1 Tesalonika 2 - La Bible en Otetela (Bible K'Ekila) 1991

Ulimu a Paulu lʼAtei wʼAsi Tesalonika

¹ Anyasu, nyame mbeyaka nyati: Eotwelo kasu le nyu taki anyanya.

² Keli lamʼakawatusuya ntundu, ndu lamʼakawatutsha sonyi la Filipi, uku weyanyu, shu takakikitala le Unyashungu asu, dia nyutela lukumu lʼololo la Unyashungu lʼatei wʼasui efula.

³ Ne dia daka diasu tadiaki munga, kuyanga kolo, kuyanga lukesu,

⁴ keli uku akatetawoma le Unyashungu dia shu mbekama lukumu lʼololo, uku watasu. Shu hatuyangi ngenyangenya antu, keli tatuyangaka ngenyangenya Unyashungu latedikaka etema asu.

⁵ Vo kuntutana tata aui wa diandu dia wandulandula, uku weyanyu, kuyanga la engo ka nkumba okomiya, Unyashungu keli omenyi.

⁶ Shu kunyanga lutumbu uma le antu, kana uma le nyu, kuyanga uma le akina, keli takeyi nyulela uku atumami wa Kristu.

⁷ Keli shu taki la memakana lʼatei anyu, uku atumbaka wali anʼandi.

⁸ Shu takaleki nyulanga, taki la ongenongeno, aha dia nyusha lukumu lʼololo la Unyashungu lutu, keli takalangi ndu nyusha nyumu yasu, ne dia nyakayala elangimi asu a wulu.

Ambuwauhula Dia Ulimu Andi lʼAtei Awo

⁹ Anyasu, nyu mbuhoka ulimu asu la pa kasu; shu takakambaka utshu la yanyi, dia shu tatukunyuyalela wutshu. Okone takanyusambishaka lukumu lʼololo la Unyashungu.

¹⁰ Nyu nyeko emenyi, ndu Unyashungu eko omenyi, uku akatatshaka akambu wʼekila, wʼololo ndu waha la unungu lʼatei anyu, nyu wane wetawo

¹¹ Nyu mbeyaka uku akatanvutshela untu lʼuntu, uku atutshelaka shi anʼandi. Shu takanyosengasengaka, takakikitshaka etema anyu, takanyutelaka diui,

¹² dia nyu nkendakenda uku alanga Unyashungu, latunyetaka lu diulelu diandi la lu lutumbu landi.

Paulu Ambuka Unyashungu Lusaka ne Dia Kolamelu Yawo lu Asui

¹³ Dia dikambu ne, mbatutukaka Unyashungu lusaka aha mpeko. Ne dia lamʼakanyalungula diui dia Unyashungu diakatanyutela, nyu kudietawo uku diui diʼantu, keli nyakadietawo uku diui dia mete, diatukambaka lʼetema anyu, nyu wane wetawo.

¹⁴ Anyasu, nyu nyakukuya ekelizia wa Unyashungu wa la Judiya weli le Kristu Jesu, ne dia ndu nvu nyakasuyama pupu le asikanyu, uku akawasuyama le asi Juda.

¹⁵ Vo wakadiaki Khumadiondjo Jesu ndu amvutshi, wakatutshanya, hawongenyangenya Unyashungu; wambutshikitana la antu tshe.

¹⁶ Vo wambutusike dia shu mvutela asi wedja dia vo nshimbamela — dia vo ndudia yediko ya kolo yawo nshi tshe. Keli kele ka wulu ka Unyashungu kayali le wo lʼekumelu!

Saki ka Wulu ka Paulu ka Ntuwaenda

¹⁷ Anyasu, lu alimba kakatangana la nyu etenyi ka tshitshe, keli aha lu etema. Shu takatetemala la saki ka wulu dia menana la nyu;

¹⁸ ne dia shu takalangi ndja le nyu — keli dimi, Paulu, lakaleki nanga tena tshe — ku Satana akatushimbi.

¹⁹ Kakona keli elungamelu kasu, kana ongenongeno asu, kana dembo diasu dia kusu dia lutumbu? Aha nyu nyame mbeli osoku la ntundu kʼenelo ka Khumesu Jesu lu eyelu kandi uka?

²⁰ ne dia nyu nyeko lutumbu lasu la ongenongeno asu.