2 Koreto 2 - La Bible en Otetela (Bible K'Ekila) 1991

¹ Dimi lakasanguya dikambu ne nti: Handjuya le nyu ntu la lunyangu.

² Naka dimi lambunyunyangia, untu akona ayongenyangenya, naka aha one lakamanyangisha?

³ Dimi lakafundi dikambu so, ne dia dimi hayala la lunyangu uma le wane weli la dikambu dia ngenyangenyami lamʼayumuya. Dimi lakanyulungamela, nyu tshe, nti: Ongenongeno ani eko ongenongeno anyu, nyu tshe.

⁴ Ne dia uma lʼokei efula la ulingulingu lʼutema, mbakamanyufundela mukanda la asoi efula lu ashu. Aha ne dia nyunyangia, keli dia nyu mbeya ngandji kami kʼutamanya le nyu.

Dia Nyimanyia Utshi a Kolo Kolo Yandi

⁵ Keli naka untu ambutunga lunyangu, ndi hanyangia dimʼutu, keli lu wuhu omotshi — aha dia ntekoya nyunyangia — ndu le nyu tshe.

⁶ Asui andi ane wakanyusuya nyu wane wakaleki efula, wakakuki.

⁷ Okone ololo nyu mbudimanyia kolo yandi la mbukikitsha, ndi atukolembiama la lunyangu landi utamanya.

⁸ Okone dimi lambunyosengasenga nti: Nyushikike ngandji kanyu le ndi.

⁹ Ndu dia dikambu ne mbafundami dia dimi nyuhimba, kana nyu nyeko la ukitanyia lu akambu tshe.

¹⁰ Keli lamʼayunyudimanyia untu kolo yandi, ndu dimi layudimanyia akambu wakamudimanyia. Dimi lakudimanyia lu ashu a Kristu dikambu dianyu,

¹¹ ne dia Satana atukutuleka wulu: shu mbeyaka ditshelu diandi.

¹² Lamʼakamakumi la Toroa dia lukumu lʼololo la Kristu, lamʼakawandjihwela lukuki le Khumadiondjo,

¹³ utema ami kundjala la ki, ne dia dimi kuntana Tito onalingu. Okone lakawasha moyo, ku lakatshu la Makedoniya.

¹⁴ Keli Unyashungu, latutolombolaka nshi tshe lʼelekelu kʼakambu le Kristu, ndu latudianganyaka upumu wʼololo andi lu ahuli tshe uma le su, atumbwami!

¹⁵ Ne dia shu teko upumu wʼololo wa Kristu le Unyashungu, le waku wambushimbamela, ndu le waku wambushisho.

¹⁶ Le omotshi teli upumu wʼuma lu nyoi utsha lu nyoi; le akina teko upumu wʼuma lu lumu utsha lu lumu. Akona ambukuka lu akambu ane?

¹⁷ Ne dia shu kema uku antu efula, wane watulanyaka diui dia Unyashungu, keli shu teko uku antu wa mete, uku wane wakatumama uma le Unyashungu, la lu ashu a Unyashungu, mbatutoteketaka le Kristu.