1 Samuele 19 - La Bible en Otetela (Bible K'Ekila) 1991

Saulu Ambuyanga Ndjaka Davidi

¹ Saulu akatela onʼandi Jonatana la ekambi andi tshe dia vo ndjaka Davidi. Keli Jonatana, onʼa Saulu, akukaka Davidi ngandji efula.

² Jonatana akatela Davidi ati: Papa Saulu eko lu ntakuyangi dia nkudiaka. Okone lambukosengasenga nti: Kewo lui la pindju, kuyangi dihuli dimotshi, kutushami.

³ Dimi layutumba, layutemala la le papa lʼusui, lene ayuyuyla. Layukoteketela le papa. Naka lambena dikambu dimotshi, layukutela.

⁴ Jonatana akateketela Davidi ololo le Saulu, shi; akawutela ati: Khumʼekanga, tutshelaki ukambi aye Davidi kolo, ne dia ndi kunkutshela kolo, we khumʼekanga. Ndi atukutshelaka paka ololo utu.

⁵ Ndi akasundja lumu landi, dia ndo la usi Filistiya lakandadiaki. Ku Latuyalaka akatungela Isariyele tshe etshungwelu ka wuki. We akenyi dikambu diako, akangenangena. Ukundi alangaye ntshela Davidi kolo lamʼahandi la unungu, dia mbudiaka udiakadiaka?

⁶ Saulu akukela Jonatana, akatshibi ati: Uku eli Latuyalaka la lumu! Davidi hadiakema.

⁷ Okone Jonatana aketi Davidi, akawutela aui aso tshe. Ndi akatshu la ndi utsha le Saulu. Ku ndi akayala lasuki la ndi uku nshi kina.

⁸ Ta diakayala ntu. Ku Davidi akatumbi, akatolo lʼasi Filistiya, akatadiaka efula, ku vo wakulawo.

⁹ Odienge uma le Latuyalaka akahema Saulu lamʼakandadjashi lu luudu landi ukimedi dikonga diandi lu lunya. Davidi aki lu mpuma losese.

¹⁰ Saulu akalangi mamanya Davidi la dikonga lʼeheli. Keli Davidi akasandjo uma la ntundu kandi, ku dikonga diakakama lʼeheli. Davidi akamo, akalawo lʼutshu.

¹¹ Saulu akatumi antu laka Davidi dia ntulama lʼutshu, la dia vo mbudiaka la pindju. Keli wadendi Mikale akawutela ati: Naka we halawi lʼutshu one, wayukudiaka lui.

¹² Okone Mikale akahuluya Davidi uma lu didishi. Ku ndi akunela, akalawo. Osoku mbakandahandi.

¹³ Mikale akose ekishi, akakietamia lu tangi, akakitsha ekuhu ka mbudi lu weko ato, akakife ulangitshi.

¹⁴ Lamʼakatumi Saulu akendji la ntosa Davidi, wadendi akawatela ad: Ndi la kandji.

¹⁵ Saulu akatumi antu dia ntenda Davidi, akawatela ad: Nyutumbelandi lu tangi kandi, ndjudiaki.

¹⁶ Lamʼakoto antu ako, watani ku ekishi kene keli lu tangi, la ekuhu ka mbudi lu weko ato.

¹⁷ Saulu akambula Mikale ati: Ukundi akayankeshi okone, ndu kakayakimwi utunyi ami dia ndi mpanda? Mikale akûkaluya diui ati: Ndi akamvutedi ati: Unkimo ntshu, naka kema, ku dimi nkudiaka.

¹⁸ Okone Davidi akalawo, akahandi; akatukuma le Samuele la Rama. Ndi akatuwutela akambu tshe wakutshela Saulu. Ku ndi la Samuele wakatshu, wakatudjase la Nayota.

¹⁹ Wakayutela Saulu vati: Davidi eko la Nayota ka la Rama.

²⁰ Saulu akatumi antu dia ntunda Davidi. Vo wakenyi ului wa amvutshi wakataka akambu wahatayi, la olombodi awo Samuele emadi. Nyuma ka Unyashungu kakahema akendji wa Saulu, ku ndu vo wakad akambu wahatayi.

²¹ Lamʼakawatela Saulu dikambu so, ndi akatumi akendji akina, ku ndu vo wakatuta akambu wahatayi. Saulu akatumi akendji etena ka satu, ku ndu vo wakatuta akambu wahatayi pupu.

²² Lʼokongo diku, Saulu ndame akatshu la Rama. Ndi akatukuma lʼeteko ka la Seku; akambula antu ati: Lendʼeli Samuele la Davidi? Ku untu omotshi akûkaluya diui ati: Ulungi, la Nayota ka la Rama kewo.

²³ Ku ndi akatshu la Nayota ka la Rama. Nyuma ka Unyashungu kakatuwahema ndu ndi. Ku lamʼakandatatshokaka, ndi aki lu ntati akambu wahatayi, edja ndu lamʼakandakumi la Nayota ka la Rama.

²⁴ Ndi akakulula ahondo andi, ndu ndi akataka akambu wahatayi la ntundu ka Samuele. Ndi aketama utakataka yanyi ku tshe, ndu utshu tshe. Diako mbatuwutaka vati: Ndu Saulu kaya lʼului wʼamvutshi?