Biblia Todo Logo
Bìoball air-loidhne

- Sanasan -

2 Samuele 17 - La Bible en Otetela (Bible K'Ekila) 1991


Alaku wa Ahitofele la wa Hushai

1 Ahitofele akatela Abisaloma ntu ati: Etawo dimi nsonola apami nunu dikumi la pendi. Kamuneli utshu one, dia ndjelana la Davidi.

2 Dimi layutuwunda lamʼambundokomo dimba ndu lamʼayundutola anya; layutuwutsha woma. Antu tshe weli la ndi, wayulawo. Ku dimi layutudiaka paka khumʼekanga ndame.

3 Dimi layela antu tshe le ye, uku atuyakaka usekaseka a umuntu le umendi. Okone antu tshe wayuyala la ki.

4 Aui aso wakangenyangenya Abisaloma ndu dihangamendi dia Isariyele tshe.

5 Ku Abisaloma akati ati: Nyeti ndu Hushai, usi Araka, kakiane. Tuyuki aui wayunduta ndu ndi.

6 Lamʼakayi Hushai le Abisaloma, Abisaloma akawutela ati: Ahitofele akatutedi okone. Undi, ololo shu ndjela alaku andi? Naka kema, otekete!

7 Hushai akakaluya Abisaloma diui ati: Alaku wambukulaka Ahitofele etena kene kema dimena.

8 Hushai akawutela ntu ati: We nimbitelaka sho la antu andi, apami a wulu mbewo. Vo wambukiyana uku laundu lambohotwama ana lʼusui. Sho eko kanga ata, ndi hudjase kame la antu.

9 Kakiane ndi mbishama lu difuku dimotshi kana lu dihuli kapanda. Okone lamʼayuwudiaka antu amotshi lʼetatelu, untu tshe layuka lukumu, ayuta ati: Andjedi wa Abisaloma wambudiakema efula.

10 Okone ndu kanga dihunga leli lʼutema uku tambwe ayuka woma. Ne dia Isariyele tshe mbeyaka vati: Sho eli ondoshi wa ta a wulu ndu wane tshe weli itame la ndi weli akanga a dihunga.

11 Daku diami le ye ne nti: Usanganya asi Isariyele tshe uma la Dane pulu ndu la Bere-Sheba la le ye. Efula kawo kayali uku seke ya losenga la lʼumamu wʼashi a waki. Ndu weme, kutshu ia wo lu ta.

12 Okone lamʼayutukuma lu dihuli diayututana sho, tayolwela uku atolokaka lopopo la kete. Okone hatahandja ndu ndi ndu asikandi weli la ndi nduku otoi.

13 Ntu, naka ndi ayutoto lʼusumba omotshi, asi Isariyele tshe wayotola ekodi utsha lʼusumba ako. Ku shu tayukutula usumba lʼatei a ashi, edja ndu nduku yet shi ya dive yayutanema laawo.

14 Abisaloma la apami tshe wa Isariyele wakati vati: Daku dia Hushai, usi Araka, diambuleka daku dia Ahitofele ololo. Latuyalaka akasanguya nfutanya daku diʼololo dia Ahitofele dia Latuyalaka mpumuya Abisaloma lukulu lʼengeno.

15 Ku Hushai akatutela elombedi Zadoka la Abiyatara ati: Okone mbakalaki Ahitofele Abisaloma la dihangamendi dia Isariyele, keli dimi lakalaki okone la okone.

16 Okone utumi untu esadi le Davidi la ntuwutela ati: Tetamaki elo lu tehu dia lʼusui a shenga. Ateho, atshu etali! khumʼekanga la antu tshe weli la ndi watukudiakema.

17 Jonatana la Ahimaze wakakungaka la Ene-Rongele. Ku ukambi a umuntu omotshi akatshokaka dia ntuwatela kumu, ne dia vo kumbeya mboto lʼusumba. Vo wakatshu la ntutela khumʼekanga Davidi.

18 Keli olongo a pami omotshi akawaenyi, akayutela Abisaloma dikambu so. Vo wakatshu esadi, wakatukuma laka untu omotshi la Bakurima. Difuku dimotshi diaki lu lukumbu la luudu lako, ku vo wakatushama loko.

19 Ku umuntu kanga luudu akafe unyo a difuku, akatela efushi wʼahoho laawo. Ku dikambu kumbeyama.

20 Ekambi wa Abisaloma wakakumi laka umuntu ako, wakawumbula vati: Lendʼeli Ahimaze la Jonatana? Ku umuntu ako akawatela ati: Vo waketshi, wakatehwi okedi. Vo wakâyangi, keli kumbatana. Okone vo wakakaluya la Jerusalema.

21 Lamʼakunela ekambi wa Abisaloma, vo wakatumbi uma lu difuku, wakatshu le Davidi. Vo wakatuwutela vati: Nyuneli, nyusamanya dia nteho ashi, ne dia okone la okone mbakalaki Ahitofele lu dikambu dianyu.

22 Ku Davidi akunela, ndi la antu tshe waki la ndi, wakateho Jorodana. Okone la hyu-tshihutshi nduku otoi akatshikala, atateho Jorodana.

23 Lamʼakenyi Ahitofele ati: Hawuyeli daku diami, ndi akahe edie lu punda kandi, akunela, akatshu lakawo. Ndi akatolongosola luudu landi, akayadji kyodi, akavu. Ku wakukhunde lu wuku wa diumbu dia shi.

24 Davidi akakumi la Mahanayima. Abisaloma akateho Jorodana, ndi la apami wa Isariyele tshe waki la ndi.

25 Abisaloma akadji Amasa olombodi wʼalimbi lu dihuli dia Joaba. Amasa aki onʼa pami kemotshi, usi Isariyele, lakawetaka vati: Itira lakatshuki Abingale, onʼa umuntu a N hashi, onangu Zeruya nyangu Joaba.

26 Isariyele la Abisaloma wakatuhanga lu kete ya Ngiliyade.

27 Lamʼakakumi Davidi la Mahanayima, Shobi, onʼa Nahashi, usi Amona, uma la Raba, Makira, onʼa Amiyele, usi Lo-Debare, la Barazilai, usi Rongeline ka la Ngiliyade,

28 wakela atuhu, alonga, mbaka, epunga wa menge, epunga wa yelela, shima kʼahoho, nanula, konde, ahoho wa lufumba,

29 usanga, iso, ekoko, awele wʼekama wa dungalunga le Davidi ndu le antu waki kame la ndi dia vo nde. Ne dia vo wakati vati: Antu ane wambusuwa la ndjala la pusa, wambokomo lʼusui wa shenga.

La Bible en Otetela © Allianee Biblique de la Republique Democratique du Congo, 1991 

Bible Society of the Democratic Republic of Congo
Lean sinn:



Sanasan