Biblia Todo Logo
Bìoball air-loidhne

- Sanasan -

2 Koreto 9 - La Bible en Otetela (Bible K'Ekila) 1991


Unyashungu Nangaka One Lakimo lʼOngenongeno

1 Dimi kema la dikambu dia nyufundela dia nkambela ekilami.

2 Ne dia dimi mbeyaka ukalanganu anyu, wakamanyutumbula le asi Makedoniya nti: Asi Akaya wambuyalongosolaka eleku kʼutundu. Ukalanganu anyu ambosemanela la amotshi efula.

3 Keli dimi lambutuma anyasu, dia ndjatumbula kasu lu dikambu dianyu tayalaki uyalayala. Uku akamati, dimi nangaka nyu nongoswama.

4 Naka antu amotshi wayuya kame la mi uma la Makedoniya, wayunyutana nyatayalongosola, ku shu — hatulangi mvuta shati: Nyu — tayutshama sonyi lu elungamelu kene.

5 Okone dimi lakakani nti: Ololo nsengasenga anyasu, vo watateli la ntundu utsha le nyu. Vo watasanganyisha eshasha wakanyalaki ntundu, ne dia diango diku diayali uku ushasha, aha la khudu.

6 Dimi lambunyutela dikambu ne nti: Untu lune diango tshitshe, ayuna diango tshitshe; untu lune diango efula, ayuna diango efula.

7 Untu lʼuntu akimo uku akandati lʼutema andi, aha la lunyangu, aha la khudu, ne dia Unyashungu nangaka untu latukimoka lʼongenongeno.

8 Unyashungu mbeyaka nyufudiya ngandji ka mamba tshe, ne dia nyu nyatuyalaka la diango kambi nshi tshe, ku nyuyafudiya lu elimu wʼololo tshe.

9 Uku akafundama ati: One lakadianganyaka diango, Ndi akashaka akanga a weula eshasha; Ololo andi atutshikalaka pundju.

10 One latushaka umbuki wuhu la ma dia nde, ndi ayunyusha wuhu anyu wa mune, ayuwufudia, ayuhamia elua wʼakambu anyu wʼololo.

11 Nyu nyambongonyama lu akambu tshe, ne dia lukahu lone la mamba! Lukahu lako layukundjiya Unyashungu lusaka uma le su.

12 Ne dia ekambelu kʼulimu one aha paka dia nkutsha yediko yʼehumba wʼekilami tshu, keli ambufudia ndu lusaka efula le Unyashungu.

13 Lu ehimbelu kʼulimu one, vo wayutumbula Unyashungu, ne dia ukitanyia anyu wa mbetawo ka lu lukumu lʼololo la Kristu, la dia lukahu lanyu le wo ndu le antu tshe.

14 Ndu vame watunyolombelaka Unyashungu, wambunyukumbula wulu, ne dia ngandji ka mamba kʼutamanya ka Unyashungu keli lʼetema anyu.

15 Lusaka le Unyashungu, ne dia ushasha andi waheyana mvuta.

La Bible en Otetela © Allianee Biblique de la Republique Democratique du Congo, 1991 

Bible Society of the Democratic Republic of Congo
Lean sinn:



Sanasan