2 Ekondo 9 - La Bible en Otetela (Bible K'Ekila) 1991

Khumʼekanga ka Umuntu ka Sheba Ambuya la Ndjenda Solomona

¹ Lamʼakuki khumʼekanga ka umuntu ka Sheba lukumu la Solomona, ndi akayi la Jerusalema la embula a wulu dia ndjuwedika. Ndi akayi la ului a wuki wʼantu la diango kotakota kame la kamelo yakayembaka diango diʼepumu, paunyi efula la mboko yʼave yʼushinga a wulu. Lamʼakandakumi le Solomona, ndi akawutela kene tshe kaki lʼutema andi.

² Solomona akakadimula embula andi tshe. Nduku diui diakaheko Solomona diakindi kumbeya mbulimbitshiya.

³ Lamʼakenyi khumʼekanga ka umuntu ka Sheba yimba ya Solomona ndu luudu lakandahiki,

⁴ wama waki lu mesa andi, edjaselu ka tundjihu tandi, elimu la eloto wa waku wakukambelaka ulimu, aboi andi la eloto awo, la elambu wa lutshumba wakandalambulaka lu luudu la Latuyalaka, ku ewu kandi kakakumela.

⁵ Ku ndi akatela khumʼekanga ati: Lukumu la yimba yaye la elimu aye lakamuki lu kete yami leko mete.

⁶ Keli dimi kumbetawo lukumu lako ntundu dimi latayi ndu latenyi la ashu ami. Ku kakiane lambena nti: Vo kumvutelami kuyanga etenyi ka hendi ka wuki wa yimba yaye. We ndeka lukumu lakamuki.

⁷ Antu aye, ekambi aye, watemalaka la ntundu ka ye ndu watukaka yimba yaye weli lʼotshoko.

⁸ Latuyalaka, Unyashungu aye, lakakongenangena dia nkudjasha lu kiti ka diulelu diʼIsariyele, atumbwami! Unyashungu aye atukaka Isariyele ngandji, mbakandakudji khumʼekanga kawo dia we ntshaka akambu wʼusimbwi ndu wʼololo.

⁹ Ndi akasha khumʼekanga paunyi yediko ya talata lukama la akumi ahendi, diango diʼepumu efula efula, la mboko yʼave yʼushinga a wulu. Nduku etena kakayala diango diʼepumu uku ne diakasha khumʼekanga ka umuntu ka Sheba khumʼekanga Solomona.

¹⁰ Ndu ekambi wa Hurama la ekambi wa Solomona wakela paunyi uma la Ofira, ndu etamba wʼekulungu la mboko yʼave yʼushinga a wulu.

¹¹ Khumʼekanga Solomona akatshi etamba wʼekulungu abandelu wa luudu la Latuyalaka ndu wa luudu la khumʼekanga, sese la akembi ne dia amimbi. Nduku untu akenyi etamba wa wuhu ako ntundu lu kete ya Juda.

¹² Khumʼekanga Solomona akasha khumʼekanga ka umuntu ka Sheba kene tshe kakandalangi la kene tshe kakandolombe ndeka diango diakandela khumʼekanga. Ku ndi akunela, akakalula utsha lu kete yandi, ndi la antu andi.

Lukumu ndu Ongonyi wa Solomona

¹³ Efula ka paunyi kakalungula Solomona lʼeleku otoi kaki yediko ya talata kama shamalu akumi asamalu la shamalu,

¹⁴ ladiku dia nye yakelaka ambetshetshi wʼukanda la asundjishi wa diango. Khumi ya dikanga tshe yʼArabiya la embuledi wa kete wakelaka Solomona paunyi la fesa.

¹⁵ Khumʼekanga Solomona akatshi dingawu dia waki kama hyendi dia paunyi ka lutshula. Engawu la engawu kaki la paunyi yediko ya toshekele kama shamalu.

¹⁶ Ndi akatshi ndu dingawu dia tutshitshe kama shatu dia paunyi ka lutshula. Engawu la engawu kaki la yediko ya toshekele kama shatu. Ndi akadikitsha lu luudu la lʼUkunda a Lebanona.

¹⁷ Khumʼekanga akatshi kiti ka wuki kʼewanga ka diulelu, akakikumbi la paunyi ka pudipudi.

¹⁸ Kiti kako kaki la adelu asamalu la ntundu kato, ndu kihuma ka paunyi kakamamanyi la kiti ka diulelu, anya ahendi lʼumamu wʼedjaselu, la difanelu dia tambwe pendi lasuki lʼanya.

¹⁹ Difanelu dia tambwe dikumi la pendi diaki lu wedi ehendi wa adelu ako asamalu, hyendi hyendi lu edelu la edelu. Nduku kiti ka wuhu oso kakiko lu waulelu tshe.

²⁰ Akoho tshe wa Solomona waki wa paunyi. Alonga tshe waki lu luudu la lʼUkunda a Lebanona waki wa paunyi ka pudipudi. Nduku otoi waki wa fesa; ne dia lu nshi ya Solomona fesa yaki uku engo kʼanyanya.

²¹ Khumʼekanga aki la mashua wakatshokaka la Tarashishi la ekambi wa Hurama. Mashua wa Tarashishi wakayakaka etena otoi lʼatei a deku satu, wakelaka paunyi, fesa, ewanga, kema, la ekungo.

²² Khumʼekanga Solomona akaleki khumi ya dikanga tshe ya la kete lu ongonyi la lu yimba.

²³ Khumi ya dikanga tshe ya la kete wakayangaka mena Solomona dia mbuka yimba yakawusha Unyashungu.

²⁴ Ku vo tshe untu lʼuntu akelaka ulambu andi, diango dia fesa, diango dia paunyi, eloto, dihumo, diango diʼepumu, falasa la punda. Osoku mbakawatshaka lu eleku lʼeleku.

²⁵ Solomona aki la ahuli nunu nei wa nkitshaka falasa la pusupusu ya ta, la ambahemi wa falasa nunu dikumi la pendi wakandakitsha lu esumba wa pusupusu ya ta ndu la Jerusalema, lasuki la khumʼekanga.

²⁶ Ndi akulela khumi ya dikanga tshe uma lu Eyufarate, pulu ndu lu kete yʼasi Filistiya, edja ndu lʼulelu wʼEdjibitu.

²⁷ Khumʼekanga akete fesa anyanya uku ave la Jerusalema ndu etamba wʼesasi uku etamba wa khumu vatulaka lʼukidi efula efula.

²⁸ Vo wakatosela Solomona falasa uma lʼEdjibitu ndu uma lu kete tshe.

Nyoi ka Solomona

²⁹ Undi, ditshelu dikina dia Solomona dia ntundu ndu dia lʼokongo, hadiufundami lu aui wʼumvutshi Natana, aui wʼumvutshi Ahidja, usi Shilo, ndu lu waenelo wa Ido, omenyi wʼakambu wahatayi lu dikambu dia Jeroboama, onʼa Nebate?

³⁰ Solomona akulela Isariyele tshe lu Jerusalema deku akumi anei.

³¹ Solomona akayeli washi; wakukhunde lʼusumba wa Davidi, shi. Ku onʼandi Rehoboama akulela lu dihuli diandi.