2 Koreto 3 - La Bible en Otetela (Bible K'Ekila) 1991

“Nyu Nyeli Mukanda wa Kristu”

¹ Shu tambutatela ndieyanya ntu uka? Kana shu la uhumba wa mikanda wa ndjenyanya le nyu, kana uma le nyu, uku atutshaka antu amotshi?

² Nyu nyame nyeko mukanda asu wa ndjenyanya, wa-mbufundama lʼetema anyu, dia mbeyama la mbalema le antu tshe.

³ Nyu nyambenama nyati: Nyu nyeli mukanda wa Kristu wakatatumi, wahafundama lʼashi a mukanda, keli la Nyuma ka Unyashungu a lumu. Aha lu tuhasi tʼave, keli luʼtahasi tʼetema wʼantu.

Ekambi wa Sheki yʼUyuyu

⁴ Elungamelu keso keli la su le Unyashungu uma le Kristu.

⁵ Shu shame hatukuki, dia shu nkana shati: Engo kambuya uma le su shame, keli ekukelu kasu keko uma le Unyashungu.

⁶ Ndi akatuhilula dia shu nkuka uku ekambi wa sheki yʼuyuyu, aha ekambi wa diui diufundami tu, keli ekambi wa Nyuma; ne dia diui tu diatutudiaka, keli Nyuma atutushaka lumu.

⁷ Keli naka ekambelu ka nyoi kakafundama lʼaleta lu ave, kakayi kame la lutumbu, wuhu waki asi Isariyele kumbeya menda elundji ka Mose tee, ne dia lutumbu laki lʼelundji kandi, lutumbu lako lakatakitakitaka.

⁸ Okone ekambelu ka Nyuma haleki ndjala la lutumbu lutamanya uka?

⁹ Ne dia naka ekambelu ka dianyelu keko la lutumbu, ku lutumbu lʼakambu wʼololo layuleka lutumbu loso.

¹⁰ Mete, akambu wakayala la lutumbu ntundu, kema la lutumbu kakiane, ne dia lutumbu lone lambuleka lutumbu loso.

¹¹ Ne dia naka akambu wakakitakita waki la lutumbu, ku akambu wutshikadi wayuleka lutumbu efula.

“Lamʼeli Nyuma ka Khumadiondjo, Ndjadjasela Keko Laawo”

¹² Ne dia elungamelu keku, mbesu la dihunga efula lamʼatelasu antu diui,

¹³ aha uku Mose, lakakumbi dihondo diʼekumbamelu lʼelundji kandi, dia asi Isariyele watukenda ekumelu kʼakambu wakakitakita.

¹⁴ Keli tukanyi tawo takakikitala, ne dia edja ndu elo, lamʼalawo lu sheki yʼedjedja, dihondo diako diʼekumbamelu ntshikalaka diukumbami le wo edja ndu elo, ne dia dio diambunyema paka le Kristu.

¹⁵ Keli edja ndu elo, tena tshe lamʼalawo mukanda a Mose, dihondo diʼekumbamelu ndjalaka lu tukanyi tawo.

¹⁶ Keli lamʼambukadimo untu le Khumadiondjo, dihondo diako diatunyemaka.

¹⁷ Khumadiondjo eli Nyuma. Lamʼeli Nyuma ka Khumadiondjo, ndjadjasela keko laawo.

¹⁸ Keli shu tshe, lamʼendasu lutumbu la Khumadiondjo la dundji diahakumbami, uku lu lulindu, shu tambuhilwama lu efanelu kandi, uma lu edelu kemotshi utsha lu edelu kekina ka lu lutumbu, uma le Khumadiondjo leli Nyuma.