2 Koreto 6 - La Bible en Otetela (Bible K'Ekila) 1991

Lu Akambu Tshe Dieli la Su Dia Ndjaenya Uku Ekambi wa Unyashungu

¹ Shu tatukambaka kame la Unyashungu, tambunyosengasenga shati: Tanyulungulaki ngandji ka mamba ka Unyashungu anyanya;

² ne dia ndi akati ati: Lʼetena kʼololo, dimi lakakuhukama; Lu lushi la panda, dimi lakakukimanyia. Ulungi, kakiane eko etena kʼololo; enda, kakiane eko lushi la panda.

³ Tukitshiyaki untu utamba a ntakanya nduku yema, ne dia ekambelu kasu katukonywama.

⁴ Keli lu akambu tshe, shu tatuyaenyaka uku ekambi wa Unyashungu: lu ekikelu ka mamba, lu asui, lu ehumba, lu akambu wa penyo,

⁵ lu dikomoki, lu mvudu ya kanu, lu mindju, lu pa, lu senelo, lu dikilelu dia mbu ya nde;

⁶ lu pudipudi, lu ewu, lu ndjakimela kʼedja, lu ketshi, lu Nyuma kʼOlolo, lu ngandji kaha la lukesu;

⁷ lu diui dia mete, lu wulu a Unyashungu, lu eloto wa ta wʼakambu wʼololo, lu lunya la pami ndu lu lunya la lomoso;

⁸ la lutumbu ndu la dionyo, la lukumu la kolo ndu la lukumu lʼololo; uku akanga wa kashi, keli teko la aui wa mete;

⁹ uku wane waheyama, ku tambeyama ololo; uku wane wayanga mvo, ku eko la lumu; uku wane wasuyama, keli tatadiakema;

¹⁰ uku akanga wa lunyangu, keli shu tatongenangenaka nshi tshe; uku akanga a weula, keli shu tatongonyaka antu efula; uku wane waha la engo, keli shu teko akanga wa diango tshe.

¹¹ Asi Koreto li! enyo asu wambudiho uya le nyu, etema asu wambuyala hwe.

¹² Nyu kema pika lu etemʼasu, keli nyu nyame mbeli pika lu ngandji kanyu.

¹³ Ne dia nemanya la nyu — lambunyutela uku anʼami — nyudihuli ndu nyu etema anyu hwe.

Embetawudi Tawosohanaki la Wane Wahetawo

¹⁴ Tanyosohanaki kame la wane wahetawo. Ne dia ololo la kolo weko la esohanelu kakona? anyi la udjima ukundi ewo pupu?

¹⁵ Kristu eko la Beliyala ekesanelu kakona? Umbetawudi la untu lahetawo weko la etenyi kakona kame?

¹⁶ Etemwelo ka Unyashungu la ka dikishi weko la esohanelu kakona ne dia shu teko etemwelo ka Unyashungu a lumu; uku akati Unyashungu ati: Dimi layuyala lu etema awo, Layokendakenda lu etema awo. Dimi layuyala Unyashungu awo, Ndu vo wayuyala antu ami.

¹⁷ Okone nyumo uma lʼatei awo, Nyuyatuli uma le wo, mbata Khumadiondjo, Tanyunandaki engo ka kolo; Ku dimi layunyulungula,

¹⁸ Layuyala uku Shenyu, Nyu nyayuyala anʼami wʼapami la anʼami wʼamantu, Mbata Khumadiondjo Kanga-Wulu-Tshe.