diui ati: Kuyanga mbutumulungula tenyi dia fesa kinunu lu lunya lami, dimi tutumahe onʼa khumʼekanga lunya. Ne dia khumʼekanga akanyudjangela, we, Abishai la Itai, la ntundu kasu ati: Nyewo, untu taheki olongo a pami Abisaloma lunya.

¹³ Utunduyala dimi lakutshedi osoku (ne dia nduku dikambu dieya mbishama khumʼekanga), tshiki ndu we utuyala utunyi ami.

¹⁴ Ku Joaba akûkaluya diui ati: Halangi ntshimbatshimba dia nsawula la ye lu dikambu ne! Ndi akose akhuwa asatu lu lunya, akawuwatsheta Abisaloma ka lu diui iamʼakandalendalendaka lʼuwamba.

¹⁵ Elongo wʼapami dikumi wakatembaka diango dia ta dia Joaba, wakadingi Abisaloma, wakokomola, wakudiaki.

¹⁶ Joaba akadi dimama, ku antu tshe wakakalula uma lene akawatayelanaka la Isariyele, ne dia Joaba akâshimbi.

¹⁷ Vo wakose udu wʼAbisaloma, wakatuwukadja lu difuku dia wuki lʼukunda wakaki-tsha ului a wuki wʼave ladiku diandi. Asi Isariyele tshe wakalawo utsha la wakawo.

¹⁸ Lamʼaki Abisaloma la lumu, ndi akatayaemedi ekoho kʼeuhwelu ka lukumbu landi lʼukidi wa khumʼekanga, ne dia ndi akati ati: Dimi kema la ona a pami, lukuki antu mbuhoka lukumbu lami. Ndi akole ekono kako lukumbu landi. Watukietaka edja ndu elo vati: Euhwelu ka Abisaloma.

¹⁹ Ahimaze, onʼa Zadoka, akati ati: Unkimo ndawo, tuteli knumʼekanga lukumu uku okone ambosomboya Latuyalaka atunyi andi.

²⁰ Joaba akûkaluya diui ati: Totolaki lukumu elo, keli kulotole lushi lukina. Keli tulotolaki elo, ne dia onʼa khumʼekanga ambuvo.

²¹ Ku Joaba akatela usi Kushi ati: Tshoka, ututeli khumʼekanga kene kakayenyi. Usi Kushi akakhusama la ntundu ka Joaba, akunela, akakhuso la luwangu.

²² Ahimaze, onʼa Zadoka, akayosengasenga Joaba ntu ati: Kuyanga dikambu ne dieko wulu, unkimo ndjelani la usi Kushi one. Joaba akawumbula ati: Onʼami, ukundi alangaye ntsho lamʼahayukundja difutu uma lʼetolelo ka lukumu?

²³ Keli ndi akûkaluya diui ati: Ne dia ntumba kadiutumbi, ntshu. Joaba akûkaluya diui ati: Kawo, ulawo! Ahimaze akalawo lu mbuka lʼusui, akatulekana usi Kushi.

²⁴ Lʼetena kaku Davidi akadjashi lʼasa kuki hyendi yʼusumba. Ku ulami wʼusumba akambela lu lukuki utsha ladiku diʼeheli ka lukumbu. Ndi akedia ashu, enyi ku pami kemotshi kene, kayalawo ndame.

²⁵ Ulami akahangohango, akatela khumʼekanga. Ku khumʼekanga akawutela ati: Naka ndame kayayi, keti lukumu mbayandela. Pami kako akakolamela ndjayi, akasukana.

²⁶ Ulami akenyi pami kekina ayalawo. Ndi aketi ulami wa suku ati: Enda, pami kekina yalawo ndame utu. Khumʼekanga akati ati: Ndu ndi kayela lukumu.

²⁷ Ku ulami akati ati: Lambukana nti: Lokendo la one layalawo la ntundu, nfanaka la lokendo la Ahimaze, onʼa Zadoka. Khumʼekanga akati ati: Untu ololo kendi, ndi lu ndjayi la lukumu lʼololo.

²⁸ Ahimaze akedia diui utsha le khumʼekanga ati: Akambu tshe weko ki! Ndi akayukhusama la ntundu ka khumʼekanga, akakolama, akati ati: Latuyalaka, Unyashungu aye, lakakimo antu wakalo la khumemi khumʼekanga, atumbwami!

²⁹ Khumʼekanga akawumbula ati: Olongo a pami Abisaloma eko la wulu? Ahimaze akûkaluya diui ati: Lamʼakantumi Joaba, dimi ukambi aye, we khumʼekanga, lakuki lufungusu la wuki, keli dimi kumana fundu.

³⁰ Khumʼekanga akawutela ati: Tukumo lane, utukutemala lene. Ku ndi akamo, akatemala dihuli dikina.

³¹ Usi Kushi akakumi, akati ati: Khumemi, khumʼekanga, lambukela lukumu lʼololo. Elo, Latuyalaka ambukosombwela le waku tshe wakakolosha.

³² Ku khumʼekanga akambula usi Kushi ati: Olongo a pami Abisaloma eko la wulu? Ku usi Kushi akûkaluya diui ati: Atunyi tshe wa khumʼekanga, la waku tshe watukoloshaka, wayali uku olongo a pami ako.

³³ Khumʼekanga akayala la okei a wulu, akambela utsha lu luudu landi la mbetama laki ladiku dia eotwelo kʼusumba ataleli ati: Yee! Onʼami Abisaloma li! onʼami li! Onʼami Abisaloma li! Dimi nkutuvo lu dihuli diaye! Abisaloma, onʼami li! onʼami li!