2 Samuele 16 - La Bible en Otetela (Bible K'Ekila) 1991

¹ Lamʼakalekana Davidi ote a dikuna yema tshitshe, enyi ku Ziba, ukambi a Mefiboshete, one ayayi diandjuhumana la ndi, kame la punda hyendi yukelekami die ladiku diayo ndu yayembe ekama wa ma kama hyendi, ekama lukama wʼelua wa vinyo, la elua wa nshi yʼowo lukama, ndu uhundi a wanu.

² Khumʼekanga akambula Ziba ati: Ukundi ambuyela diango ne? Ziba akûkaluya diui ati: Punda ya lu luudu la khumʼekanga mbahema nye. Ma la elua wa elongo wʼapami nde ne. Ndu wanu wa wane wambokomo lʼusui wa shenga no ane.

³ Khumʼekanga akawumbula ati: Lendʼeli onʼa khumeye? Ziba akûkaluya diui ati: Ndi akatsmkaia la Jerusalema ata ati: Luudu la Isariyele ayunkaluya diulelu dia papa elo.

⁴ Khumʼekanga akakaluya Ziba diui ati: Enda, diango tshe dia Mefiboshete mambuyala diaye. Ku Ziba akati ati: Dimi lambukukhusamela, we khumemi, khumʼekanga, etawo dimi mpumo lukulu lʼolo lu ashu aye.

⁵ Lamʼakakumi khumʼekanga Davidi la Bakurima, enyi ku pami kemotshi, lukumbu landi Shimei, usi khumbu ka luudu la Saulu, onʼa Ngera, one ayayi ayotenge, ayoloke.

⁶ Ndi akuki Davidi la ekambi andi tshe ave. Wudja tshe ndu akanga wʼahunga tshe waki lu lunya la pami la khumʼekanga ndu lu lunya landi la lomoso.

⁷ Shimei akukanula ati: Mo, mo we latutundjaka dikila, we untu a kolo!

⁸ Latuyalaka ambukosomboya dikila tshe dia wa lu luudu la Saulu lukanga kiti ka diulelu kudjashiye. Ndi ambukimo diulelu lu anya wa onʼaye Abisaloma. Enda we ambundama lu kolo kaye, ne dia we eko utundjishi wa dikila.

⁹ Ku Abishai, onʼa Zeruya, akambula khumʼekanga ati Okoko wana wakoloka udu a fo one we khumemi, khumʼekanga? Dimi lambukosengasenga nti: Unkimo ntshu, ntubimbuli ote.

¹⁰ Khumʼekanga akûkaluya diui ati: Kasami la nyu na, nyu ana wa Zeruya? Ndi ambukanula ne dia Latuyalaka akawutela ati: Ukanuli Davidi. Eya mbumbula ati: Okoko wana watshaye osoku?

¹¹ Davidi akatela Abishai ati: Naka onʼami lakatumbi uma lʼosohi ami nangaka ndjakami keti usi Bendjamina one? Nyuwete, ankanuli ne dia Latuyalaka kakawutela.

¹² Undu, Latuyalaka ayena kolo kambuntshela untu one, ndu ndi ayunkaluya ololo lu ekanwelu kambundukanula elo.

¹³ Davidi la antu andi wakakolamela lokendo lawo. Shimei akatatshokaka lʼumamu wʼukungu waki lasuki lʼukungu wakatatshokaka Davidi atukanula, atawuki ave nde atufumbwela ditshu.

¹⁴ Khumʼekanga la antu tshe waki la ndi wakakumi la Jorodana, ku alimba awo wambokomo. Ndi akatumuya leko.

¹⁵ Abisaloma la wndja tshe, wa Isariyele, wakayi la Jerusalema. Ndu Ahitofele aki kame la ndi.

¹⁶ Lamʼakayi Hushai, usi Araka, ongenyi wa Davidi le Abisaloma, idi akawutela ati: Khumʼekanga alumbi! Khumʼekanga alumni!

¹⁷ Abisaloma akambula Hushai ati: Kame kʼasaye la ongenyi aye keko? Okoko wana wakiye kuntsho la ongenyi aye?

¹⁸ Hushai akakaluya Abisaloma diui ati: Aha osoku. Keli one lambosonola Latuyalaka la wudja tshe ndu apami tshe wa Isariyele, ndi kayuyala khumemi, ndu kayumutshikala la ndi.

¹⁹ Ndi akati ntu ati: Akona ayumukambela ulimu? Kema ololo dimi nkambela onʼandi ulimu uka? Uku akamakambelaka sho ulimu, mbayumukukambela ulimu ndu we.

²⁰ Ku Abisaloma akatela Ahitofele ati: Umvuteli akambu wukukisu ntsha.

²¹ Ahitofele akatela Abisaloma ati: Oto lu mvudu ya esika wa sho wakandatshiki dia nama luudu landi. Osoku mbayuka Isariyele tshe vati: Sho ambukena engo ka wononyi. Ku anya wa antu tshe weli la ye wayukikitala.

²² Okone vo wakahikela Abisaloma luudu la dipema ladiku dia luudu la khumʼekanga. Ku Abisaloma akoto le esika wa shi lu ashu wa Isariyele tshe.

²³ Alaki vakalaxaka Ahitofele lu nshi ku waki uku alaku wa untu lakambulaka le Unyashungu. Osoku mbaki alaku tshe wa Ahitofele le Davidi ndu le Abisaloma.