2 Ekondo 7 - La Bible en Otetela (Bible K'Ekila) 1991

¹ Lamʼakashidiya Solomona nomba, dja yakahulo uma lʼulungu, yakatshumbi ulambu wa lutshumba la elambu. Lutumbu la Latuyalaka lakaluli lu luudu.

² Elombedi kumbeya mboto lu luudu la Latuyalaka, ne dia lutumbu la Latuyalaka lakaluli lu luudu landi.

³ Asi Isariyele tshe wakenyi lamʼakahulo dja ndu lamʼakayala lutumbu la Latuyalaka ladiku dia luudu; wakakolama, wakatemola Latuyalaka. Vo wakawuki lusaka vati: Ndi eli ololo ne dia ngandji kandi ka mamba katutshikalaka pundju.

⁴ Khumʼekanga la antu tshe wakalambula elambu la ntundu ka Latuyalaka.

⁵ Khumʼekanga Solomona akalambula ngombe nunu akumi ahendi la pendi, la ekoko nunu lukama la akumi ahendi. Osoku mbakakidia khumʼekanga la wudja tshe luudu la Unyashungu.

⁶ Elombedi wakemala lu ahuli awo wʼelimu ndu asi Lewi kame la dihumahuma diakatatshi khumʼekanga Davidi dia nemiaka la mbukaka Latuyalaka lusaka. Davidi akawasha okende dia vo nemiaka Latuyalaka. Ku vo wakataka vati: Ngandji kandi ka mamba katutshikalaka pundju. Elombedi wakadaka amama la ntundu kawo, ku Isariyele tshe wakemalaka.

⁷ Solomona akakidia ndu seke dia lʼatei diaki la ntundu ka luudu la Latuyalaka. Ndi akalambula elambu wa lutshumba la wata wʼelambu wa ki laawo, ne dia ediakelu kʼohotela kakatshi Solomona kunkuka nambula ulambu wa lutshumba, ulambu wa shima la wa wata.

⁸ Solomona akalemia lushi la wuki nshi esambeli, etena kako. Isariyele tshe waki kame la ndi. Vo wakayi ului a wuki wʼantu umaka eotwelo ka la Hamata pulu ndu la kyoko ya Edjibitu.

⁹ Lu lushi lʼenanei, vo wakayala la lusanganya la lukumu; ne dia vo wakatshi ekidielu kʼediakelu nshi esambeli, la nemia lushi la wuki nshi esambeli.

¹⁰ Lu lushi lʼakumi ahendi la asatu lu ngondo kʼesambeli, mbakadianganya Solomona antu utsha la wakawo wuludi too lʼongenongeno, ne dia ololo wakatshelaka Latuyalaka Davidi, Solomona la wudja andi Isariyele.

Daka dia Latuyalaka le Solomona

¹¹ Okone Solomona akashidiya luudu la Latuyalaka ndu luudu la khumʼekanga. Solomona akaluwanya kene tshe kakandasanguya ntsha lu luudu la Latuyalaka ndu lu luudu landi.

¹² Latuyalaka akene le Solomona lʼutshu; akav, urela ati: Dimi lakuki dombelo diaye. Dimi lambosonola dihuli ne uku luudu la vo nambulakami elambu.

¹³ Lamʼayumudiha ulungu diaha mvula ndo, kana ntuma endjo dia nanya wudja, ndu lamʼayumutuma asui lʼatei a wudja ami,

¹⁴ naka wudja ami watetamaka lukumbu lami wayuyakitshakitsha, wayolomba, wayuyanga elundji kami, ndu wayukadimo uma lu mbuka yawo ya kolo, ku dimi layuwaukela uma lʼulungu. Dimi layuwadimanyia kolo kawo, ndu layokonoya kete yawo.

¹⁵ Ashu ami wayendaka dihuli ne, atui ami wayukaka dombelo diayuwolombaka lu dihuli ne.

¹⁶ Kakiane, lambosonola luudu lone ndu lambulukidia dia lukumbu lami ndjalaka loko pundju. Ashu ami la utema ami wayuyala loko pundju.

¹⁷ Naka ndu we ayokendakendaka la ntundu kami uku akakendakendaka sho Davidi, dia ntsha akambu tshe wamumukutela, dia nama adjangu ami la elembe ami,

¹⁸ ku dimi layushikike kiti ka diulelu diaye uku akamalaki sho Davidi nti: We hahumbaki ukito pundju dia mbulela Isariyele.

¹⁹ Keli naka nyu nyayukadimo, naka nyu nyayoseka adjangu ami la elembe ami wakamanyudjela, naka nyayutsho le ditemolatemola dia ditemola,

²⁰ ku aimi layunyunya uma lu kete yakamanyusha, ndu luudu lone lakamakidia dikambu dia lukumbu lami, ku layulete yukedi la engo ka dionyo lʼatei a wedja tshe.

²¹ Untu tshe layetaka lasuki la luudu lone leli la nemo, ayukashimo; ayumbula ati: Dikambu kuna diakatshela Latuyalaka kete nye la luudu lone okone?

²² Ku wayukaluya diui vati: Ne dia vo wakeseke Latuyalaka, Unyashungu a washewo, lakatundja uma lu kete ya Edjibitu, ne dia vo wakekama ditemolatemola, wakadikhusela adui, la wakaditemola. Diako mbakandatumela asui ane tshe.