1 Samuele 3 - La Bible en Otetela (Bible K'Ekila) 1991

Latuyalaka Ambeta Samuele

¹ Samuele dikenda akakambaka ulimu wa Latuyalaka lasuki la Eli. Diui dia Latuyalaka diakukemaka pai pai lu nshi sho; ndu waenelo kundjalaka efula.

² Lʼetena kako, ashu wa Eli wakatatela ndjala enguli, komena ololo ntu. Ndi aketama lu dihuli diandi,

³ ku tala dia Unyashungu diatadimala. Ndu Samuele aketami lu luudu la Latuyalaka, lene aki oshete wa sheki wa Unyashungu.

⁴ Lʼetena kako, Latuyalaka aketi Samuele ati: Samuele! Samuele! Ku ndi aketawo ati: Dimʼone!

⁵ Ndi akasamanya utsha le Eli, akatuwutela ati: Dimʼone, lambuya; we kumbetshi. Ndi akûkaluya diui ati: Dimi haketshi, tshoka, tetami. Ku ndi akakalula, akatetama.

⁶ Latuyalaka aketi Samuele ntu. Ku ndi aketo, akatshu utsha le Eli ntu, ati: Dimʼone, lambuya; mete we kumbetshi. Ndi akûkaluya diui ati: Onʼami, dimi haketshi, ukaluli, utetami.

⁷ Laso ku Samuele ateyi Latuyalaka, la diui dia Latuyalaka diatukema le ndi.

⁸ Latuyalaka aketi Samuele etena ka satu. Samuele aketo, akatshu utsha le Eli, akatuwutela ati: Dimʼone, lambuya, ne dia we kumbetshi. Eli akalimbitela ati: Latuyalaka oso eta dikenda.

⁹ Ku ndi akatela Samuele ati: Tshoka, tetami. Naka ndi ambuketa ntu, kuti wati: Latuyalaka, otekete, ne dia ukambi aye oso uka. Okone Samuele akatshu, akatetama lu dihuli diandi.

¹⁰ Latuyalaka akayi, akayemala, akaweti uku akandawetaka tena dikina ati: Samuele! Samuele! Ku Samuele akûkaluya diui ati: Otekete, ne dia ukambi aye oso uka.

¹¹ Latuyalaka akatela Samuele ati: Enda, dimi lutsha ntsha dikambu dimotshi lu Isariyele diayukashimula untu tshe layudiuka.

¹² Lu lushi lako, dimi layushidiya akambu tshe wakamataka uma lʼetatelu edja ndu lʼekumelu, dia ntshela luudu la Eli.

¹³ Dimi lakawutela nti: Dimi layudja luudu laye mananu pundju, ne dia kolo kene keyaye, ne dia anʼaye wakayatungela mananu, keli we kumbashimba.

¹⁴ Okone lambutshiba lu dikambu dia luudu la Eli nti: Ulambu wa nyama kana ulambu ukina haweyi ntungela luudu la Eli ekesanelu pundju.

¹⁵ Samuele aketama edja ndu pindju. Ku ndi akadihula kuki ya luudu la Latuyalaka. Ndi akuki woma dia nsanyia Eli enelo kako.

¹⁶ Keli Eli aketi Samuele ati: Onʼami Samuele! Ku ndi aketawo ati: Dimʼone.

¹⁷ Ndi akawumbula ati: Na diui diakakutedi Latuyalaka? Lambukosengasenga nti: Tumbisheki. Unyashungu akutsheli la ngala ndu akambu akina ladiku, naka we ayumbishe dikambu otoi uma lʼatei wʼaui tshe wakandakutedit

¹⁸ Samuele akusanyia akambu tshe, kumbushe nduku diui otoi. Ku Eli akati ati: Latuyalaka oso, ndi atshi uku weli ololo lu ashu andi.

¹⁹ Samuele akuli, Latuyalaka aki la ndi. Latuyalaka kumbetawo nduku diui diandi otoi nko la kete.

²⁰ Isariyele tshe uma la Dane pulu ndu la Bere-Sheba, wakeyi vati: Samuele kambuyala umvutshi wa Latuyalaka.

²¹ Latuyalaka akeneka lu Shilo, ne dia ndi akayaenyaka le Samuele la Shilo uma lu aui andi.