1 Samuele 16 - La Bible en Otetela (Bible K'Ekila) 1991

Davidi Ambosonwma Khumʼekanga

¹ Latuyaʼaka akambula Samuele ati: Edja ndu kaandi ayuyukimo ndela lu dikambu dia Saulu? Dimi lambutuna dia ndi mbulela Isariyele ntu. Uludia iso too lu luseki laye. Uneli, layukutuma le Jese, usi Betelehema. Dimi lambuyasonwela khumʼekanga uma lʼatei wa anʼandi wʼapami.

² Samuele akawumbula ati: Ukundi ayumutsha? Naka Saulu ambuka lukumu, ndi ayundjaka. Latuyalaka akûkaluya diui ati: Utshu la ngombe ka wadi, kututi wati: Lambuya la ndjulambula Latuyalaka ulambu.

³ Kuteti Jese lʼulambu. Ku dimi layukenya uku ayuyutsha. Kunkiteli one layumukutela iso.

⁴ Samuele akatshi uku akawutela Latuyalaka, akakumi la Betelehema. Dihangamendi diʼusumba wakalawo dia ntulungula wadidima. Vo wakawumbula vati: Ngandi, we ambuya la ki?

⁵ Ndi akakaluya diui ati: Elu; la ndjulambula Latuyalaka ulambu, kuyemi. Nyuyalongosole, tutshu la ntulambula ulambu. Ndi akakidia Jese la anʼandi wʼapami; akawaeti uya lu ulambu.

⁶ Lamʼakawakumi, Samuele akendi Eliyabe, akati lʼutema ati: Mete, one lakasonola Latuyalaka one, emadi la ntundu kandi.

⁷ Keli Latuyalaka akatela Samuele ati: Tendaki elundji kʼuntu kuyanga diema diandi, ne dia dimi lakutuni. Latuyalaka hatendaka kene katendaka untu. Ne dia untu atendaka kene kenandi lu ashu, keli Latuyalaka atendaka utema.

⁸ Jese aketi Abinadaba, akawetsha la ntundu ka Samuele. Keli ndi akati ati: Kema, Unyashungu konsonola one.

⁹ Jese aketi Shama. Ku Samuele akati ati: Kema, Latuyalaka konsonola one.

¹⁰ Jese aketsha anʼandi wʼapami esambeli la ntundu ka Samuele. Keli Samuele akatela Jese ati: Latuyalaka kumbasonola nduku otoi.

¹¹ Ku Samuele akambula Jese ati: Anʼaye tshe kene? Ndi akûkaluya diui ati: Paka ona la kushi kambutshikala. Keli ndi eko lu nama ekoko. Samuele akatela Jese ati: Utumi untu, atuweti. Shu hatudjase, tshikima ndi ambuya.

¹² Ndi akatumi untu la ntuweta, ku ndi akatuya la ndi. Ndi aki la elundji ka ngaingai, la ashu wʼamena. Ndi aki dimena efula. Ku Latuyalaka akawutela ati: Uneli, ukiti iso, ndukʼuku.

¹³ Samuele akose luseki lʼiso, akakiteto lʼatei wʼanangu. Nyuma ka Latuyalaka kakahemaka Davidi umaka lushi lako. Ku Samuele akunela, akakalula utsha la Rama.

Davidi Ambuhumela Saulu Losese

¹⁴ Nyuma ka Latuyalaka kakamo uma le Saulu, ku odienge akayi uma le Latuyalaka dia mbohenyahenya.

¹⁵ Ekambi wa Saulu wakawutela vati: Mete, odienge uma le Unyashungu mbakohenyahenya.

¹⁶ Kakiane we khumʼesu, uteli ekambi aye weli la ntundu kaye, wakuyangeli untu leya mpuma losese dimena. Okone lamʼayukahemaka odienge uma le Unyashungu, ndi kakuhumelaki losese, ku we ayukaka yema.

¹⁷ Ku Saulu akakaluya ekambi andi diui ati: Nyunyangeli untu leya mpumba losese dimena; nyumbelandi.

¹⁸ Ku ukambi andi omotshi akûkaluya diui ati: Mete, dimi lakenyi onʼa Jese omotshi, usi Betelehema, leya mpuma losese. Ndi eko pami ka wulu, kanga dihunga, ndu ondoshi wa ta. Ndi nteketaka ololo; ndi eko dimena efula. La Latuyalaka eko la ndi.

¹⁹ Okone Saulu akatumi akendji le Jese la ntuwutela ati: Untumeli onʼaye Davidi, leli lu nama ekoko.

²⁰ Jese akose punda, akakiahe mbu ya nde, uhundi a wanu, la onʼa mbudi. Ku ndi akatumela Saulu diango diako le onʼandi Davidi.

²¹ Davidi akakumi le Saulu, akemala la ntundu kandi, ku Saulu akongenangena efula. Ndi akawete omembi wa dihumo diandi dia ta.

²² Saulu akatumela Jese diui ati: Lambokosengasenga nti: Unkimweli Davidi, atshikali lasuki la mi, ne dia dimi lambongenangena efula.

²³ Lamʼakamamelaka odienge wʼuma le Unyashungu Saulu, Davidi akosaka losese, akahumaka. Dikambu so diakangenyangenyaka Saulu. Ndi akukaka yema; odienge akamoka le ndi.