1 Tesalonika 1 - La Bible en Otetela (Bible K'Ekila) 1991

Wambatumela Moyo

¹ Paulu, la Silivano, la Timote, Le ekelizia ka la Tesalonika, weli le Unyashungu Shesu la le Khumadiondjo Jesu Kristu: Ngandji ka mamba la ki wayali la nyu!

Eluwanelu ka Lukumu lʼOlolo la Tesalonika

² Shu tatukaka Unyashungu lusaka nshi tshe dikambu dianyu tshe, tatunyudimulaka lu alombelo asu.

³ Tatuhoka ulimu anyu wa mbetawo, la ekambelu ka ngandji ndu eteti kʼelungamelu la ntundu ka Unyashungu le Khumesu Jesu Kristu.

⁴ Anyasu, elangimi a Unyashungu, shu mbeyaka esonamelu kanyu,

⁵ ne dia lukumu lʼololo lakayi le nyu, aha la diui tu, keli ndu lu wulu wa Nyuma kʼOlolo, ndu la mbetawo ka wulu. Nyu mbeyaka wuhu akona wʼantu wakatayaenyaka lʼatei anyu dia dikambu dianyu.

⁶ Nyu nyakatukuyaka, nyakukuyaka ndu Khumadiondjo, nyaketawo diui la asui efula, ndu la ongenongeno a Nyuma kʼOlolo.

⁷ Okone nyu nyakayala djimbitelu le wane tshe waketawo la Makedoniya ndu la Akaya.

⁸ Ne dia diui dia Khumadiondjo diakadiangana uma le nyu, aha paka la Makedoniya la Akaya etu, keli mbetawo kanyu le Unyashungu kambeyama lu ahuli tshe. Okone shu hatuhumbi mvuta nduku diui.

⁹ Ne dia vame watutelaka antu dikambu diasu, uku akatakumi le nyu, la uku akanyakadimo le Unyashungu uma le dikishi, dia ntemola Unyashungu a lumu, a mete;

¹⁰ la dia nkungela Onʼandi uma lʼulungu, lakandulula uma lu nyoi, Jesu ndame, lambutushimbela uma lu kele kayayi.