1 Samuele 12 - La Bible en Otetela (Bible K'Ekila) 1991

Daku dia Samuele le Antu

¹ Samuele akatela Isariyele ati: Nyendi lakanyukela lu aui tshe wakanyamvutela. Lakanyudjela khumʼekanga layunyulela.

² Kakiane, nyendi khumʼekanga, layokendakendaka la ntundu kanyu. Dimi laya usumbi, ote waya wema. Enda, onʼami wʼapami weko lʼatei anyu. Dimi lakanyolombolaka uma lu nshi yami ya dikenda edja ndu elo.

³ Dimʼone, nyuti akambu ami la ntundu ka Latuyalaka ndu ka one lakandakiti iso. Nyuti naka dimi lakose ngombe kana punda kʼuntu, kana lakasuya untu. Naka dimi lakalungula mbu yʼutshu uma le untu, dia mbulami ashu lu dikambu diandi, dimi kankaluya.

⁴ Ku vo wakûkaluya diui vati: We kuntukesa, we kuntusuya, we kombosa engo uma le untu.

⁵ Ndi akakaluya diui ati: Latuyalaka la one lakandakiti iso weli emenyi lʼasami la nyu elo ati: Nyu hanyutanyi engo lu anya ami. Ku vo wakati vati: Ndi eli omenyi lu dikambu diako.

⁶ Samuele akatela antu ati: Latuyalaka kakasonola Mose la Arona. Ndʼako kakatundja washenyu uma lu kete yʼEdjibitu.

⁷ Kakiane, nyuyali ki la ntundu ka Latuyalaka, keli nyeyi akambu tshe wʼololo wakandanyutshela ndu nyu ndu washenyu.

⁸ Lamʼakakumi Jakoba lʼEdjibitu, asi Edjibitu wakasuyaka washenyu. Okone vo wakalelela Latuyalaka, ku ndi akatumela Mose la Arona. Vo wakatundja washenyu uma lʼEdjibitu, wakayadjasha lu dihuli ne.

⁹ Keli washenyu wakuhela Latuyalaka, Unyashungu awo. Ku ndi akakimo lʼanya wa Sisera, olombodi wʼalimbi wa la Hazora, lu anya wʼasi Filistiya, ndu lʼanya wa khumʼekanga ka asi Moaba, wako wakalokaka la wo.

¹⁰ Ku vo wakaleli le Latuyalaka, vati: Shu takatshi kolo, ne dia takakutuni, we Latuyalaka. Shu takatendela WaBala la WaAshitarota. Kakiane, utushimbeli uma le atunyi asu, ku tayukotemolaka.

¹¹ Okone Latuyalaka akatumi Jerubala, Baraka, Jefeta la Samuele. Ku ndi akanyushimbela uma lu anya wʼatunyi anyu wakanyudingi. Okone nyu nyakayala la lutui tshitshi.

¹² Lamʼakanyenyi Nahashi, khumʼekanga ka Amona, ayayi dia ndjunyolosha, nyu nyakamvutela nyati: Kema, paka shu ndjala la khumʼekanga ka ntulela. Keli Latuyalaka, Unyashungu anyu, aki khumʼekanga kanyu.

¹³ Kakiane, nyendi khumʼekanga kakanyayangi, ndu kakanyalombe. Nyuki, Latuyalaka ndame kambunyudjila khumʼekanga.

¹⁴ Naka nyu nyayukaka Latuyalaka woma, naka nyayotemolaka, naka nyayukitanyiaka aui andi, naka nyu hanyuhendudi elembe wa Latuyalaka, ndu naka nyu nyayuyelaka Latuyalaka, Unyashungu anyu, ndu nyu ndu khumʼekanga kambunyulela, ku kawo.

¹⁵ Keli naka nyu hanyukitanyisha diui dia Latuyalaka, ndu nyayutuna elembe wa Latuyalaka, ku lunya la Latuyalaka layunyusuya wulu uku akalasuya washenyu.

¹⁶ Okone nyukungi lane kakiane. Nyendi dikambu dia mamba ne diayanga Latuyalaka ntsha la ashu anyu.

¹⁷ Aha lu nshi ya dinela kesu? Dimi layolomba Latuyalaka dia ndi ntuma akhungula la mvula. Nyenyi, nyeyi wuki wa kolo kakanyatshi lu ashu wa Latuyalaka dia nomba khumʼekanga.

¹⁸ Okone Samuele akalombe Latuyalaka. Ku ndi akatumi akhungula la mvula lushi lako. Ku antu tshe wakuki Latuyalaka la Samuele woma utamanya.

¹⁹ Antu tshe wakatela Samuele vati: Utolombele shu ekambi aye Latuyalaka, Unyashungu aye, tutukuvo. Mete, shu tambahe munga kene ka shu ndjalombela khumʼekanga ladiku dia kolo yasu tshe.

²⁰ Samuele akakaluya antu diui ati: Tanyukaki woma! Mete, nyu nyambutsha kolo kene ka wuki. Dikambu otoi, tanvumoki uma le Latuyalaka. Keli nyotemolaki lʼutema otoi.

²¹ Tanyumoki uma le ndi. Naka nyu nyayumo uma le ndi, nyu nyayuyela diango diʼanyanya diaheyi nyukundjiya waho kuyanga nyushimbela, ne dia dio dieli anyanya.

²² Latuyalaka hoseka wudja andi, ne dia lukumbu landi la wuki. Ndi akangenangena dia nyete wudja andi hita.

²³ Ndu kanyi ya dimi ntshela Latuyalaka kolo dia nkimo nyolombela yeko etali uma le mi! Ndu dimi layunyetshaka mbuka kʼololo ndu kusimbwi.

²⁴ Keli dikambu otoi, nyukaki Latuyalaka woma, nyotemolaki la kolamelu ndu lʼutema otoi. Nyukanaki yimba lu akambu a waki wakandanyutshela.

²⁵ Keli naka nyayutetemala ntsha kolo, wayunyudiaka ndu nyu ndu khumʼekanga kanyu.