2 Koreto 7 - La Bible en Otetela (Bible K'Ekila) 1991

¹ Okone, anyasu wa ngandji, ne dia shu teko la alaka ane, tuyalongosole uma lu mindu tshe ya dimba ndu yʼetema, tuluwanya akambu wʼekila la woma a Unyashungu.

Eyelu ka Tito Akayala Ekikitshelu la Ongenongeno le Su

² Nyutudihweli etema anyu. Shu kuntshela nduku untu kolo, shu kunanya nduku untu, shu kunkesa nduku untu.

³ Dimi halati osoku dia nyamia, ne dia dimi lakati ntundu nti: Nyu nyeko lu etema asu, dia mvo kame ndu ndjala la lumu kame.

⁴ Dimi leko la elungamelu ka wulu le nyu! Dimi leko la ufunu a wulu lu dikambu dianyu! Dimi lambuludiama lʼekikitshelu; lambulula lʼongenongeno otekoya lu asui asu tshe.

⁵ Ndu lamʼakatakumi la Makedoniya, alimba asu tawaki la mumuya, keli takasuyama lu beke tshe — ata waki lʼandja, weoma waki lu etema.

⁶ Keli Unyashungu latukikitshaka akanga a ndjakitshakitsha, ndi akatukikitsha lamʼakayi Tito.

⁷ Aha ne dia eyelu kandi ketu, keli takakikitshama ndu uma lʼekikitshelu kakanyukikitshe lamʼakandatutela ekumbwelu kanyu, la delu dianyu, la saki kanyu dia dikambu diami. Osoku dimi lakaleki ngenangena.

⁸ Kuyanga mukanda ami akanyunyangia, dimi hayatshumuya dikambu diku: lakayatshumuya ntundu (ne dia lakenyi nti: Mukanda uku akanyunyangia nshi motshi tshu),

⁹ ku kakiane dimi lambongenangena, aha ne dia dimi lakanyunyangia, keli ne dia nyu nyakanyangi, edja ndu ekadimwelu kʼetema; ne dia nyu nyakayangiama uku lulangu la Unyashungu, diaha nyu nshisha engo dia dikambu diasu.

¹⁰ Ne dia lunyangu uku lulangu la Unyashungu atutungaka ekadimwelu kʼutema utsha lu panda. Untu hayatshumuya ne dia ekadimwelu keku, keli lunyangu la wa la kete atutungaka nyoi.

¹¹ Nyendi, ne dia nyu nyakanyangiama uku lulangu la Unyashungu, dikambu diako mbambutunga elamelu ka wulu lʼetema anyu, ndu nyindjama, ndu kele, ndu woma, ndu ekumbwelu, ndu saki, ndu esombweyo! Nyu nyakayayindja lu akambu ane tshe.

¹² Osoku mbakamanyufundela mukanda, aha ne dia one lakatshi dikambu dia kolo, aha ne dia one lakandatshela kolo, keli ne dia elamelu kanyu le su kenami lu ashu a Unyashungu.

¹³ Okone shu takakikitshama. Lu ekikitshelu kasu, mbakatatamanya ngenangena ne dia ongenongeno a Tito, ne dia nyu tshe mbakasalanganya utema andi.

¹⁴ Ne dia dimi kumbutshama sonyi lamʼakamanyutumbula le ndi. Keli uku akatanyutela akambu tshe mete, okone ndu aui ami wa nyutumbula wakamati la ntundu ka Tito, wakenama ati: Mete.

¹⁵ Ngandji kandi kambuleka efula le nyu lamʼuhondi ukitanyia anyu tshe, okone akanyulunguia la woma la lukumba.

¹⁶ Dimi lambongenangena ne dia elungamelu keli la mi dia dikambu dianyu.