2 Ekondo 6 - La Bible en Otetela (Bible K'Ekila) 1991

Ekidielu kʼEtemwelo

¹ Solomona akati ati: Latuyalaka akati ati: Dimi nangaka mbidjase lu udjima a tshududu.

² Dimi lambukuhikela luudu, edjaselu kaye; dihuli diayuyudjase pundju!

³ Khumʼekanga akakadimo, akatshokola ului tshe wʼIsariyele, ku ului tshe wakemala.

⁴ Ndi akati ati: Latuyalaka, Unyashungu wa Isariyele lakateketa la papa Davidi, atumbwami! La wulu andi mbakandashidiya daka diakandalaki ati:

⁵ Umaka lushi lakamatundja wudja ami uma lu kete ya Edjibitu, dimi konsonola nduku usumba lʼatei a wedja tshe wʼIsariyele dia mpika luudu lami dia lukumbu lami ndjala loko, ndu dimi konsonola untu dia ndjala uwandji a wudja ami Isariyele.

⁶ Keli dimi lakasonola Jerusalema dia lukumbu lami ndjala loko, ndu lakayosonola Davidi dia ndi mbulela wudja ami Isariyele.

⁷ Nyulungi, papa Davidi aki la saki ka mpikela Latuyalaka, Unyashungu wa Isariyele, luudu.

⁸ Keli Latuyalaka akawutela ati: We akatshi ololo lamʼakayayala la saki ka mpikela lukumbu lami luudu,

⁹ dikambu otoi, weme huhika luudu lako. Keli onʼaye lakayuti uma lʼutema aye, kayuhikela lukumbu lami luudu.

¹⁰ Latuyalaka akashidiya diui diakandati, ne dia dimi lambukita papa Davidi, lambudjase lu kiti ka diulelu kʼIsariyele uku akati Latuyalaka ntundu, ndu dimi lambuhikela lukumbu la Latuyalaka, Unyashungu wa Isariyele, luudu.

¹¹ Dimi lakakitsha oshete lonʼeli sheki ya Latuyalaka loko, sheki yakandadji lʼasi Isariyele.

¹² Solomona akemala ntundu kʼediakelu ka Latuyalaka, la ntundu kʼului tshe wʼIsariyele, akeme anya utsha lʼulungu.

¹³ Ne dia Solomona akatshi loyenga lʼohotela, utaii alo kubita tshanu, wuki alo kubita tshanu la wemema alo kubita shatu, akatulukitsha kʼatei a lukumbu la seke. Ndi akambela ladiku dialo, ku ndi akakhuse adui la ntundu kʼului tshe wʼIsariyele, akeme anya utsha lʼulungu.

¹⁴ Akalombe ati: We Latuyalaka, Unyashungu wa Isariyele. Nduku Unyashungu weko uku we, lʼulungu kana la kete. We atulamaka daka la ngandji ka mamba le ekambi aye watokendakendaka la ntundu kaye lʼetema tshe.

¹⁵ We akalamela ukambi aye, papa Davidi, daka diakayulaki lʼunyo, we ambudishidiya elo la wulu aye.

¹⁶ We Latuyalaka, Unyashungu wa Isariyele, ulamaki daka diakayalaki ukambi aye, papa Davidi, wati: Naka anʼaye wayuyakimela ndu wayokendakendaka la ntundu kami uku akayakendakendaka, we hahumbaki ukito wa mbidjase lu kiti ka diulelu diʼIsariyele la ntundu kami pundju.

¹⁷ Kakiane, we Latuyalaka, Unyashungu wa Isariyele, diui diakayatatedi ukambi aye Davidi diashidiyami!

¹⁸ Mete, we Unyashungu ayetawo mbidjase lʼuntu la kete? Enda, ulungu la ulungu weli ladiku diʼulungu hawukuki le ye, keti luudu lone lamumuhika!

¹⁹ Latuyalaka, Unyashungu li, uki dombelo diami dimi ukambi aye, la osengasengo ami. Uhukami delu diami la dombelo diami diamumukolomba.

²⁰ Ashu aye wendaki luudu lone ndu la yanyi ndu lʼutshu, dihuli diakayati wati: Leko kayuyala lukumbu lami. Uki dombelo diamumukolomba lu dihuli ne, dimi ukambi aye.

²¹ Ketawoki esengosengo ami, dimi ukambi aye, ndu wa wudja aye Isariyele. Lamʼayutukolomba lu dihuli ne, kulungaki lʼedjaselu kaye lʼulungu, kukaki, kutudimanyiaki.

²² Naka untu ambutshela unyandi kolo ku vo wambutshibia, ku ndi ambuyutshiba la ntundu kʼediakelu kaye lu luudu lone,

²³ kuwukeli lʼulungu, kutshi, kusambuli ekambi aye. Kudji one leli la unungu mananu; kahe kolo kandi lʼote andi. Kuyindja one laha la unungu; kutsheli uku ololo andi.

²⁴ Lamʼayolembiama wudja aye Isariyele le atunyi ne dia vo wakakutshela kolo, naka vo wambukadimo le ye ndu wambolemia lukumbu laye, wambukolomba ndu wambukosengasenga lu luudu lone,

²⁵ kuwaukeli lʼulungu. Kudimanyia wudja aye Isariyele kolo kawo, kakaluya ntu lu kete yakayawasha, vo la washewo.

²⁶ Lamʼayudihama ulungu diaha mvula ndo ne dia kolo kakawakutshela, naka vo wayolomba lu dihuli ne, wayolemia lukumbu laye ndu vayukadimo uma lu kolo yawo lamʼayuyâsuya,

²⁷ kuwaukeli lʼulungu. Kudimanyia ekambi aye, wudja aye wʼIsariyele kolo kawo. Kuwaetsha mbuka kʼololo kayuwuhumba nkendakenda, kolosha mvula lu kete yakayasha wudja aye ukito.

²⁸ Lamʼayuyala ndjala ka kasha, sui dia wulu, elanyelu ka mbu ya nde, endjo kana eto, ndu lamʼayuwadinga utunyi lu esumba awo kana wehu tshe wʼasui kana kandji,

²⁹ naka untu otoi, kana wudja aye Isariyele tshe, leya sui diʼutema andi kana okei andi ambeme anya uya lu luudu lone lu dombelo,

³⁰ kuwaukeli lʼulungu uma lu dihuli diudjashiye, kadimanyia. Kutsheli untu lʼuntu uku etsha andi, ne dia we kalimbitela utema andi. (Ne dia we weme kalimbitela etema wʼantu tshe;)

³¹ ku vo wayukukaka woma, wayokendakendaka lu mbuka yaye nshi tshe yayuwudjaseka lu kete yakayasha washesu.

³² Naka ongendangenda waha usi Isariyele ayuya uma lu kete yʼetali dikambu dia lukumbu laye la wuki, lunya laye la wulu ndu lunya laye lushimbwi, lamʼayunduva dia ndjolomba lu luudu lone,

³³ kuwukeli lʼulungu lu dihuli diudjashiye. Kutshaki akambu tshe wambukolomba ongendangenda ako, dia wedja tshe wa la kete mbeya lukumbu laye la nkukaka woma uku wudja aye Isariyele, la dia vo mbeya vati: Watetaka luudu lone lakamahiki lukumbu laye.

³⁴ Lamʼayutsho wudja aye dia ntolosha atunyi lu mbuka tshe kayuyatuma, naka vo wayukolomba, we Latuyalaka, weledi uya lʼusumba one wakayasonola, ndu uya lu luudu lone lakamahikela lukumbu laye,

³⁵ kuki dombelo diawo la osengasengo awo lʼulungu, kuwakimanyia.

³⁶ Naka vo wambukutshela kolo (ne dia nduku untu eko lahatshaka kolo), ku we ambuwauka kele, ambakuno lʼanya wʼutunyi dia ndi mbatola fumbi lu kete yʼetali kana ya la suki;

³⁷ naka vo wambutukana yimba lu kete yakawatolama fumbi, ndu wambukadimula etema Wambukosengsenga lu kete ya waku wakatole fumbi vati: Shu takatshi kolo, takayala la uhedia, takanganela.

³⁸ Naka vo wambukaluia le ye lʼetema awo tshe ndu la nyumu yawo tshe lu kete yʼatunyi wakatole fumbi, naka vo wambukolomba weledi uya lu kete yakayasha washewo, uya lʼusumba wakayasonola, la uya lu luudu lakamahikela lukumbu laye,

³⁹ kuki dombelo diawo la osengasengo awo lʼulungu, lu dihuli diudjashiye. Kuwakimanyia; kudimanyia wudja aye kolo yakawakutshela!

⁴⁰ Kakiane, we Unyashungu ami, ashu aye wendi, la atui aye wuki dombelo diamumukolomba lu dihuli ne.

⁴¹ Kakiane, we Unyashungu, Latuyalaka, uneli, uyi lu dihuli diaye dia mumuya, we la oshete a wulu aye. Unyashungu, Latuyalaka li, elombedi aye walotshami la panda, ekilami aye wangenengene lu ongenongeno aye.

⁴² We Unyashungu, Latuyalaka, tukadimulaki elundji kaye uma le mi, dimi ukitami aye wʼiso. Uhoki ngandji kaye ka mamba le ukambi aye Davidi.