1 Samuele 23 - La Bible en Otetela (Bible K'Ekila) 1991

Davidi lʼUsui wa Shenga

¹ Wakayutela Davidi vati: Uki, asi Filistiya wambolosha asi Keila, wambosa diango uma lʼahuli wʼesuswelu.

² Ku Davidi akambula Latuyalaka ati: Kawo dimi ntsho la ntolembia asi Filistiya aso? Ku Latuyalaka akûkaluya diui ati: Tshoka, otolembia asi Filistiya, utushimbeli Keila.

³ Alimbi wa Davidi wakawutela vati: Shu teko la woma lindu, la Juda. Undi, woma hawuleka lamʼayututsho la Keila dia ntolosha asi Filistiya?

⁴ Davidi akambula Latuyalaka ntu, ku Latuyalaka akûkaluya diui ati: Uneli, uhulo utsha la Keila. Dimi layukimo asi Filistiya lu anya aye.

⁵ Davidi la alimbi andi wakatshu la Keila, wakatolosha asi Filistiya, wakadiaki efula; wakatuya la ngombe yawo. Osoku mbakashimbela Davidi ekambi wa Keila.

⁶ Lamʼakalawo Abiyatara, onʼa Ahimeleke, utsha la Keila le Davidi, ndi akayayakaka ayakimedi ukutu wa nemo lu lunya landi.

⁷ Wakatutela Saulu vati: Davidi ambukuma la Keila. Ku Sauluakati ati: Unyashungu amb ikimo lu anya ami, ne dia ndi ambuyadiha lʼusumba weli la kuki la tukingiti.

⁸ Saulu akasanganya alimbi andi tshe, dia vo mpulo la Keila la ntudinga Davidi la alimbi andi.

⁹ Davidi akeyi dikambu dia kolo diakasanguya Saulu mbutshela. Ndi akatela olombed. Abiyatara ati: Ela ukutu wa nemo.

¹⁰ Ku Davidi akati ati: We, Latuyalaka, Unyashungu wa Isariyele, dimi ukambi aye lambuka lukumu ati: Saulu uyanga ndja la Keila, dia ndjulanya usumba lu dikambu diami.

¹¹ Undi, asi Keila wayunkimo lu anya andi? Saulu ayuya mete, uku akamuki? Latuyalaka, Unyashungu wa Isariyele li, lambukosengasenga nti: Umvuteli, dimi ukambi aye. Ku Latuyalaka akawutela ati: Ndi ayuya.

¹² Ku Davidi akawumbula ntu ati: Undi, asi Keila wayutukimo, dimi la alimbi ami, lu anya wa Saulu? Ku Latuyalaka akûkaluya diui ati: Vo wayukukimo.

¹³ Davidi la alimbi andi waki uku apami kama shamalu. Vo wakunela, wakatumbi uma la Keila, wakatshu lene akaweye ntsho. Wakatutela Saulu vati: Davidi ambulawo uma la Keila, okone ndi kuntsho leko.

¹⁴ Ku Davidi akatadjaseka lʼusui wa shenga, lu ahuli a wulu, akatshikala lu leke lʼakuna wa lʼusui a Shenga ya Zifu. Saulu akatuyangaka la lushi la lushi, keli Unyashungu kumbukimo lu anya andi.

¹⁵ Davidi aki la woma, ne dia Saulu akatuyangaka dia mbudiaka. Etena kako, Davidi aki la Horeshe, lʼusui a Shenga ya Zifu.

¹⁶ Jonatana, onʼa Saulu, akunela, akatshu le Davidi la Horeshe. Ndi akatukikitsha lʼekamelu kandi le Unyashungu.

¹⁷ Ndi akawutela ati: Tukaki woma, ne dia lunya la papa Saulu halukuma le ye. Mete, we ayuyala khumʼekanga ka Isariyele, ku dimi layuyala lu dihuli dia hendi. Ndu papa Saulu mbeyaka dikambu ne ololo.

¹⁸ Okone vo ahendi wakalakana la ntundu ka Latuyalaka. Davidi akatshikala la Horeshe, ku Jonatana akakalula lakandi.

¹⁹ Ku asi Zifu wakayi le Saulu la Ngibeya, wakayuwutela vati: Tuku Davidi one ushami lʼatei asu, lu ahuli a wulu wa la Horeshe, lu dikuna dia Hakila, dieli lu leke la diku dia kushi dia Jeshimona?

²⁰ Khumʼekanga li, uyi kakiane dia nshidiya lulangu leli lʼutema aye. Ku tayukimo lu anya aye, we khumʼekanga.

²¹ Saulu akakaluya diui ati: Latuyalaka anyotshokole, ne dia nyu nyambumbuka ketshi.

²² Lambunyosengsenga nti: Nyutshu, nyumutenda dia mbeya la mbishula dihuli diendi la untu lakatuwena leko. Ne dia vo mvutelakami vati: Ndi kanga kyeso efula.

²³ Okone nyutushishimi, nyutulimbiteli ahuli tshe watundushamaka, kanyuyumvuteli diui dia shikaa, ku dimi layutsho la nyu. Okone naka ndi eko lu kete nye, dimi layuyanga lʼatei wʼantu nunu nunu diʼasi Juda.

²⁴ Okone vo wakunela, wakatatela ntsho utsha la Zifu, la ntundu ka Saulu. Davidi la alimbi andi waki lʼusui wa shenga wa Maona lu Araba, lu leke la diku dia kushi la Jeshimona.

²⁵ Saulu la alimbi andi wakatshu la ntuyanga. Wakatutela Davidi lukumu lako, ku ndi akahulo uya lu dive dia wuki dieli lʼusui wa shenga wa Maona. Lamʼakuki Saulu dikambu so, ndi akayelana la Davidi pulu ndu lʼusui wa shenga wa Moana.

²⁶ Saulu akayakendakendaka lu wedi omotshi wʼukungu, ku Davidi la antu andi lu wedi ukina wʼukungu. Ku Davidi akakhunguso dia ndawo Saulu. Ku laso Saulu la alimbi andi wakadingi Davidi la alimbi andi dia vo mbanda.

²⁷ Keli dikendji diakayi dia ndjutela Saulu ati: Usamanya, uyi esadi, ne dia asi Filistiya wambulanya kete.

²⁸ Saulu akakimo ndjelana la Davidi, akakalula dia ntolo la asi Filistiya. Diako mbakawole dihuli diako vati: Dive diʼEhandelu.

²⁹ Davidi akunela uma leko, akatudjase lu ahuli a wulu wa la Ene-Ngedi.