1 Timote 3 - La Bible en Otetela (Bible K'Ekila) 1991

Wetshelu le Amendji lʼEkelizia

¹ Diui dia kolamelu ne nti: Naka untu ambuyanga ulimu wʼumendji wa lu ekelizia, ndi ambulanga ulimu wʼololo.

² Okone umendji tayalaki la unungu. Ndi ayali kanga wadi otoi utu; ayakimeli, ayali la wolamu, la okomi. Ndi atshelaki angendangenda ololo; ayali la yimba ya mbetsha.

³ Tayaiaki kanga lundju kana okomwanyi, keli ayali la memakana; tayalaki la tamu, tayalaki unangi wa falanga.

⁴ Ndi alombole luudu landi ololo, ayali la anʼandi waknanyia diui diandi la kenemo tshe.

⁵ Naka untu heyi nombola wa lu luudu landi, wuhu akona wayundulama ekelizia ka Unyashungu?

⁶ Tayalaki untu uyuyu, ne dia ndi atukuyuyambiya, ku ndi ndjoko lu dianyelu dia uhimbanyi.

⁷ Ntu, dieli la ndi dia ndjala la lukumu lʼololo lʼatei a wane weli lʼandja, ne dia ndi atukoko lu lukumu la kolo kana lu djunga ya uhimbanyi.

Wetshelu le Esambisha

⁸ Ndu esambisha pupu, wayali la kenemo; tawuyalaki la nimi hyendi, tawonokaki wanu efula, ta wokomiyaki ukundji wa kolo.

⁹ Wakimeli dikambu diushami dia mbetawo lu khumʼutema kʼololo.

¹⁰ Vo wahimbami ntundu, ku lʼokongo diku kanyuwaetawo dia vo ntsha ulimu uku esambisha, naka vo kema la unungu.

¹¹ Ndu amantu pupu, wayali la kenemo, aha atendanyi, keli wayakimeli, wayali la kolamelu lu akambu tshe.

¹² Esambisha wayali akanga a wadi otoi utu, walombole anʼawo ololo ndu wa lu mvudu yawo.

¹³ Ne dia wane watu-tshaka ulimu wʼusambisha ololo, wambu-yaosela dihuli diʼololo ndu dihunga dia wulu lu mbetawo keli le Kristu Jesu.

“Ekoho la Usuko wʼAkambu wa Mete”

¹⁴ Dimi lambukufundela akambu ane, lambulungamela ndja le ye kemʼedja.

¹⁵ Keli naka dimi layutshikala etenyi kʼutali, we ayeya ikainbu weli ololo antu ntsha lu luudu la Vnyashungu, leli ekelizia ka Unyashungu a lumu, ekoho la usuko wʼakambu wa mete.

¹⁶ Aha tamu, ne dia dikambu diushami dia otemwelo asu dieko wuki, ati: Unyashungu akenama lu cunha, Akayindjama le Nyuma, Akenama le andjelo, Akasambishama lʼatei a wedja, Aketawoma le wa la kete, Akalungwama utsha lʼulungu lu lutumbu.