1 Samuele 30 - La Bible en Otetela (Bible K'Ekila) 1991

Davidi Ambolembia Asi Amaleka

¹ Lamʼakakumi Davidi la alimbi andi lushi la satu la Zikilange, vo wakatani asi Amaleka wakayumba antu wa la Nengebe ndu la Zikilange. Vo wakalanya ndu wakatshumbi Zikilange.

² Lamʼakawashili munda amantu fumbi, la wane tshe waki loko, wa tshitshe ndu wa waki, vo wakakimela mbuka, wakatshu la wo vo tshe.

³ Davidi la alimbi andi wakakumi lʼusumba, watani ku usumba wakalungudi. Ku amantu, la anʼawo wʼapami la anʼa awo wʼamantu wakatolama lu fumbi.

⁴ Ku Davidi la antu waki la ndi wakatundo la alelu, wakaleli edja ndu lamʼakiwo kundjala la wulu ntu wa ndela.

⁵ Wadi ahendi wa Davidi, Ahinoama, usi Jezerele, la Abingayili, usi Karamele, wadi aki Nabala, wakatolama lu fumbi.

⁶ Davidi aki la sasi dia wulu, ne dia wudja andi wakati dia mbuka ave. Vo tshe untu lʼuntu aki la lunyangu lʼutema andi, lu dikambu dia anʼandi wʼapami la anʼandi wʼamantu. Davidi akayakikitsha, akekama le Latuyalaka, Unyashungu andi.

⁷ Ndi akatela olombedi Abiyatara, onʼa Ahimeleke, ati: Umbela ukutu wa nemo. Ku Abiyatara akawela ukutu ako.

⁸ Davidi akambula Latuyalaka ati: Ndjeli alimbi ane? layutuwanda? Latuyalaka akûkaluya diui ati: Yelana la wo, we ayutuwanda. Ku we ayutahotola diango tshe.

⁹ Ku Davidi akakimela mbuka, ndi la apami kama shamalu waki kame la ndi. Vo wakakumi lʼokedi wa Besore, lene akatemala wane wakatshikala lʼokongo.

¹⁰ Keli Davidi akakolamela mbayela, ndi la apami kama nyei. Apami kama hyendi wakemala, ne dia alimba awo wakakomo. Vo kumbeya nteho okedi wa Besore.

¹¹ Vo wakatani pami kemotshi kʼusi Edjibitu lʼusui. Vo wakawela le Davidi; wakawusha ma dia nde la ashi wa no.

¹² Vo wakawusha etshi kʼukama wa fingu ya weumu la sandji pendi diʼelua wa vinyo ya weumu. Lamʼakandashili nde, dimba diandi diakakeketala, ne dia ndi akatshikala tanyi tusatu la etshu esatu konde ma, kono ashi.

¹³ Davidi akawumbula ati: Eli kangaye? usi na eye? Ku ndi akakaluya Davidi diui ati: Dikenda dia pami diʼusi Edjibitu, ukambi wʼusi Amaleka omotshi mbemi. Aya nshi shatu umaka lamʼakatantshiki khumemi, ne dia dimi leko la kandji.

¹⁴ Shu takatumba antu wa la Nengebe kʼasi Kerete, ndu ka Juda, ndu wa la Nengebe ka Kaleba. Ku takatshumbi Zikilange.

¹⁵ Davidi akawumbula ati: We nangaka ntolami le asi ta ako? Ku ndi akûkaluya diui ati: Untshibeli lu lukumbu la Unyashungu wati: Dimi halukudiaka ndu halukukimo le khumeye. Ku dimi layukotola utsha le asi ta ako.

¹⁶ Okone ndi akolombola; watani ku asi Amaleka wakadianganyi lu kete tshe, wale, wano, ndu wano wenye, ne dia wuku wa diango wakawatambi lu kete ya Filistiya ndu lu kete ya Juda.

¹⁷ Davidi akalo la wo umaka hyutshihutshi edja ndu la dikolo dia wedi a pindju. Vo tshe nduku untu akahandi, tshikima elongo wʼapami kama nyei, wane wakahema lu kamelo, mbakalawo.

¹⁸ Davidi akashimbela kene tshe kakatoshi asi Amaleka, akatshungula ndu wadiendi ahendi.

¹⁹ Vo kunshisha nduku untu, dikenda kana ekumanyi, ona pami kana ona umuntu, kuyanga engo kakawatambi. Kene tshe kakatambi asi Amaleka, Davidi akakalula la to tshe.

²⁰ Davidi akose nyimba tshe yʼekoko la ya ngombe. Ku wane wakatalombolaka limba lako la dungalunga wakati vati: Diango dia dimbu dia Davidi ne.

²¹ Davidi akakumi le apami kama hyendi wakakomo alimba dia mbuyela, wakawatatshiki lʼokedi wa Besore. Vo wakayi dia ndjuhumana la Davidi la antu waki kame la ndi. Davidi akasukana la le wo, akawasha moyo.

²² Apami wa kolo tshe ndu waha la nemo waki lʼatei wa alimbi wakatshu la Davidi, wakati vati: Shu hatuwasha nduku engo ka dimbu kakatashimbedi, tshikima wadiewo la anʼawo mbayuwotola, mbayutsho la wo, ne dia vo kuntsho kame la su.

²³ Keli Davidi akawatela ati: Analingu, tanyutshaki osoku lu diango diakatusha Latuyalaka. Ndi kakatushimbela, ndu kakakimo alimbi wakayi dia ndjolo la su la anya asu.

²⁴ Akona ayunyukela lu dikambu ne? Ekahanyelu mpumbaka ndjala pupu le one lakatshu lu ta le one lakatshikala dia nama diango. Vo wayukahana pupu.

²⁵ Dikambu diako diakayala umaka lushi loso ndu nshi ya lʼokongo, ku wakadiete olembe la didjangu lu Isariyele edja ndu elo.

²⁶ Lamʼakakalula Davidi utsha la Zikilange, nai akatutumela dihangamendi dia Juda, engenyi andi, etenyi ka diango dia dimbu. Ndi akatumela aui ane ati: Onʼeli ushasha anyu uma lu diango dia dimbu diʼatunyi wa Latuyalaka.

²⁷ Ndi akatumela ndu wane wa la Betele, wa la Ramota ka la Nengebe la Jatira,

²⁸ wa la Aroera, wa la Sifimote, wa la Eshitemoa,

²⁹ wa la Rakala, wa lʼesumba wʼasi Jerameke, wa lʼesumba wʼasi Kene,

³⁰ wa la Horoma, wa la Kora-Ashana, wa la Ataka,

³¹ wa la Heberona, ndu wa lʼahuli tshe wakatakindulaka Davidi la alimbi andi.