1 Samuele 25 - La Bible en Otetela (Bible K'Ekila) 1991

Davidi la Abingayili

¹ Samuele akavu. Asi Isariyele tshe wakasangana kame, wakuleli, wakukhunde lu luudu landi la Rama. Ku Davidi akunela, akatshu utsha lʼusuiwa shenga wa Parana.

² Usi Maona omotshi akiko, lakatutshaka ulimu la Karamele. Ndi aki kanga ongonyi efula. Ndi aki la ekoko nunu satu, la mbudi knunu. Ndi akahimbulaka ekoko andi diosa la Karamele.

³ Lukumbu la untu ako laki Nabala, lukumbu la wadendi Abingayili. Umuntu ako aki la yimba efula ndu dimena diahangone. Keli pami kako aki engeno ndu aki la ditshelu dia kolo. Ndi aki uma lu diuhu dia Kaleba.

⁴ Davidi akuki lukumu lʼusui wa shenga ati: Nabala eko lu mpimbula ekoko andi diosa.

⁵ Davidi akatumi elongo wʼapami dikumi, akawatela ati: Nyutshu la Karamele le Nabala, nyutumemwelendi.

⁶ Kanyutuwuteli nyati: Ki kayali le ye, ndu le wa lu luudu laye, ndu le kene tshe keli la ye.

⁷ Kakiane, dimi lambuka lukumu ati: We la ahimbudi wa diosa. Alami aye wʼekoko waki kame la su. Shu kumbatshela kolo lamʼakiwo la Karamele. Nduku engo kakashisho uma lʼatei a diango diawo.

⁸ Umbuli ekambi aye wʼapami, ku vo wayukutela osoku. Okone etawo elongo ene wʼapami mpumo lukulu lʼolo lu ashu aye, ne dia shu tambukuma lu lushi lʼongenongeno. Dimi lambukosengasenga nti: Utukimanyia, dimi onʼave Davidi la ekambi aye, la diango diukimeye.

⁹ Lamʼakakumi elongo wʼapami wʼuma le Davidi le Nabala, vo wakawutela aui aso tshe lu lukumbu la Davidi, ku vo wakalembohala.

¹⁰ Nabala akakaluya ekambi wa Davidi diui ati: Akona eli Davidi? Akona eli onʼa Jese? Nshi nye, ekambi efula wumo uma le akhumewo.

¹¹ Ku dimi layosa ma diami, ashi ami, la unatshi wa nyama wakamadiakedi ahimbudi ami wa diosa, ku dimi layudisha antu wahameyi uma lene uyewo?

¹² Ku antu wʼuma le Davidi wakakimela mbuka, wakakalula. Lamʼakawakumi, wakatutela Davidi aui ako tshe.

¹³ Okone Davidi akatela alimbi andi ati: Nyu tshe untu lʼuntu asome yombo yandi lu lukindi. Ku vo tshe untu lʼuntu akasome yombo yandi lu lukindi. Ndu Davidi akasome yombo yandi lu lukindi. Lasuki lʼapami kama nyei wakatshu kame la ndi. Ku apami kama hyendi wakatshikala dia nama diango diawo.

¹⁴ Ukambi omotshi wa Nabala akatshu, akatutela Abingayili wadi a Nabala, ati: Uki, Davidi akatumi akendji lʼusui wa shenga dia ndjemula uwandji asu, ku ndi akayahangwela.

¹⁵ Keli antu aso wakatutshela ololo. Vo kuntotenga ndu kuntohotola nduku engo tena tshe diakisu kame la wo lamʼakisu lu dikambo.

¹⁶ Tena tshe diakisu kame la wo lamʼakataleshaka ekoko, vo waki uku eheli kasu kʼusumba ndu lʼutshu ndu la yanyi.

¹⁷ Okone kakiane, eyi ndu ukani yimba lu dikambu diayangaye ntsha. Eshishwelu ka uwandji asu la wa lu luudu landi tshe ambusanguyama: ne dia ndi eko untu a kolo, lahalangi untu kawutela diui.

¹⁸ Abingayili akose ekama wa ma kama hyendi esadi, ehundi ehendi wa wanu, funda tshanu ya nyama kʼokoko yʼekato, sendji tanu diʼahoho wa lufumba, elui lukama wʼelua wa vinyo yambuma, ndu ekati kama hyendi wa fingu yambuma. Ndi akayahe ladiku dia punda,

¹⁹ akatela ekambi andi ati: Nyeti la ntundu kami, dimi nyediya. Ndi kumvutela umendi Nabala nduku diui.

²⁰ Ndi akahema lu punda kandi, akahulo lʼukungu, lu mbuka ka yomo; enyi ku Davidi one ayahulo ndi la alimbi andi la ntundu kandi, uku antu wayayi dia ndjuhumana la ndi.

²¹ Davidi akati ati Mete, anyanya mbakimi lu nshimbela diango dia pami kene lʼusui wa shenga, la kombosa nduku engo lʼatei a diango tshe dieli la ndi. Ndi ambunkaluya kolo lu ololo.

²² Unyashungu antsheli, dimi ukambi andi Davidi, la ngala tshe, naka dimi layutshika diango tshe dia Nabala la lumu edja ndu la pindju.

²³ Lamʼakatatela mena Abingayili Davidi, ndi akahulo esadi uma lu punda, akako ekhukhumadi la ntundu ka Davidi, akukhusamela.

²⁴ Ku ndi akukidimwela lʼekulu; akawutela ati: Khumemi, unungu wayali le mi! Umbetawo, dimi ukambi aye, nkuteli, ulungi aui wʼukambi aye a umuntu.

²⁵ Khumemi, tudjaki ashu aye le Nabala, pami keku Ka kolo. Uku eli lukumbu landi, mbendi; Nabala (kitshimudi ati: Kanga dadi) keli lukumbu landi, dadi mbatundundjoka. We khumemi, dimi ukambi aye a umuntu komena antu wakayatumi.

²⁶ Kakiane we khumemi, uku eli Latuyalaka la lumu! ndu uku weye la lumu! Latuyalaka ndame kakakushimbi dia we nyanganya dikila, ndu kakakukimela lu lunya. We khumemi, atunyi aye watuyangaka nkutshela kolo, wayali uku Nabala!

²⁷ Khumemi li, etawo nungula ushasha one wambukela ukambi aye a umuntu, dia vo nkahanyema le alimbi aye wayayi kame la ye.

²⁸ Lambukosengasenga nti: Unyimanyia, dimi ukambi aye a umuntu, munga kami, ne dia Latuyalaka ayukushikike lu luudu laye, we khumemi. Unyimanyia, we khumemi, ne dia we katoloka ata wa Latuyalaka, la kolo hutanema le ye pundju.

²⁹ Naka untu omotshi ayunela dia ndjelana la ye, ndu ayulanga nkudiaka, lumu laye, we khumemi, layuyala lʼului a wane wasena, lasuki la Latuyalaka, Unyashungu aye. Ku ndi ayuka etema wʼatunyi aye ave la yuka ave.

³⁰ Lamʼayukutshela Latuyalaka akambu wʼololo wakandakulaki, we khumemi, ndu lamʼayundukudja uwandji wa Isariyele,

³¹ we huyala la tshumu kana lunyangu lʼutema, wati: we akatshulula dikila utshul ilatshulula ndu akayasombweya weme. Okone we khumemi, lamʼayukutshela Latuyalaka akambu wʼololo, kumouho, dimi ukambi aye a umuntu.

³² Davidi akakaluya Abingayili diui ati: Latuyalaka, Unyashungu wa Isariyele, lakakutumi elo dia ndjuhumana la mi atumbwami!

³³ Kanyi yaye yʼololo yatshokwami, ndu we lambunshimba elo dia nyanganya dikila ndu dia ndjasombwela la lunya lami, otshokwami!

³⁴ Keli Latuyalaka, Unyashungu wa Isariyele, lambunshimba dia dimi nkutshela kolo, eko la lumu. Utunduyala we hasamanyisha dia ndjuhumana la mi, tshiki nduku engo ka Nabala kututshikala umaka kakiane edja ndu la pindju.

³⁵ Ku Davidi akalunjula ushasha wakawela Abingayili, ku ndi akav utela ati: Tahoka la ki utsha lakaye. Enda, dimi lakakukedi, lakakulungudi ololo.

³⁶ Abingayili akakalula le Nabala. Atani ku ndi akatshi dambu lu luudu landi, uku dambu dia khumʼekanga. Ndi aki la ongenongeno lʼutema andi, akadjo wanu efula. Abingayili kumbutela nduku diui, edja ndu la pindju.

³⁷ Keli la pindju, lamʼakukimo wanu, wadendi akusanyia akambu wakatshama. Diui dia Nabala diakakomama esukhu ka wulu, ku ndi akaneno diui.

³⁸ Lʼokongo a nshi dikumi, Latuyalaka akakomola Nabala, ku ndi akavu.

³⁹ Davidi akuki lukumu ati: Nabala ambuvo. Ku ndi akati ati: Latuyalaka, lakanteketela lu lotengo lakatenge Nabala ndu lakashimbi ukambi andi dia ntsha kolo, atumbwami! Latuyalaka ambukaluya Nabala kolo kandi. Davidi akatumi akendji le Abingayili dia ndi ndjala wadendi.

⁴⁰ Ekambi wa Davidi wakakumi la Karamele laka Abingayili, wakatuwutela okone vati: Davidi kututumi le ye, dia ndjukosa, dia we ndjala wadendi.

⁴¹ Ndi akunela, akakhusamela, akati ati: Enda, dimi ukambi aye a umuntu layuyala fumbi ka mbotshaka ekulu wa ekambi wa khumemi.

⁴² Ku Abingayili akunela esadi, akahema lu punda kemotshi, esekaseka wʼamantu etanu wakutshindela. Ku ndi akatshu la akendji wa Davidi, akatuyala wadendi.

⁴³ Davidi akose ndu Ahinoama, usi Jezerele, ku vo ahendi wakayala wadiendi.

⁴⁴ Laso ku Saulu akakimo onʼandi Mikale, wadi a Davidi, le Palati, Onʼa Laishi, usi Ngalima.