1 Tesalonika 3 - La Bible en Otetela (Bible K'Ekila) 1991

Paulu Ambatumela Timote Dia Mbashikike la Mbakikitsha lu Mbetawo

¹ Okone lamʼakisu kumbeya mbikike ntu, shu takakani shati: Ndeka ololo shu ntshikala lʼAtena shame.

² Ku takatumi Timote, unyasu ukambi a Unyashungu lu lukumu lʼololo la Kristu, dia nyushikike, la dia nyukikitsha lu mbetawo kanyu.

³ Untu takananaki dia asui ane; ne dia nyame mbeyaka nyati: Shu takasonama lu dikambu ne.

⁴ Mete, lamʼakisu la nyu, shu takatanyutedi shati: Dieli la su dia nsuwa. Dikambu diako diakatshama uku weyanyu.

⁵ Dia dikambu ne, ndu dimi, lamʼakimi kumbeya mbikike, lakatumi Timote dia mbeya mbetawo kanyu. Dimi lakuki woma nti: Kana uhimbanyi akanyuhimbi, ku ulimu asu akayala anyanya.

Mbetawo Kawo Ambuyala Esambelu

⁶ Keli lamʼakakalula Timote uma le nyu, ndi akatela lukumu lʼololo la mbetawo kanyu la ngandji kanyu; ndu ad: Nyu nyatutuhoka, la nyakalangi ntena, uku akatalangi nyena.

⁷ Anyasu, dia dikambu ne, mbakatakikitshama le nyu lu lunyangu ndu lu asui asu tshe uma lu mbetawo kanyu.

⁸ Ne dia kakiane shu teko la lumu, naka nyu nyambushikimala le Khumadiondjo.

⁹ Lusaka lakona lanyukelasu Unyashungu ne dia ongenongeno tshe weli la su le nyu la ntundu ka Unyashungu asu?

¹⁰ Utshu la yanyi mbatutolombaka dia shu mena dundji dianyu, dia nduwanya akambu wutshikadi lu mbetawo kanyu.

Ambalombela Unyashungu

¹¹ Unyashungu asu Shesu ndame, la Khumesu Jesu, watolombole lu mbuka kasu utsha le nyu.

¹² Khumadiondjo anyuhamia, ndu anyuludia la ngandji untu la unyandi untu la unyandi, ndu le antu tshe, uku anyulangasu.

¹³ Okone ndi ashikike etema anyu waha la unungu lu akambu wʼekila la ntundu ka Unyashungu asu, Shesu, lu eyelu ka Khumesu Jesu la ekilami andi tshe.