2 Samuele 12 - La Bible en Otetela (Bible K'Ekila) 1991

Natana Ambuhangwela Davidi

¹ Latuyalaka akatumi Natana le Davidi. Ndi akayi le ndi, akawutela ati: Lʼusumba omotshi keli apami ahendi; omotshi kanga ongonyi la ukina usi wula.

² Kanga ongonyi aki la ekoko la ngombe efula.

³ Keli usi wula kundjala la engo tshikima yana yʼokoko ya wadi yame, yakandasumbi ndu yakandaleshaka. Yo yakuli lasuki la ndi, kame la anʼandi. Yo yakalekaka ma diakandalekaka, yakanokaka lu dikoho diakandanokaka. Yo yaketamaka lu tulu kandi, yakayala le ndi uku onʼandi a umuntu.

⁴ Ku lushi lomotshi umbetshi a mbuka akayi laka kanga ongonyi. Kanga ongonyi kunanga munda okoko andi omotshi kana ngombe kandi kemotshi dia nkatela umbetshi a mbuka wakayi lakandi. Keli ndi akatosa yana yʼokoko yʼusi wula akayidiakela umbetshi a mbuka wakayi lakandi.

⁵ Ku Davidi akuki pami keso kele, akatela Natana ati: Uku eli Latuyalaka la lumu! dieli la pami kakatshi dikambu so ndjakema.

⁶ Dieli la ndi dia nsombola ekoko enei, ne dia ndi akatshi dikambu so, kundjala la ketshi.

⁷ Natana akakaluya Davidi diui ati: We keli untu ako. Latuyalaka, Unyashungu wa Isariyele, kata ati: Dimi kakakukiti iso dia we ndjala khumʼekanga ka Isariyele, ndu kakakushimbela uma lʼanya wa Saulu.

⁸ Dimi lakakusha luudu la khumeye, ndu wadi waki khumeye dia we ndjala umewo, lakakusha luudu la Isariyele ndu la Juda. Utunduyala diango ne diaki tshitshe, tshiki lutukahela ndu dikina ladiku.

⁹ Okoko wana wakayonyola diui dia Latuyalaka, dia ntsha dikambu dia kolo lu ashu andi? We kakadiaki Uriya, usi Hiti, la yombo. We kakose wadendi dia ndi ndjala wadeye. We kakudiaki la yombo yʼasi Amona.

¹⁰ Okone yombo hayumoki uma lu luudu laye pundju ne dia we akamonyola, akose wadi a Uriya, usi Hiti, dia ndi ndjala wadeye.

¹¹ Latuyalaka kata ati: Enda, lutsha munyiya elanyelu lu luudu laye, dia to nkulanya. Dimi lutsha mbosa wadieye lu ashu aye, la mbasha unyaye dia ndi mbetama la wo la ntundu ka unya.

¹² We akatshi lʼusheshe, keli dimi layutsha dikambu ne la ntundu Ka Isariyele ndu la ntundu ka anya.

¹³ Davidi akatela Natana ati: Dimi lakatshela Latuyalaka kolo. Ku Natana akakaluya Davidi diui ati: Latuyalaka ambukudimanyia kolo kaye. We huvo.

¹⁴ Keli uma lu kolo kakayatshi kene, we akonyola Latuyalaka utamanya. Diako mbayuvo ona one lakayuti.

¹⁵ Ku Natana akatshu utsha lakandi. Latuyalaka akukia ona lakutela wadi aki Uriya Davidi kandji. Ndi akayala la kandji ka wulu.

¹⁶ Ku Davidi akalombe Unyashungu dikambu dia ona. Ndi akakili ma, akoto lu luudu, aketama utshu tshe la kete.

¹⁷ Dihangamendi dia luudu landi wakunela, wakemala la le ndi dia mbunyia uma lu kete. Keli ndi kunanga, ndu konde la wo ma.

¹⁸ Lu lushi lʼesambeli, ona akavu. Ekambi wa Davidi wakuki woma dia mbutela vati: Ona ambuvo. Vo wakati vati: Nyendi, lamʼaki ona la lumu shu takawutela, keli ndi kuntukela. Ku ngandi ayuteya mbutela shati: Ona ambuvo? Ndi ayuyala la lunyangu efula.

¹⁹ Keli lamʼakenyi Davidi ekambi andi wateketa tohotehote, ndi akalimbitela ati: Ona ambuvo. Ndi akambula ekambi andi ati: Ona ambuvo? Ku vo wakûkaluya diui vati: Ndi ambuvo.

²⁰ Ku Davidi akunela uma lu kete, akoke, akashinula, akengula ahondo. Ndi akatshu utsha lu luudu la Latuyalaka, akatotemola. Ku ndi akakalula lakandi. Ndi akati dia vo mbela ma, ku ndi akali.

²¹ Ku ekambi andi wakawumbula vati: Na wuhu wa dikambu diambuyutsha ne? Lamʼaki ona la lumu, we akakili ma, akalelaka. Ku lamʼambuvo ona, we ambunela, ambole!

²² Ku Davidi akakaluya diui ati: Lakakili ma, lakalelaka, lakataka lʼutema nti: Akona eya ati: Latuyalaka humbuka ketshi dia ona ntshikala la lumu?

²³ Keli kakiane ndi ambuvo. Okoko wana wakilami ma ntu na? Undi, dimi mbeyaka mbukaluya ntu? Dimi kayutsho utsha le ndi, keli ndi hukalula uya Je mi.

²⁴ Davidi akasambi wadendi Batesheba, akoto le ndi, akeyana la ndi. Ku ndi akuti ona pami; Davidi akawole ati: Solomona. Latuyalaka akalangi ona ako,

²⁵ akatumi diui le umvutshi Natana. Ku ndi akayuwole lukumbu ati: Jedidiya (kitshimudi ati: Unangemi wa Latuyalaka), lu dikambu dia Latuyalaka.

Davidi Ambolembia Raba

²⁶ Joaba akalo la Raba kʼasi Amona, akalembia usumba wa khumʼekanga.

²⁷ Joaba akatumi akendji le Davidi ati: Dimi lakalo la Raba; dikambu dikina, lambolembia usumba wʼashi.

²⁸ Kakiane usanganya antu wakatshikala, nyuyuhangi lasuki lʼusumba, kanyôlembia, dimi ntukôlembia dime, ku vo ndjolema lukumbu lami.

²⁹ Davidi akâsanganya antu tshe kame. Vo wakatshu la Raba, wakatolo la wo, wakalembia.

³⁰ Ndi akahula dembo dia kusu uma Vote wa khumʼekanga kawo. Wutshu adio waki talata otoi ka paunyi. Dio diakalengami lʼave wʼushinga a wulu; wakadiahe lʼote wa Davidi. Ndi akatuya la diango dia dimbu efula uma lʼusumba.

³¹ Ndi akayi la antu ako, akawadji lʼulimu wa mbata abava, wa nkamba la kungu, wa nkamba la tokenge ndu wa ntsha atafadi. Osoku mbakandatshela antu wa lu esumba tshe wʼasi Amona. Davidi akakalula, ndi la wudja andi tshe utsha la Jerusalema.