1 Samuele 20 - La Bible en Otetela (Bible K'Ekila) 1991

Longenyi la Davidi la Jonatana

¹ Davidi akalawo uma la Nayota ka la Rama. Ndi akatshu le Jonatana, akatuwumbula ati: Kakona kakamatshi? Na unungu ami? Na kolo kami lu ashu wa sho, kalangandi ndjakami?

² Jonatana akûkaluya diui ati: Aha osoku. We huvo. Papa hatutshaka nduku dikambu dia wuki kana dia tshitshe aha ntamvutedi. Ukundi ukuki papa mbishemi dikambu ne? Ndi hambishe, mete, ndi heyi mbishemidio.

³ Davidi akûkaluya diui ati: Sho mbeyaka ololo ati: Dimi lakahumo lukulu lʼolo lu ashu aye. Okone ndi mbeyaka mvuta ati: Tanyutelaki Jonatana dikambu ne, ndi atukunyanga. Mete, uku eli Latuyalaka la lumu! ndu uku eli utema aye la lumu! na otoi tu mbambutshikala lʼasami la nyoi.

⁴ Jonatana akakaluya Davidi diui ati: Dikambu tshe dialangaye, dimi layukutsheladio.

⁵ Ku Davidi akawutela ati: Ulungi, lui ayuyala hyane ya ngondo, dimi layuhumba ntole ma kame la khumʼekanga. Keli unkimo ntshu lʼusui, dia ntushama edja ndu la dikolo dia lushi la satu.

⁶ Naka sho ayumumbula, kuwuteli wati: Davidi akanombe wulu wa ntsho lʼusumba awo, la Betelehema, dia ntulambula ulambu wʼeleku, ndi la khumbu kandi kame.

⁷ Naka ndi ayetawo ati: Kawo, ku ukambi aye huyalaka la dikambu dia mbuka woma. Keli naka ndi ayumala, keyi wati: Ndi akasanguya dia ntshelami kolo.

⁸ Okone umbuki ukambi aye ketshi, ne dia we akakote la mi lusalu la ntundu ka Latuyalaka. Naka kolo keko le mi, undjaki weme. Dikambu kuna dialangaye n ndjami la ntundu ka sho?

⁹ Jonatana akûkaluya diui ati: Kanyi sho yamo le ye. Naka dimi layeya nti: Papa ambusanguya nkutshela kolo ku dimi hakutela uka?

¹⁰ Ku Davidi akawumbula ati: Ayuyumvutela, naka sho ayukukaluya aui wa ngala?

¹¹ Jonatana akawutela ati: Yeti tutshu lʼusui. Ku vo ahendi wakatshu utsha lʼusui.

¹² Jonatana akatela Davidi ati: Latuyalaka, Unyashungu wa Isariyele, keli omenyi. Lamʼayumuhimba papa lʼushidi one lui kana la hyendi, dimi hakutumela dikendji dia nkulimbitshiya dikambu ne uka?

¹³ Keli naka papa ayulanga nkutshela kolo, Latuyalaka antsheli, dimi Jonatana, dikambu so ndu dikina ladiku, naka dimi hakulimbitshiya dikambu so ndu hakukimwi la ki. Latuyalaka kayalaki la ye uku akindi la papa.

¹⁴ Naka dimi leki la lumu, komenyaki ngandji ka Latuyalaka diaha dimi mvo.

¹⁵ Ku naka dimi lambuvo, tunyaki ngandji kaye uma le wa lu luudu lami, kuyanga Latuyalaka ambushila minya atunyi tshe wa Davidi uma la kete.

¹⁶ Okone Jonatana akadji la luudu la Davidi sheki, ata ati: Latuyalaka asomboya atunyi wa Davidi.

¹⁷ Jonatana akatshibia Davidi ntu, ne dia ngandji kandi le ndi. Ndi akawukaka ngandji uku akandayaukaka.

¹⁸ Jonatana akawutela ati: Lui, ayuyala hyane ya ngondo. Wayukuhumba, ne dia edie kay kayuyala hwe.

¹⁹ Lushi la satu, wayukuhumba wulu, kutshu edja ndu lu dihuli diakayashami lamʼakayala dikambu, kututshikadi leko, la wedi wʼului wʼave.

²⁰ Dimi layuka pitu shatu lʼumamu wʼului ako wʼave, uku lononga.

²¹ Ku layutuma olongo a pami, layuwutela nu: Tshoka totongone pitu. Naka layuwutela nti: Enda, pitu yeko uva lindu, uyitongone; laso ku we ndja ne dia uku eli Latuyalaka la lumu! nduku dikambu diayuya le ye.

²² Keli naka layutela olongo a pami nti: Enda, pitu yeko la wedi aye, ku we munela, ne dia Latuyalaka ambukunyia.

²³ Enda, Latuyalaka eli omenyi wa pundju lu dikambu ne, diambutusawula shu ahendi.

²⁴ Davidi akatushama lʼusui. Lamʼakawale ngondo, khumʼekanga akadjase dia nde dambu.

²⁵ Khumʼekanga akadjashi lu edie kandi kekami lʼeheli, uku akandadjaseka. Ku Jonatana akadjashi elanedi la ndi. Abinere akadjashi lasuki la Saulu, keli dihuli dia Davidi diakatshikala hwe.

²⁶ Ku Saulu kumvuta nduku diui lushi lako. Ndi akakani ati: Dikambu dimotshi diambuyala le ndi, undu ndi kema pudipudi.

²⁷ Ndu la wedi a pindji, lu lushi la hendi la hyane ya ngondo, dihuli dia Davidi diaki hwe. Ku Saulu akambula onʼandi Jonatana ati: Dikambu kuna diaki onʼa Jese kundja lu ma ndu lui ndu elo?

²⁸ Ku Jonatana akukuluya diui ati: Davidi akanombe wulu wa ntsho la Betelehema.

²⁹ Ndi akansengasenga ati: Unkimo, ntshu, ne dia khumbu kasu wutsha nambula ulambu lʼusumba. Ndu onalingu akamvutela dia dimi ntsho leko. Naka lakahumo lukulu lʼolo lu ashu aye, unkimo, ntshu esadi dia ntenana la analingu. Diako mbahandayi lu mesa wa khumʼekanga.

³⁰ Ku Saulu akuki Jonatana kele, akotenge ati: We onʼa umuntu la kolo lʼuhendudi, we nkanaka wati: Dimi haleyi nti: We akasonola onʼa Jese ongenyi? Undi, dikambu ne hadiuyuyala sonyi le ye ndu le nyo?

³¹ Lamʼeki onʼa Jese one la lumu la kete, we hayalaki la ki, we la diulelu diaye. Kakiane utumi untu dia ntuwosa; dieli la ndi dia mvo.

³² Jonatana akambula shi ati: Dikambu kuna diahumbandi mvo? Kakandatshi na?

³³ Saulu akawuki dikonga, dia mbudiaka. Jonatana akalimbitela ati: Papa akasanguya dia ndjaka Davidi.

³⁴ Jonatana akunela uma la mesa la kele ka wulu. Ndi konde ma lushi la hendi lako la hyane ya ngondo. Ndi akanyangi lu dikambu dia Davidi, ne dia shi akotenge.

³⁵ La wedi a pindu, Jonatana akatshu lʼusui, lu dihuli diakandalakana la Davidi. Ku dikenda dia pami dimotshi akatshu la ndi.

³⁶ Ndi akatela dikenda diaki ati: Ulawo, ototongone pitu yayangami mbuka. Lamʼakatalawoki Jikenda, Jonatana akuki luhitu, ku lo lakulekana.

³⁷ Lamʼakakumi dikenda lu dihuli diaki luhitu lakuki Jonatana, Jonatana akahangohango lʼokongo andi ati: We henyi luhitu leki etali la ntundu kaye?

³⁸ Jonatana akahangohango lʼokongo a dikenda ntu ati: Usamanya, ulawo, temalaki! Ku dikenda akatotongona pitu, akayi la yo le khumendi.

³⁹ Keli dikenda kumbeya dikambu diako, paka Jonatana la Davidi atu mbakeyaka.

⁴⁰ Jonatana akasha dikenda dihumo diandi, akawutela ati: Tshoka, uditole lʼusumba.

⁴¹ Lamʼakatshu dikenda, Davidi akunela uma lu dihuli diakindi, lu leke la diku dia kushi. Ndi akayakosha ekhukhumadi la kete, akukhusamela tena satu. Ku vo wakakhumbatanela, wakaleli kame vo ahendi, djekaleka ku Davidi.

⁴² Ku Jonatana akatela Davidi ati: Utshu la ki. Kakiane tambushila ndakana lu lukumbu la Latuyalaka shati: Latuyalaka ayali lʼasasu shu ahendi, ndu ayali lʼasa tukanula tami la tukanula taye pundju. Davidi akunela, akatshu. Ku Jonatana akakalula lʼusumba.