1 Samuele 6 - La Bible en Otetela (Bible K'Ekila) 1991

Asi Filistiya Wambukaluya Oshete wa Sheki

¹ Oshete wa Latuyalaka wakatshikala lu kete yʼasi Filistiya ngondo esambeli.

² Asi Filistiya waked ateketshishi wa djimu la asaki wa awulu, wakawambula vati: Nyututeli wuhu wa ntsha, dia shu nkaluya oshete one lu dihuli diawo.

³ Vo wakakaluya diui vati: Naka nyambukaluya oshete wa Unyashungu wa Isariyele, tanyukaluyaki hwe. Keli nyulambuli Unyashungu ulambu wʼefutelu ka ungungu; ku nyu nyayokono, ndu nyayeya dikambu kuna lunya landi kumumo uma ladiku dianyu.

⁴ Asi Filistiya wakawambula vati: Ulambu akona wayutulambula? Ku vo wakakaluya diui vati: Difanelu diʼatshutshu dia paunyi tanu, la dia dji tanu dia paunyi, uku efula kʼewandji wʼasi Filistiya, ne dia sui diako diami mbeli le nyu, nyu tshe ndu le ewandji anyu.

⁵ Nyutshi difanelu diʼatshutshu wukanyu, ndu difanelu dia dji diahenyahenya kete yanyu. Nyutumbuli Unyashungu wa Isariyele: undu lunya landi layumo wulu uma ladiku dianyu, ladiku dia ditemolatemola dianyu, ndu ladiku dia kete yanyu.

⁶ Okoko wana wakikitshanya etema anyu uku akakikitsha asi Edjibitu la Farayo? Undi, lamʼakandasuya, vo kunkimo asi Isariyele dia vo ntsho uka?

⁷ Kakiane nyutshi pusupusu kʼuyuyu, nyose ngombe hyendi yalomia anʼayo, yahatakelakama lokoho. Nyuyikeleki pusupusu, ku nyu mbotshiya anʼayo lu luudu.

⁸ Nyose oshete wa Latuyalaka, nyuwahe ladiku dia pusupusu. Nyudji diango dia paunyi diayunyukimo le Latuyalaka, dia ndjala efutelu ka unungu lʼoshete omotshi. Nyukitsha lasuki la oshete wa Latuyalaka. Lʼokongo diku, kanyukaluya, ku vo kawutshu.

⁹ Nyeso tuwendi: Naka vo wayeta lu mbuka keli lʼulelu utsha la Bete-Shemeshe, ku tayeya shati: Latuyalaka kambututshela kolo kene ka wuki. Naka kema, ku tayeya shati: Lunya landi kuntusuya. Dikambu diami mbutokendedi.

¹⁰ Vo wakatshi osoku. Wakose wali ehendi wa ngombe, wakekeleka pusupusu, wakadihi anʼawo lu luudu lawo.

¹¹ Wakahe oshete wa Latuyalaka ndu oshete waki la difanelu dia dji dia paunyi ndu difanelu diʼatshutshu wakawukaka ladiku dia pusupusu.

¹² Ku ngombe yakasimbo lu mbuka kʼutsha la Bete-Shemeshe; yakakolamela lu mbuka kako yatawana. Yo kombetola lu lunya la pami kana lu lunya la lomoso. Ewandji wʼasi Filistiya wakatatshokaka lʼokongo ayo pulu ndu lʼulelu wa Bete-Shemeshe.

¹³ Asi Bete-Shemeshe waki lu muna epunga lʼukidi; wakedia ashu, wenyi ku oshete wa Latuyalaka one wayayi. Lamʼakawawenyi, vo wakangenangena.

¹⁴ Ku pusupusu kakakumi lʼekambo ka Jashua, usi Bete-Shemeshe. To kakayemala lasuki la dive dia wuki. Ku untu wakati abaya wa pusupusu, wakalambula ngombe ulambu wa lutshumba le Latuyalaka.

¹⁵ Ku asi Lewi wakatundja oshete wa Latuyalaka uma lu pusupusu, ndu oshete ukina waki lʼumamu awo, waki la diango dia paunyi, wakawahe ladiku dia dive dia wuki. Lushi lako asi Bete-Shemeshe wakalambula Latuyalaka elambu wa lutshumba la elambu ekina.

¹⁶ Lamʼakenyi ewandji etanu wʼasi Filistiya dikambu so, vo wakakalula la Ekerona lushi lako.

¹⁷ Difanelu diʼatshutshu dia paunyi diakakimo asi Filistiya le Latuyalaka, dia ndjala ulambu wʼefutelu ka unungu diaki okone: kemotshi dikambu dia Ashidode, kemotshi dikambu dia Ngaza, kemotshi dikambu dia Ashikelona, kemotshi dikambu dia Ngate, la kekina dikambu dia Ekerona.

¹⁸ Difanelu dia dji dia paunyi diaki uku efula kʼesumba tshe wa ewandji etanu wʼasi Filistiya. Dio diaki uku efula kʼesumba wakadingami kumbu ndu ka ngelu yaki kundjala la kumbu. Dive dia wuki diako lene akawahe oshete wa Latuyalaka mbeli djimbitelu edja ndu elo lʼekambo ka Jashua usi Bete-Shemeshe.

¹⁹ Latuyalaka akasuya asi Bete-Shemeshe, ne dia vo wakendi lʼetei a oshete andi. Ndi akadiaki antu akumi esambeli lu wudja ako. Ku antu wakadi tukuku, wakaleli, ne dia Latuyalaka akasuya wulu, akadiaki efula.

²⁰ Asi Bete-Shemeshe wakambwana vati: Akona ayeya ntshikala la lumu la ntundu ka Latuyalaka, Unyashungu one wʼekila? Ndu utsha le na ayutsho oshete one dia vo ntumwela lasuki?

²¹ Vo wakatumi akendji le asi Kiriyate-Jarima dia ntuwatela vati: Asi Filistiya wambukaluya oshete wa Latuyalaka. Nyuyi esadi, nyutuwose leku.