2 Ekondo 23 - La Bible en Otetela (Bible K'Ekila) 1991

¹ Lʼeleku kʼesambeli, Jehoyada akayakikitsha la dihunga. Ndi akadji la elombodi wʼalimbi wa kama kama, Azariya, onʼa Jerohama, Ishamele, onʼa Jehohanana, Azariya, onʼa Obede, Maseya, onʼa Adaya, la Elishafata, onʼa Zikiri, sheki.

² Vo wakakindula lu Juda, wakasanganya asi Lewi uma lʼesumba tshe wa Juda, la ete wa khumbu ya Isariyele, ku vo wakayi la Jerusalema.

³ Ului tshe wakadji la khumʼekanga sheki lu luudu la Unyashungu. Jehoyada akawatela ati: Nyulungi, onʼa khumʼekanga ayulela, ukuakati Latuyalaka lu dikambu diʼana apami wa Davidi.

⁴ Kanyutshi okone: etenyi ka satu kanyu, nyu elombedi ia asi Lewi, watutshaka ulimu lushi la mumuya, kanyulamaki asuku.

⁵ Etenyi ka satu kemotshi, kawulamaki luudu la Khumʼekanga. La etenyi ka satu kekina, kawulamaki suku diʼeotwelo ka falasa. Ku wudja tshe kawuyali lu aseke wa la luudu la Latuyalaka.

⁶ Untu totoki lu luudu la Latuyalaka, tshikima elombedi la asi Lewi watutshaka ulimu. Vo mbayoto, ne dia vo weko ekila. Kawulamaki olembe wa Latuyalaka.

⁷ Asi Lewi kawudingi khumʼekanga lu beke tshe, untu lʼuntu la dihumo lu anya. Ku untu tshe layoto, kawudiaki. Kanyuyalaki lasuki la khumʼekanga lamʼayundutumbaka ndu lamʼayundotoka.

⁸ Okone asi Lewi la asi Juda tshe wakatshi aui tshe wakawatela olombedi Jehoyada. Ku vo tshe untu lʼuntu akose antu andi: wane wakotoka dia ntsha ulimu la wane wakatumbaka uma lʼulimu lushi la mumuya, ne dia olombedi Jehoyada kunsambwela nduku ului.

⁹ Olombedi Jehoyada akasha elombodi wʼantu kama kama akonga, la dingawu dia waki, ndu dia tutshitshe, diaki khumʼekanga Davidi, diakatanema lu luudu la Unyashungu.

¹⁰ Ndi akadingia khumʼekanga lʼantu kwi, untu lʼuntu la dihumo lʼanya, uma lu tshuku dia lunya la lu pami pulu ndu tshuku dia lunya la lomoso, lasuki lʼediakelu ndu la luudu.

¹¹ Ku vo wakatundja onʼa khumʼekanga, wakulembe dembo dia kusu, wake otsha wanyu a koi, wakawudji khumʼekanga. Jehoyada la anʼandi wʼapami wakukiti iso; wakati vati: Khumʼekanga alumbi!

¹² Lamʼakuki Ataliya lundju lʼantu walawolawo, wandula khumʼekanga, ndi akayi la luudu la Latuyalaka le antu.

¹³ Ndi akendi, enyi ku khumʼekanga one eli ladiku dia loyenga landi lʼeotwelo; ndu elombodi wʼantu la amvudi wʼamama weli lasuki la khumʼekanga. Antu tshe wa lu wudja waki la ongenongeno, wada amama. Amimbi wakalombolaka antu lu esambu wa diandu lu dihumahuma diawo. Ataliya akatshatsha ahondo andi; akaleli ati: Fyungi, fyungi!

¹⁴ Olombedi Jehoyada aketi elombodi wʼantu kama kama, wakalombolaka ului wʼalimbi, akawatela ati: Nyutundja lʼandja wʼenongo, kawudiaki untu tshe tayuyela ia yombo. Ne dia olombedi akati ati: Tanyudiakaki lu luudu la Latuyalaka.

¹⁵ Ndi akatshu utsha la luudu la khumʼekanga, aketi lu suku diʼeotwelo ka falasa. Ku wakatudiaka leko.

¹⁶ Jehoyada akadji lʼantu tshe ndu la khumʼekanga sheki ya vo ndjala wudja wa Latuyalaka.

¹⁷ Wudja tshe wakoto lu luudu la Bala, wakalulanya; wakahandjula diakelu dialo la difanyelu dialo, wakadiaki Matana, olombedi wa Bala la ntundu ka diakelu.

¹⁸ Jehoyada akasonola alami wa luudu la Latuyalaka dia vo ndjala la tshina diʼelombwelo kʼelombedi wʼasi Lewi, wakasha Davidi okende wa lu luudu la Latuyalaka, dia nambulaka Latuyalaka elambu wa lutshumba la ongenongeno la esambu, uku akafundama lu elembe wa Mose, uku akadjanga Davidi.

¹⁹ Ndi akakitsha alami lu asuku wa luudu la Latuyalaka diaha untu tshe lakasanyi la engo kemotshi ka mindu mboto.

²⁰ Ndi aketi elombodi wʼantu kama kama, antu wa lukumu, embuledi a wudja, la asi wudja tshe. Ku vo wakayi la khumʼekanga uma la luudu la Latuyalaka, waketi la ndi uma lʼeotwelo ka ladiku uya lu luudu la khumʼekanga, wakayuwudjasha lu kiti ka diulelu.

²¹ Asi wudja tshe wakangenangena; usumba wakayala ki uma lamʼakawadiaki Ataliya la yombo.