1 Tesalonika 4 - La Bible en Otetela (Bible K'Ekila) 1991

Paulu Ambakokomiya Dia Vo Ndjala la Ekidiamelu

¹ Anyasu, diui diasu dia ndjihelu ne shati: Tambunyosengasenga ndu tambunyokokomiya le Khumadiondjo Jesu shati: Uku akatanyetsha lama nkendakenda, ndu lama ngenyangenya Unyashungu, uku watunyokendakendaka, dia nyu ntetemala nkendakenda wuhu ako,

² ne dia nvu mbeyaka wuhu wʼokende wakatanyusha uma le Khumadiondjo Jesu.

³ Ne dia dikambu ne, mbeli lulangu la Unyashungu, ekidiamelu kanyu: dia nyu ntuna munanyi.

⁴ Dia untu lʼuntu mbeya ndjakimela lu akambu wʼekidiamelu la wa kenemo,

⁵ aha la saki ka munanyi, uku asi wedja waheyi Unyashungu;

⁶ dia untu tanganelaki, la tatshelaki unyandi kolo lu dikambu ne: ne dia Khumadiondjo eko osomboyishi lu akambu ane tshe, uku akatanyewula, ndu akatanyutela ntundu.

⁷ Ne dia Unyashungu kunteta dia shu ntsha akambu wa mindu, keli dia shu ntsha akambu wʼekidiamelu.

⁸ Osoku one latuna diui ne, hatuni diui diʼuntu, keli ambutuna diui dia Unyashungu, latunyushaka Nyuma kʼOlolo kandi.

Nyukani Ngandji

⁹ Keli lu dikambu dia mbukana la anyanyu ngandji, nyu hanyuhumbi untu nyufundela, ne dia nyu nyame nyaketshama uma le Unyashungu dia mbukana ngandji.

¹⁰ Mete, nyu nyatutshelaka anyanyu wa la Makedoniya tshe wuhu ako. Anyasu, tambunyokokomiya dia nyu ntetemala mbukana ngandji;

¹¹ la dia nyu nyanga ndjala la ki, la dia untu lʼuntu ndjatshela akambu andi, la dia nkamba lʼanya andi, uku akatanyutela.

¹² Okone nyu nyayeya nkendakenda ololo lu ashu wʼantu wahatetawo, ndu hanyeya mpumba engo.

Eyelu ka Khumadiondjo, la Eulwelu ka Wavo

¹³ Anyasu, shu nangaka nyu mbeya dikambu dia wane wakavu, diaha nyu ndjala la lunyangu uku akina, wane waha la elungamelu.

¹⁴ Naka shu tambetawo shati: Jesu akavu ndu akulo, okone ndu wane wakavu kame la Jesu, Unyashungu ayuwaela kame la ndi.

¹⁵ Shu tambunyutela dia diui dia Khumadiondjo shati Shu wane weli la lumu, tayutshikala edja ndu lamʼayuya Khumadiondjo, hatutsho la ntundu ka wane wakavu.

¹⁶ Ne dia Khumadiondjo ndame ayuhulo uma lʼulungu, la dielu, la diui dia ondjelo a wuki, kame la pungi ka Unyashungu. Wane wakavu le Kristu, wayulo ntundu.

¹⁷ Ku shu wane weli la lumu, wutshikadi, tayosama kame la wo lu wangi, la ntusangana la Khumadiondjo lʼulungu. Osoku tayuyala pundju le Khumadiondjo.

¹⁸ Okone nyukikitshanya la aui ane.