1 Samuele 22 - La Bible en Otetela (Bible K'Ekila) 1991

¹ Okone Davidi akuneia uma leko, akalawo utsha lu wuku wa Adulama. Lamʼakuki anangu la wa lu luudu la shi tshe dikambu so, vo wakatshu utsha le ndi.

² Untu tshe laki la pa, untu tshe laki la abasa, la untu tshe laki la lunyangu, wakamote la le ndi. Ndi akayala olombodi awo. Antu waki la le ndi, waki uku apami kama nyei.

³ Davidi akamo uma leko, akatshu la Mizipa lu kete ya Moaba. Ndi akatosengasenga khumʼekanga ka Moaba ati: Etawo papa le nyomi ndjudjase kame la nyu, edja ndu lamʼayumeya kene kayuntshela Unyashungu.

⁴ Ndi akayi la wo la ntundu ka khumʼekanga ka Moaba. Ku vo wakadjase la ndi etena tshe kaki Davidi lu dihuli diʼeshamelu.

⁵ Ku umvutshi Ngada akatela Davidi ati: Tutshikalaki lu dihuli ne diʼeshamelu. Uneli, utshu utsha lu kete ya Juda. Ku Davidi akuneia, akatoto lʼukunda wa Herete.

Saulu Ambudiaka Elombedi wa la Nobo

⁶ Saulu akuki lukumu ati: Wambushula Davidi la antu andi. Etena kako Saulu akadjashi la tshina diʼuvungu la Ngibeya lu dihuli dia ladiku ukimedi dikonga diandi iu lunya. Ekambi andi wakemala lasuki la ndi.

⁷ Saulu akatela ekambi andi wakemadi lasuki la ndi ati: Nyulungi nyu asi Bendjamina. Undi, onʼa Jese one ayunyusha nyu tshe dikambo dia mbu ya nde, ndu dikambo dia vinyo? Ndi ayunyudja elombodi wʼantu kinunu kinunu ndu elombodi wʼantu lukama lukama?

⁸ Naka aha osoku, ukundi ambunyumbidjela sheki? Nduku untu animbitshiya sheki yadja onʼami la onʼa Jese. Nduku otoi lʼatei anyu anyanga lu dikambu diami. Nduku untu animbitshiya uku ambuntombosha onʼami ukambi ami, dia ndi nkitshiyami lalu, uku ambundutsha elo.

⁹ Ku Doenge, usi Edome, lakemadi la ekambi wa Saulu, akûkaluya diui ati: Dimi lakenyi onʼa Jese ayayi la Nobo le Ahimeleke, onʼa Ahitube.

¹⁰ Ahimeleke akawumbwela le Latuyalaka, akawusha pamba ya lokendo ndu yombo yaki Ngoliyate, usi Filistiya.

¹¹ Khumʼekanga akatumi antu dia nteta olombedi Ahimeleke, onʼa Ahitube, la wa lu luudu la shi tshe, elombedi waki la Nobo. Vo tshe wakayi le khumʼekanga.

¹² Saulu akawutela ati: Uhukami, we onʼa tutube! Ku ndi aktkaluya diui ati: Dimi oso uka, khumemi!

¹³ Saulu akawumbula ati: Okoko wana wakanyambidjela sheki we la onʼa Jese? Dikambu kuna diakayawusha pamba ya lokendo ndu yombo, ndu diakayawumbwela le Unyashungu, dia ndi ntombokwelami la nkitshiyami lalu, uku ambundutsha elo?

¹⁴ Ku Ahimeleke akûkaluya diui ati: Lʼatei wʼakambi aye tshe, akona edimi la ukilu aye Davidi lu kolamelu, lu mamema elembe aye la lu nemiama lu luudu laye?

¹⁵ Undi, paka elo kambumutatela mbumbwela Unyashungu? Aha osoku, khumʼekanga tombotshiyaki dimi ukambi aye kana wa lu luudu la papa lu dikambu ne. Dimi haleyi dikambu ne nduku yema.

¹⁶ Khumʼekanga akawutela ati: Ahimeleke, mete, we ayuvo we la wa luudu la sho tshe.

¹⁷ Khumʼekanga akatela ekambi andi wadja luwangu, wakemadi lasuki la ndi ati: Nyukadimo, nyudiaki elombedi wa Latuyalaka, ne dia vo watukanaka la Davidi. Vo wakeyi mete vati: Ndawo mbatandalawo, keli vo kumvutelami. Keli ekambi wa khumʼekanga kumbetawo nsimbula anya aso dia ndjaka elombedi wa Latuyalaka.

¹⁸ Khumʼekanga akatela Doenge ati: Ukadimi, udiaki elombedi. Doenge, usi Edome, akakadimo, akadiaki elombedi. Ndi akadiaki antu akumi enanei la atanu wakalotaka ekutu wa nemo wa linene.

¹⁹ Ndi akalo la Nobo, usumba wʼelombedi; akadiaki apami, amantu, ana la ana wa ashashi, ndu ngombe, punda la ekoko la yombo.

²⁰ Keli Abiyatara, ona omotshi a Ahimeleke, onʼa Ahitube, akahandi; akalawo utsha le Davidi.

²¹ Abiyatara akatuwutela ati: Saulu akadiaki elombedi wa Latuyalaka.

²² Davidi akakaluya Abiyatara diui ati: Lushi luku lakemadi Doenge, usi Edome, dimi lakeyi nti: Mete, ndi ayututela Saulu. Okone wa lu luudu la sho tshe wambuvo dikambu diami.

²³ Utshikali la mi, tukaki woma, ne dia one layanga ndjakami ayuyanga nkudiaka ndu we. Lamʼeye lasuki la mi, mbayuyulamema ololo.