1 Samuele 26 - La Bible en Otetela (Bible K'Ekila) 1991

Davidi Ambutshika Saulu la Lumu la Zifu

¹ Asi Zifu wakatshu la Ngibeya le Saulu, wakatuwutela vati: Tuku Davidi one ushami lu dikuna dia Hakila, dieli lu leke lʼehutwelu la Jeshimona?

² Saulu akunela, akatshu utsha lʼusui wa shenga ya Zifu, kame la apami tunu satu w ikandasonola uma lʼatei wa Isariyele, dia ntuyanga Davidi lʼusui wa shenga ya Zifu.

³ Ndi akatuhanga lu diki na dia Hakila, dieli lʼumamu wa mbuka, lu leke lʼehutwelu la Jeshimona. Keli Davidi akatshikala lʼusui wa shenga. Lamʼakanduki lukumu ati: Saulu lu ndjuyeli lʼusui wa shenga,

⁴ ndi akatumi atopi. Ku vo wakayuwutela vati: Mete, Saulu akakumi.

⁵ Okone Davidi akunela, akatshu lu dihuli diakahangi Saulu. Ndi akenyi dihuli diaketami Saulu, ndi la Abinere, onʼa Nere, olombodi wʼului andi wʼalimbi. Saulu aketama lʼatei a pangu. Ku antu wakahangi lʼutshimba andi.

⁶ Davidi akambula Ahimeleke, usi Hiti, la Abishai, onʼa Zeruya, onangu Joaba, ati: Akona alanga ntsho la mi lu pangu, lenʼeli Saulu? Ku Abishai akûkaluya diui ati: Dimi layutsho la ye.

⁷ Davidi la Abishai wakunela lʼutshu utsha le antu ako. Watani ku Saulu etami djo lʼatei a pangu, la dikonga diandi diukami lu kete, lasuki la weko andi. Abinere la alimbi andi waketami lʼutshimba andi wakudingi.

⁸ Abishai akatela Davidi ati: Unyashungu ambukimo utunyi aye lu anya aye elo. Okone lambukosengasenga nti: Unkimo mbuhiki dikonga, mbuhikidio ekinda etena otoi pulu ndu lu kete, aha musehuya ntu.

⁹ Keli Davidi akatela Abishai ati: Tudiakaki. Akona ukuki mbahe ukitami wʼiso wa Latuyalaka lunya wahahe, ku ndi hayala la unungu?

¹⁰ Davidi akati ati: Uku eli Latuyalaka la lumu! Latuyalaka ndame kut iki, lushi landi layukuka, ku ndi mvo. Kana ndi mbeyaka ntsho lu ta, ku ndi ayutuvo leko.

¹¹ Latuyalaka anshimbi diaha dimi mbahe ukitami andi wʼiso lunya. Ose paka dikonga dieli lasuki la weko andi, kame la utika wʼashi, tutshu la dio.

¹² Okone Davidi akose dikonga la utika wʼashi waki lasuki la weko wa Saulu, ku vo wakatshu. Nduku untu akawaenyi kuyanga mbeya dikambu diako; ndu nduku untu akemo, ne dia Latuyalaka akaladia djo ya wulu.

¹³ Davidi aketi lu wedi ukina, akatemala etali lʼote wʼukungu, tshalula ya wulu uma lu pangu.

¹⁴ Ku ndi akatumela antu la Abinere, onʼa Nere, aui ati: Abinere, we hati nduku diui? Abinere akûkaluya diui ati: We na, adja khumʼekanga lundju?

¹⁵ Davidi akambula Abinere ati: Aha pami ka dihunga keye? Akona eli uku we lu Isariyele? Okoko wana wakiye kunama khumeye khumʼekanga ololo? Enda untu omotshi akayi uma lʼatei a wudja dia ndjudiaka khumeye khumʼekanga.

¹⁶ Wuhu wakayatshi uku tawaki ololo. Uku eli Latuyalaka la lumu! We nkukaka ndjakema, ne dia we kunama khumeye, ukitami wʼiso wa Latuyalaka, ololo. Enda kakiane, lendʼeli dikonga dia khumʼekanga, la utika wʼashi waki la suki la weko andi?

¹⁷ Saulu akalimbitela diui dia Davidi; akawumbula ati: Diui diaye, we onʼami Davidi, so? Davidi akûkaluya diui ati: Khumemi, khumʼekanga li, diui diami so!

¹⁸ Ndi akawumbula ati: Khumemi, okoko wana wayayayeli ukambi aye? Kakona kakamatshi, la unungu akona weli la mi?

¹⁹ Kakiane lambukosengasenga, we khumemi khumʼekanga, dia we nunga aui wʼukambi aye. Naka Latuyalaka kakutuma uya le mi, ndi etawo nungula ulambu one. Keli naka antu, vo wadjami mananu la ntundu ka Latuyalaka, ne dia vo wambumbitshanya elo dia mamitulami la ukito wa Latuyalaka, vati: Tshoka, totemole ditemolatemola,

²⁰ Okone tetawoki dikila diami nko la kete lu ashu wa Latuyalaka. Ne dia khumʼekanga ka Isariyele akayi dia ndjuyanga lumu lami, uku untu latatshanya engwe lʼekungu.

²¹ Saulu akawutela ati: Dimi lakangi. Onʼami Davidi uyi, dimi handjukutshela kolo ntu. Lumu lami laki ushinga a wulu elo lu ashu aye. Dimi lakatshi uku enginya, ndu dimi lakatshi munga ka wuki.

²² Davidi akûkaluya diui ati: Dikonga dia khumʼekanga ne. Untu omotshi uma lʼatei wʼalimbi ayi, ayudiose.

²³ Latuyalaka ayutshela untu lʼuntu uku ololo andi, ndi uku kolamelu yandi; ne dia Latuyalaka akakukimwi lu anya ami elo. Keli dimi hanangi nkahe lunya, we ukitami wʼiso wa Latuyalaka.

²⁴ Uku aki lumu laye ushingʼa wulu elo lu ashu ami, wuhu ako mbayuyala lumu lami ushinga a wulu lu ashu wa Latuyalaka. Ndi ayunshimbela uma lʼasui tshe.

²⁵ Saulu akatela Davidi ati: Onʼami Davidi atshokwami. We ayongonaka lu elimu aye. Davidi akakolamelu lu lokendo landi, ku Saulu akakalula lakandi.