2 Ekondo 4 - La Bible en Otetela (Bible K'Ekila) 1991

Diango dia lu Etemwelo

¹ Solomona akatshi ediakelu kʼohotela; utali ato kubita akumi ahendi, wekeki ato kubita akumi ahendi, la wemema ato kubita dikumi.

² Ndi akatshi puki ka wuki ka lolelola kʼutshimbedi. Wuki ato waki kubita dikumi, ohongo ato kubita tshanu, utshimbedi ato akedikama la okodi wa kubita akumi asatu.

³ Difanelu dia ngombe diakakidingi lʼesi unyo ato: dikumi dikumi lu kubita la kubita lʼutshimba ato tshe; ngombe yakakitshama lu enongo ehendi, yakalelwama kame lato.

⁴ Wakahe puki kako ladiku dia difanelu dia ngombe dikumi la pendi: satu diakelela utsha la ngelʼa kushi, satu utsha lʼedjelu, satu utsha la diku dia kushi la satu utsha lʼehutwelu ka unya. Ekongo wa difanelu dia ngombe waki tshe utsha lʼatei.

⁵ Keka ka puki kako kaki yediko ya wuki wʼetambi. Unyo ato akafani la unyo wa dikoho, ndu akatshama la difanelu diʼalembo loko. To kakotoka ashi yediko ya bata nunu satu.

⁶ Ndi akatshi alonga dikumi: akakitsha atanu lu lunya la pami, atanu lu lunya la lomoso. Lu alonga ako kakawasulaka diango diʼelambu wa lutshumba. Keli ulimu a puki ka wuki aki paka dia elombedi mbokaka.

⁷ Ndi akatshi dikitshelu diʼatala dia paunyi dikumi uku didjangu. Ndi akadikitsha lʼetemwelo tanu lu lunya la lu pami, tanu lu lunya la lomoso.

⁸ Ndi akatshi ndu mesa; dikumi, akekitsha lʼetemwelo, etanu lu lunya la lu pami la etanu lu lunya la lomoso. Ndi akatshi alonga wa paunyi lukama.

⁹ Ndi akatshi lukumbu la seke diʼelombedi, ndu lukumbu la seke dia wuki kame la kuki yawo, ndu akayikumbi lʼohotela.

¹⁰ Ndi akakitsha puki ka wuki lu lunya la lu pami lu leke la diku dia kushi utsha lʼehutwelu.

¹¹ Hurama akatshi puki, kasu la alonga. Osoku mbakashidiya Hurama ulimu wakesengola khumʼekanga Solomona dikambu dia luudu la Unyashungu:

¹² dikoho pendi, dikata, ete ehendi waki ladiku dia dikoho; kala hyendi ya nkumba dikata pendi diʼete waki ladiku dia dikoho;

¹³ difanelu dia dikomi diʼetamba kama nyei, dikambu dia kala yako hyendi; enongo ehendi wa difanelu dia dikomi diʼetamba lu lukala la lukala, dia nkumba dikata pendi diʼete ladiku dia dikoho.

¹⁴ Ndi akatshi dikitshelu la alonga wʼafuku ladiku diako;

¹⁵ puki ka wuki la difanelu dia ngombe dikumi la hyendi la tshina diato;

¹⁶ puki, kasu la somo. Diango diʼulimu so tshe diakatshela Hurama-Abi khumʼekanga Solomona dikamnu dia luudu la Latuyalaka, diaki diʼohole a wa ngaingai.

¹⁷ Khumʼekanga akelelolaka lʼukidi wa Jorodana lu kete yʼomoma, lʼasa Sukota la Zereda.

¹⁸ Solomona akatshi diango so tshe efula kaheyama, mbakiwo kumbeya mbedika wutshu wʼohotela.

¹⁹ Solomona akatshi diango diʼulimu tshe diaki lu luudu la Unyashungu, ndu ediakelu ka paunyi, la mesa wakawakitshaka ma dia Eyalelu.

²⁰ Dikitshelu diʼatala la atala adio dia paunyi ka pudipudi dia mpetaka uku didjangu la ntundu ka luudu lʼekila;

²¹ alembo, atala, la tosholo ta paunyi kuleki pudipudi;

²² tosholo ta nyimaka atala, alonga wʼafuku, akoho la pusu ya paunyi ya minyaka akalanga wa dja, kuki ya la suku dia lʼetei a luudu luleki ekila, ndu kuki ya la suku diʼetemwelo yaki paunyi.