2 Petero 3 - La Bible en Otetela (Bible K'Ekila) 1991

Esoki la Ekumelu Kawo

¹ Elangimi ami, mukanda a hendi one wamumunyufundela kakiane. La lu ehendi kawo, dimi lambangasanya etema anyu wʼololo ne dia nyuhula.

² Dieli la nyu dia mbuho aui wakati amvutshi wʼekila, ndu elembe wa Khumadiondjo la Ushimbedi, wakandanyutela lʼenyo wʼatumami anyu.

³ Nyuteyi ntundu nyati: Lu nshi yʼekumelu, asoki wayuya la losoko lawo, wayutshaka uku saki yawo;

⁴ wayuta vati: Daka dia eyelu kandi, lendʼedio? Ne dia umaka lushi lakavu watshesu, diango tshe dieko pupu uku akidio uma lʼetatelu kʼetungelu.

⁵ Vo nyangaka mbuhela dia ulungu a ntundu, ndu kete yakatungama lʼashi, yeki lʼashi, uma lu diui dia Unyashungu.

⁶ Ne dia ashi ane, antu waki la kete wakakhukhumama lʼashi, wakashisho,

⁷ Keli ulungu weli kakiane, ndu kete, wambulamema la dja, uma lu diui diku diakandakitsha, edja ndu lushi lʼelumbwelu ndu lʼelanyelu ka antu wa kolo.

Eyelu ka Lushi la Khumadiondjo

⁸ Elangimi ami, dikambu otoi ne mbahumbanyu mbeya nyati: Lushi otoi leli uku deku kinunu lu ashu wa Khumadiondjo, la deku kinunu dieko uku lushi otoi.

⁹ Khumadiondjo huhela dia nshidiya alaka andi, uku atedikaka antu wauhu awo, keli ndi eko la nyu memakana. Ndi halangi nduku omotshi nshisho, keli ndi nangaka tshe wakadimuli etema.

¹⁰ Keli lushi la Khumadiondjo layuya uku uvi. Lu lushi lako, ulungu ayushisho la lundju la wulu. Diango diayolelo la dja ya wulu; ndu kete ndu diango tshe dieli loko, diayulungula.

Ulungu wʼUyuyu la Kete yʼUyuyu

¹¹ Ne dia diango ne tshe diayolelo, ku dieli la nyu dia ndjala wuhu akona wʼantu wayunyuyala lu akambu wʼololo tshe la wʼekila.

¹² Lamʼalungamelanyu lushi lʼeyelu ka Unyashungu, lu lushi lako layulungula ulungu dja; ndu diango tshe dieli loko, diayolelo la dja ya wulu!

¹³ Keli ne dia daka diandi, mbalungamelasu ulungu wʼuyuyu la kete yʼuyuyu, lene udjashi akambu wʼololo.

Nyutetemali Dia Ndjala Aha la Unungu

¹⁴ Okone, elangimi ami, ne dia nyu nyambulungamela akambu ane, nyutetemali dia nyu ntanema la ki, aha la vadi, aha la unungu lu ashu andi.

¹⁵ Nyeyi nyati: Memakana ka Khumadiondjo keko panda kanyu, uku akanyufundela unyasu a ngandji Paulu, uku yimba yakandalungula,

¹⁶ mbakandanyutela akambu ane uku atandi lu mikanda andi tshe. Akambu amotshi weli loko, weko wulu nshihudia. Akanga a dinginya la akanga a weodu watingisulaka akambu ako uku atshawo la afundelu akina, watuyalanyaka la wo.

¹⁷ Keli yaka akambu ane ntundu, nyewo, nyutukunganela lu wetshelu wʼantu wa kolo, nyu nyatukoko lu eshikikalu kanyu.

¹⁸ Keli nyuli lu ngandji ka mamba la lu elimbitelu ka Khumesu, Ushimbedi Jesu Kristu. Lutumbu layali le ndi kakiane ndu pundju! Ayali osoku!