2 Koreto 8 - La Bible en Otetela (Bible K'Ekila) 1991

Nyukuya Lukahu lʼAsi Makedoniya le Ekilami

¹ Dikambu dikina, anyasu, shu nangaka nyu mbeya dia ngandji ka mamba ka Unyashungu, kakandasha ekelizia wa la Makedoniya.

² Okone lu ehimbelu kʼasui, ongenongeno awo efula la wula awo wakatamanya mbudia lukahu lawo.

³ Dimi lambunyutela uku omenyi nti: Uku wulu awo, ndu ndeka wulu awo, vame wakakimo diango;

⁴ wakatosengasenga otekoya dia ngandji ka mamba kene la dia ekesanelu kasu, dia nkambela ekilami —

⁵ Vo wakaleki elungamelu kasu; ntundu wakayakimo le Khumadiondjo, ndu le su, uma lu lulangu la Unyashungu.

⁶ Dia dikambu ne, mbakatakokomiya Tito, uku akandatatela ulimu one ntundu, dia ndi nyanga nkukia ngandji ka mamba kene ndu le nyu.

⁷ Uku akanyakuki lu akambu tshe lu mbetawo, ndu lu wutelu, ndu lʼewu, ndu lʼukalanganu tshe, ndu lu ngandji kanyu le su, okone nyuyangi nkukanya ndu ngandji ka mamba kene.

⁸ Dimi hanyutela diui ne uku olembe, keli dia mbeya mete ka ngandji kanyu la ukalanganu wʼakina.

⁹ Ne dia nyu mbeyaka ngandji ka mamba ka Khumesu Jesu Kristu, nyati: Kuyanga ndi aki ongonyi, ndi akayala la wula dia dikambu dianyu, dia nyu najala engonyi uma lu wula andi

¹⁰ Dimi lambunyutela tukanyi tami lu dikambu ne nti: Ndeka ololo, nyu wane wakatatela dikambu ne eleku ka lʼokongo, dia nyu dishidiya kakiane, aha dia ntsha tshu, keli ndu dia nanga ntsha.

¹¹ Keli kakiane nyumani ntsha, uku akanyalangi ntsha, okone nyuyali la wulu wa dishidiya.

¹² Naka lulangu leko, layetawoma uku yediko le untu, aha yediko yaha la ndi.

¹³ Dimi halati diui ne dia akina nsalangana, la nyu ndjala la lunyangu.

¹⁴ Keli ne dia mbedimia yediko pupu, diango dianyu efula lʼetena kene, diambukuka dia ehumba awo, ne dia diango diawo efula ntu diakuki lʼehumba anyu. Okone nyayedima pupu.

¹⁵ Uku akafundama ati: One lakasanganya efula, taki la engo kakatshikala: lakasanganya tshitshe, kumpumba.

Tito la Asikandi Wayali Elombodi lu Dikambu Ne

¹⁶ Keli tambuka Unyashungu lusaka, ne dia ndi ambudja tukanyi ta nyulama ololo lʼutema a Tito.

¹⁷ Aha paka ne dia ndi aketawo daku diasu, keli ndu ndame aki la ukalanganu efula, akatshu le nyu dia lulangu landi.

¹⁸ Ku shu takatumi unyasu kame la ndi, leli la diandu lu lukumu lʼololo lʼekelizia tshe.

¹⁹ Aha dikambu so tu, keli ndi akasonama ndu uma le ekelizia, dia nkindula la su la ngandji ka mamba kene, kakambelasu lu lutumbu la Khumadiondjo, la dia menya antu ukalanganu asu.

²⁰ Shu tambetawo dikambu ne, dia untu atukutosongwela ne dia ushasha one wakambelasu.

²¹ Ne dia shu tatukanaka yimba yʼakambu wa kenemo, aha lu ashu wa Khumadiondjo utu, keli ndu lu ashu wʼantu.

²² Shu takatumi unyasu kame la wo, takedika ukalanganu andi tena kambi lu akambu efula, keli ukalanganu ako ambutamanya kakiane, ne dia elungamelu ka wuki keli la ndi le nyu.

²³ Naka untu ambunyumbula dikambu dia Tito: ndi eko umbekesanedi ami la unyami ukambi lu dikambu dianyu; ndu dia anyasu, vo weko akendji wa ekelizia, vo weli lutumbu la Kristu.

²⁴ Okone nyuwaenya djimbitelu ya ngandji kanyu la ntundu ka ekelizia, ndu ndjatumbula kasu lu dikambu dianyu.