1 Samuele 8 - La Bible en Otetela (Bible K'Ekila) 1991

Isariyele Wambolomba Khumʼekanga

¹ Lamʼakayala Samuele usumbi, ndi akadji anʼandi wʼapami embadi lu Isariyele.

² Lukumbu la onʼandi lʼenundu laki Joele, la la ona la hendi laki Abidja. Vo waki embadi la Bere-Sheba.

³ Ana wa Samuele kundjela lukumbu la Shewo. Vo wakayala la saki kʼukundji. Vo waketawoka nungula mbu yʼutshu, wakafutanyaka sambu kʼololo.

⁴ Dihangamendi tshe dia Isariyele wakamote kame, wakatshu le Samuele la Rama.

⁵ Vo wakatuwutela vati: Enda, we aya usumbi, la anʼaye hawuyeli lukulu laye. Kakiane utosonwele khumʼekanga dia ndi ntulela, uku eli lu wedja tshe.

⁶ Samuele kongenangena lamʼakawolombe vati: Utusha khumʼekanga, dia ndi ntulela. Ku ndi akalombe Latuyalaka.

⁷ Latuyalaka akatela Samuele ati: Ulungi aui wa wudja lu dikambu ne diakutelawo. Vo hawukutuni we, dimi katunawo, diaha dimi ndjala khumʼekanga kawo.

⁸ Uku atuwuntshelaka umaka lushi lakamatundja uma lu Edjibitu edja ndu elo dia nsekakami, dia ntemolaka ditemolatemola. Osoku mbambuwukutshela ndu we.

⁹ Kakiane, etawo diui diawo. Keli utawaewudi, la uwalimbitshiya akambu wayutshaka khumʼekanga kayuwaulela.

¹⁰ Samuele akatela antu wakolombe khumʼekanga aui tshe wakawutela Latuyalaka.

¹¹ Ndi akawatela ati: Nyuki okone ayutshaka khumʼekanga kayunyulela. Ndi ayosaka anʼanyu wʼapami, ayuwadjaka lʼelimu wa mendaka pusupusu yandi la falasa yandi. Vo wayutalawoka la ntundu ka pusupusu yandi.

¹² Ndi ayuwadjaka tupita tʼantu kinunu kinunu, ndu tupita tʼantu akumi atanu atanu. Ndi ayudjaka akina lʼulimu wa nfusaka dikambo diandi la dia mbunelaka mbu ya nde, la dia mbutshelaka dihumo diandi dia ta, la diango dia pusupusu yandi.

¹³ Ndi ayosaka anʼanyu wʼamantu, ayuwaetaka atshi wa malashi, ekatshi, la afumbi wa mbu ya nde.

¹⁴ Ndi ayosaka tenyi diuleki amena, uma lu dikambo dianyu, uma lu dikambo dianyu dia vinyo, ndu dia mbeli. Ndi ayudishaka ekambi andi.

¹⁵ Ndi ayosaka etenyi ka dikumi kʼuma lu dinela dia mbu ya nde ndu kʼuma lu dinela dia dikambo dia vinyo. Ndi ayudishaka elohe andi la ekambi andi.

¹⁶ Ndi ayosaka ekambi anyu wʼapami ndu wʼamantu, ngombe yanyu yuleki amena la punda yanyu. Ndi ayuwakambiaka elimu andi.

¹⁷ Ndi ayosaka etenyi ka dikumi ka dungalunga dianyu, ndu nyu nyame nyayuyala ekambi andi.

¹⁸ Ku lʼetena keso, nyayulela dikambu dia khumʼekanga kako kayunyuyasonwela, keli Latuyalaka hunyukela.

¹⁹ Keli antu kumbuka aui wa Samuele, wakati vati: Kema, paka shu ndjala la khumʼekanga.

²⁰ Katuyali uku wedja tshe. Khumʼekanga kasu kasambulaki akambu asu. Ndi ketaki la ntundu kasu, katolombolaki lu ata asu.

²¹ Samuele akuki aui tshe wa wudja. Ku ndi akatasanyia Latuyalaka.

²² Latuyalaka akatela Samuele ati: Etawo aui awo. Asonwele khumʼekanga. Samuele akatela Isariyele ati: Nyu tshe untu lʼuntu atshu lʼusumba awo.