1 Samuele 18 - La Bible en Otetela (Bible K'Ekila) 1991

Jonatana Ambokota la Davidi Lusalu

¹ Lamʼakashidiya Davidi nsawula la Saulu, utema wa Jonatana akakelekama lʼutema wa Davidi. Jonatana akukaka Davidi ngandji uku akandayaukaka.

² Ku lushi lako, Saulu akose Davidi lakandi. Ndi kumbetawo ndi nkalula lakawo ntu.

³ Ku Jonatana akakote la Davidi lusalu, ne dia ndi akawukaka ngandji uku akandayaukaka.

⁴ Ndi akakulula ukutu wakandalote, akawusha Davidi. Ndi akawusha ahondo la yombo, uta la uya.

⁵ Davidi akatshokaka lu ahuli tshe wakutumaka Saulu. Ndi akayakimelaka la yimba. Saulu akawete olombodi wʼalimbi, ku dikambu so diakangenyangenya antu tshe ndu ekambi wa Saulu.

Saulu Ambuka Davidi Kandjema

⁶ Davidi akatukalula lamʼakandatudiaka usi Filistiya. Lamʼakawayakalulaka, amantu wakatumbi uma lʼesumba tshe wa Isariyele, dia ndjuhumana la khumʼekanga Saulu wayimbi, wayano wenye, wayahumi ngomo la sese, ndu wayadji waelu wʼongenongeno.

⁷ Amantu wakayimbaka wayetshanya vati: Saulu akadiaki kinunu kinunu, Keli Davidi nunu dikumi dikumi.

⁸ Dikambu so kongenyangenya Saulu. Ku ndi akumala. Ndi akati ati: Vo wambandula Davidi la antu nunu dikumi dikumi, ku dimi paka kinunu kinunu. Ndi hayuhumba nduku engo, tshikima diulelu tu.

⁹ Umaka lushi lako, Saulu akendaka Davidi la su dia kolo.

¹⁰ Ku la wedi a pindju, odienge akayi uma le Unyashungu, akayahema Saulu wulu. Ku Saulu akateketaka wulu oteketateketa lu luudu. Ku Davidi akuhumela losese uku akandahumaka nshi kina. Saulu akakimela dikonga lu lunya.

¹¹ Saulu akedia dikonga ata ati: Layumamanya Davidi la eheli. Ku Davidi akasandjo tena pendi.

¹² Saulu akukaka Davidi woma, ne dia Latuyalaka aki la Davidi, ku ndi akamo uma le ndi.

¹³ Okone Saulu akawanganya uma lasuki la ndi, akawudji olombodi wʼantu kinunu. Davidi akalombolaka ololo.

¹⁴ Ndi akaluwanaka lu elimu tshe wakandatshaka, ndu Latuyalaka aki kame la ndi.

¹⁵ Lamʼakenyi Saulu ati: Akambu wa Davidi nduwanaka, ndi akawukaka woma.

¹⁶ Keli asi Isariyele tshe la asi Juda wakukaka Davidi ngandji, ne dia ndi akalombolaka ololo.

¹⁷ Saulu akatela Davidi ati: Merabe, onʼami a umuntu lʼenundu, one; dimi layukushandi wadi. Dikambu otoi, uyali la dihunga, oloki ata wa Latuyalaka. Ku Saulu akataka lʼutema ati: Dime halangi mbahe lunya, keli asi Filistiya kawndiaki.

¹⁸ Ku Davidi akakaluya Saulu diui ati: Kemi na? ndu lumu lami kelo? Khumbu ka papa keli na lu Isariyele, dia dimi ndjala ukilu wa khumʼekanga?

¹⁹ Keli lʼetena kakakuki Saulu mbisha Davidi onʼandi Merabe wadi, ndi akawusha Adiriyele, usi Mehola, wadi.

²⁰ Mikale akukaka Davidi ngandji efula. Wakayutela Saulu lukumu lako, ku ndi akangenangena.

²¹ Saulu akati ati: Dimi layuwusha Davidi, dia ndi ndjala djunga le ndi, ku ndi ayudiakema le asi Filistiya.

²² Okone Saulu akatela Davidi etena ka hendi ati: Elo, we utsha ndjala ukilu ami. Saulu akatela ekambi andi ati: Nyusawuli la Davidi lu usheshe, nyuwuteli nyati: Khumʼekanga nkongenangenaka efula, ndu ekambi andi tshe nkukaka ngandji efula. Okone uyali ukilu andi.

²³ Ekambi wa Saulu wakatutelaka Davidi aui ako. Ku Davidi akakaluya diui ati: Undi, nyu nkanaka nyati: Dikambu dia tshitshe mbedio, dia dimi ndjala ukilu wa khumʼekanga, dimi untu leli usi wula ndu laha la lukumu?

²⁴ Ekambi wa Saulu wakatuwutela uku akakaluya Davidi diui.

²⁵ Ku Saulu akati ati: Nyuteli Davidi nyati: Khumʼekanga halombe nduku ekundji, paka toto lukama yʼasi Filistiya tshu, dia nsomboya atunyi andi. Saulu akalungamela dia asi Filistiya ndjaka Davidi.

²⁶ Lamʼakawatela Davidi aui aso, ndi akangenangena dia ndjala ukilu wa khumʼekanga, ntundu nshi yakandulaki yatakuki.

²⁷ Davidi akunela ndi la alimbi andi, vo wakatudiaka apami wʼasi Filistiya kama hyendi. Ku Davidi akela toto yawo, akayuyisha khumʼekanga yo tshe, dia ndi ndjala ukilu andi. Ku Saulu akawusha onʼandi Mikale wadi.

²⁸ Keli lamʼakenyi Saulu, ndu akandalimbitelaati: Latuyalaka eko la Davidi; ndu ati: Isariyele tshe mbulangaka,

²⁹ Saulu akatatamanyaka mbuka Davidi woma. Okone Saulu akayala utunyi wa Davidi tena tshe.

³⁰ Lu nshi sho, ewandji wʼasi Filistiya wakayakaka lu ta. Tena tshe diakawayakaka, Davidi akalekaka ekambi tshe wa Saulu wulu lu ta. Okone lukumbu landi lakalemiama otekoya.