2 Samuele 14 - La Bible en Otetela (Bible K'Ekila) 1991

Esangweyu ka Joaba ka Nkaluya Abisaloma

¹ Joaba, onʼa Zeruya, akenyi ati: Utema a khumʼekanga ambekama le Abisaloma.

² Joaba akatumi untu la Tekoa la ntuyanga umuntu kanga yimba. Ndi akayosengasenga ati: Uyali uku kanga lunyangu; olote ahondo wʼutanda; tushinulaki iso. Keli uyali uku umuntu lambulela utanda edja.

³ Utshu le khumʼekanga, kutuwuteli aui ane. Ku Joaba akawutela aui wa ndi ntuta.

⁴ Umuntu, usi Tekoa, akatshu dia ntoteketa la khumʼekanga. Ndi akatuyakosha ekhukhumadi la kete la ntundu kandi, akukhusamela; akati ati: Khamʼekanga li! unkimanyia.

⁵ Khumʼekanga akawumbula ati: Kambutumba na? Ku ndi akûkaluya diui ati: Dimi wadi aki udu, umemi akavu.

⁶ Ukambi aye a umuntu aki la ana apami ahendi. Ku vo wakatolo lʼusui, ku nduku untu akiko dia mbakakitula. Okone omotshi akakomola unyandi, akudiaki.

⁷ Ku khumbu tshe wambunela dia ndo la mi, wata vati: Utundja one lakadiaki onangu keli tudiaki, ne dia ndi akadiaki onangu. Shu nangaka ndjaka kuyanga ukito. Osoku mbalangawo nyima efuki kambutshikala la mi, diaha ntshikela umemi lukumbu kuyanga untu lasena la kete.

⁸ Khumʼekanga akawutela ati: Utshu lakaye. Dimi layuta diui lu dikambu diaye.

⁹ Umuntu, usi Tekoa, akakaluya khumʼekanga diui ati: We khumemi khumʼekanga, unungu wa dikambu ne ayali le mi ndu le wa lu luudu la papa. Khumʼekanga la kiti kandi tawenaki pa lu dikambu ne.

¹⁰ Khumʼekanga akawutela ati: Naka untu ayoteketa la ye, kuyi la ndi le mi. Ku ndi heyi nkunanda ntu.

¹¹ Ndi akosengasenga ati: We khumʼekanga, uho Latuyalaka, Unyashungu aye, ne dia osomboyishi a dikila atukufudia elanyelu, ku vo ndjudiaka onʼami. Ku ndi akati ati: Uku eli Latuyalaka la lumu! nduku wondji a divu wʼona aye wayoko la kete.

¹² Ku umuntu akosengasenga ati: We khumemi khumʼekanga, etawo dimi ukambi aye a umuntu amoteketa. Ku ndi akûkaluya diui ati: Otekete.

¹³ Umuntu akawumbula ati: Dikambu kuna diasanguyaye ntshela wudja wa Unyashungu wuhu one? Lu aui aye aso wutshiye, we khumʼekanga, ambuyala uku kanga unungu, ne dia we hakaluya one lakayatshanya lakaye.

¹⁴ Shu tshe mpumbaka mvo, shu teko uku ashi wambutshulo lu kete, haweyi mbatongona ntu. Unyashungu hosa lumu lʼuntu lasanguya nkaluya one lakandatshanya, diaha untu ako ntshikala utunami le ndi.

¹⁵ Dimi lambuyoteketa diui ne le khumemi, khumʼekanga, ne dia antu wakambutsha woma. Okone dimi ukambi aye lakati nti: Ndjotekete te khumʼekanga kana ndi ayetawo ntsha kene kayumolomba.

¹⁶ Elo, khumʼekanga ayumbukela, dimi ukambi andi, dia ndi ntshungulami, dimi la onʼami, uma lu anya a wane wayanga ntudiaka, la ntunya uma lʼukito wa Unyashungu.

¹⁷ Ku dimi ukambi aye lakati nti: Diui dia khumemi, khumʼekanga, diayumbisha ki. Ne dia khumemi, khumʼekanga, eli uku ondjelo wa Unyashungu, leya ntshikitanya ololo la kolo. Latuyalaka, Unyashungu aye ayali la ye!

¹⁸ Ku khumʼekanga akakaluya umuntu diui; akolombe ati: Tumbisheki kene kayangami nkumbula. Ku umuntu akûkaluya diui ati: We khumemi, khumʼekanga, otekete!

¹⁹ Khumʼekanga akawumbula ati: Lunya la Joaba kema kame la ye lu dikambu ne uka? Ku umuntu akûkaluya diui ati: Uku eli utema aye la lumu! we khumemi, khumʼekanga, hakuki nkadimo lu lunya la pami kana la lomoso uma lʼaui wutshiye, we khumemi, khumʼekanga. Mete, ukambi aye Joaba kakamvutela, kakandakanya aui ane tshe.

²⁰ Ukambi aye Joaba ambutsha osoku dia nkadimula tukanyi taye lu dikambu ne. Keli we khumemi eko la yimba efula uku ondjelo wa Unyashungu, dia mbeya akambu tshe watutshamaka la kete.

²¹ Khumʼekanga akatela Joaba ati: Ulungi, mete lambetawo ntsha dikambu ne. Tshoka, utulunguli olongo a pami Abisaloma.

²² Joaba akayakosha ekhukhumadi la kete, akakhusamela khumʼekanga, akutumbula. Ndi akati ati: Mete, lambulimbitela elo nti: Dimi ukambi aye lambuhumo lukulu Polo lu ashu aye, we khumemi, khumʼekanga, ne dia we ambetawo ntsha kene kakamakolombe.

²³ Okone Joaba akunela, akatshu la Ngeshure, akatuya la Abisaloma uya la Jerusalema.

²⁴ Ku khumʼekanga akati ati: Ndi atshu lakandi, tenanaki la mi. Okone Abisaloma akatshu utsha lakandi, komena elundji ka khumʼekanga.

²⁵ Lʼatei wa Isariyele tshe nduku pami kaki la lukumu uku Abisaloma lu dimena diandi. Uma lu luhita la lukulu pulu ndu lʼote, ndi taki la ekomo.

²⁶ Lamʼakandahimbula divu dia lʼote, (ndi akadihimbulaka lʼeleku lʼeleku ne dia dio diaki wutshu), ndi akadiedika ku dio diakayala wutshu wa toshekele kama hyendi, lu tediko, tatedikaka khumʼekanga.

²⁷ Abisaloma akuti ana apami asatu, la ona umuntu otoi, lukumbu landi Tamara. Ku ndi akayala umuntu la dimena efula.

²⁸ Abisaloma akadjase deku pendi la Jerusalema, komenana la khumʼekanga.

²⁹ Abisaloma akatumi untu la nteta Joaba dia ndjutuma le khumʼekanga, keli Joaba kunanga ndja. Ndi akatumi diui etena ka hendi, keli ndi kunanga ndja.

³⁰ Okone Abisaloma akatela ekambi andi ati: Nyendi, ekambo ka Joaba keko lasuki la ekambo kami, epunga weko loko. Nyutshu, nyutukitshumbi. Ku ekambi wa Abisaloma wakatukitshumba.

³¹ Ku Joaba akatshu laka Abisaloma, akatuwumbula ati: Okoko wana wakatutshumba ekambi aye ekambo kami?

³² Abisaloma ah kaluya diui ati: We henyi, dimi lakaketi tena pendi nti: Yaka ndjukutumi le khumʼekanga dia ntumumbwendi wati: Dikambu kuna diakamayi uma la Ngeshure? Aki ololo dimi ntshikala leko. Kakiane dimi nangaka mena elundji ka khumʼekanga. Naka dimi leko la unungu, andjaki.

³³ Ku Joaba akatshu le khumʼekanga, akatuwutela aui aso. Khumʼekanga aketi Abisaloma ku ndi akatshu la ntundu kandi. Ndi akukhusamela, akakole ote la ntundu kandi. Ku khumʼekanga akukhumbatela.