1 Samuele 7 - La Bible en Otetela (Bible K'Ekila) 1991

¹ Asi Kiriyate-Jarima wakatshu dia ntosa oshete wa Latuyalaka, wakayuwotshiya lu luudu la Abinadaba lu dikuna. Vo wakakidia onʼandi Eleazara, dia namaka oshete ako.

² Nshi efula yaketi uma lu lushi lakakumi oshete wʼekila uma la Kiriyate-Jarima. Vo wakatshikala leko yediko ya deku akumi ahendi. Khumbu tshe ka Isariyele wakalelelaka Latuyalaka.

Samuele Umbadi wa Isariyele

³ Samuele akatela khumbu tshe ka Isariyele ati: Naka la etema anyu tshe mbamunyukalula le Latuyalaka, nyunya ditemolatemola diʼasi wedja la WaAshetarota weli lʼatei anyu. Nyediya etema anyu le Latuyalaka, nyotemolaki ndi ndame. Ku ndi ayunyutshungula uma lʼanya wʼasi Filistiya.

⁴ Ku asi Isariyele wakanya WaBala, la WaAshetarota waki lʼatei awo, wakatemola Latuyalaka ndame.

⁵ Samuele akawatela ati: Nyusanganya Isariyele tshe la Mizipa, ku layunyolombela Latuyalaka.

⁶ Ku vo wakasangana la Mizipa, wakaduwula ashi, wakawatshula la ntundu ka Latuyalaka. Vo wakakile mbu ya nde lushi lako, wata vati: Shu takatshela Latuyalaka kolo! Ku Samuele akalaka akambu wʼasi Isariyele la Mizipa.

⁷ Asi Filistiya wakuki lukumu vati: Asi Isariyele wambusangana la Mizipa, ku ewandji wʼasi Filistiya wakayi dia ndjolosha asi Isariyele. Asi Isariyele wakuki asi Filistiya woma lamʼakawuki lukumu loso.

⁸ Ku vo wakatela Samuele vati: Tukimoki ntulelela le Latuyalaka, Unyashungu asu, dia ndi ntushimbela uma lʼanya wʼasi Filistiya.

⁹ Samuele akose yana yʼokoko yakalome, akayilambula ndu tshundu ulambu wa lutshumba le Latuyalaka. Ndi akalelela asi Isariyele le Latuyalaka. Ku Latuyalaka akawukela.

¹⁰ Etena kakalambulaka Samuele ulambu wa lutshumba, asi Filistiya wakasukana dia ndosha Isariyele. Latuyalaka akakhunguya dikhungula diandi wulu le asi Filistiya lushi lako, wakahandjula. Vo wakalembiama le asi Isariyele.

¹¹ Asi Isariyele wakunela uma la Mizipa, wakayelana la asi Filistiya, watadiaki edja ndu la tshina dia Bete-Kara.

¹² Samuele akose dive dimotshi, akadieme lasa Mizipa la Shene. Ndi akadiole ati: Ebene-Ezere (kitshimudi ati: Dive diʼekimanyelu). Ndi ikati ati: Latuyalaka ambutukimanyia edja ndu elo.

¹³ Okone vo wakalembia asi Filistiya, vo kunkalula ntu lu kete ya Isariyele. Lu nshi tshe ya lumu la Samuele lunya la Latuyalaka laki wulu le asi Filistiya.

¹⁴ Asi Filistiya wakakaluya asi Isariyele esumba awo wakawahotola, uma la Ekerona pulu ndu la Ngata. Vo wakose Kete yawo yaki lʼanya wʼasi Filistiya. Ki kakayala ndu lʼasa isariyele la asi Amora.

¹⁵ Samuele aki umbadi wa Isariyele nshi tshe ya lumu landi.

¹⁶ Ndi akatshimbaka lu eleku lʼeleku uma la Betele, Ngilingala, la Mizipa, atalumbuya akambu wʼasi Isariyele lu ahuli ako tshe.

¹⁷ Ndi akakalulaka la Rama, ne dia leko kaki lakandi. Ndi akalaka akambu wa Isariyele ndu leko. Ndi akahikela Latuyalaka ediakelu leko.