2 Ekondo 16 - La Bible en Otetela (Bible K'Ekila) 1991

Asa Ambudja la Bene-Hadada Sheki

¹ Lʼeleku kʼakumi asatu lʼasamalu ka diulelu dia Asa, Basha, khumʼekanga ka isariyele, akatshu dia ntolosha Juda. Ndi akatuhika Rama dia nshimba antu ntumba uma le khumʼekanga Asa kana mboto le ndi.

² Asa akatundja fesa la paunyi uma lu waumbelu wa lu luudu la Latuyalaka, ndu wa lu luudu la khumʼekanga. Ndi akayitumela Bene-Hadada, khumʼekanga ka Suriya, lakadjashi la Damaseke ati:

³ Yaka tudji sheki, uku akadji papa la sho. Enda, dimi lambukutumela fesa la paunyi. Utshu, utulanya sheki yakayadji la Basha, khumʼekanga ka Isariyele, mbayundumpiko.

⁴ Bene-Hadada akukela khumʼekanga Asa. Ndi akatumi elombodi wʼelui andi wʼalimbi dia ntolosha esumba wʼIsariyele. Vo wakatolembia Idjona, Dane, Abele-Mayima, la esumba tshe wʼaumbelu wa la Nafetali.

⁵ Lamʼakuki Basha lukumu lako, ndi akakimo mpika Rama, akatshiki elimu andi.

⁶ Ku khumʼekanga Asa akatshu ndi la asi Juda tshe, wakatemba ave la etamba wakatshaka Basha ulimu wa mpika Rama. Ndi akayutsha la wo ulimu wa mpika Ngeba la Mizipa.

⁷ Lʼetena kako Hanani, omenyi wʼakambu wahatayi, akatshu le Asa, khumʼekanga ka Juda; akatuwutela ati: Enda, we akekama khumʼekanga ka Suriya, kombekama Latuyalaka, Unyashungu aye. Diako mbakahandi ului wʼalimbi wa Suriya uma lʼanya aye.

⁸ Undi, asi Etiyopiya la asi Libiya tawaki ului a wuki wʼalimbi kame la pusupusu ya ta la ambahemi wa falasa efula efula uka? Keli lʼetena kako Latuyalaka akakimo lʼanya aye, ne dia we akawekama.

⁹ Latuyalaka atukaka ashu andi lu kete tshe, dia nsukela waku weli la etema tshe le ndi. We akatshi uku enginya lu dikambu ne, ku umaka kakiane we ayuyalaka la ata.

¹⁰ Ku Asa akumalela omenyi wʼakambu wahatayi, akawudji lu lukanu, ne dia ndi akawuki kele efula lu dikambu so. Asa akasuya ndu antu amotshi uma lu wudja lʼetena kako.

¹¹ Enda, etsha wa Asa, wa ntundu ndu wa lʼokongo, wambufundama lu Buku dia Khumi ya dikanga ya Juda la ya Isariyele.

¹² Asa akayala la kandji lu akaka lu eleku kʼakumi asatu la divwa ka diulelu diandi. Kandji kako kakuheki wulu. Kuyanga mbakindi la kandji, ndi kunyanga Latuyalaka, akayangi paka wetshi.

¹³ Asa akayeli washi, akavu lu eleku kʼakumi anei lʼotoi ka diulelu diandi.

¹⁴ Vo wakakhunde lu wuku andi wa diumbu, wakandatayatshimedi lʼusumba wa Davidi. Wakawetamia lu tangi kakawalenge la diango diʼepumu la malashi wakawalongosola, uku atolongosolaka elongosodi wa malashi, ndu wakatshumbi efula efula dia mbolemia.