1 Samuele 10 - La Bible en Otetela (Bible K'Ekila) 1991

¹ Samuele akose sayi kʼiso, akakitela Saulu lʼote, akukhumbatela; akawutela ati: Aha Latuyalaka kambukukita iso dia we ndjala uwandji a wudja andi wʼukito? We ayulela wudja wa Latuyalaka. We ayashimbela uma le atunyi wadingi. Dikambu ne diamumukutshela dieli djimbitelu le ye ati: Latuyalaka ambukosonola dia we ndjala khumʼekanga ka wudja andi wʼukito.

² Lamʼayuyumo uma la le mi elo, we ayututana apami ahendi lasuki Ja diumbu dia Ratshele, la Zeleza lu ulelu wa Bendjamina. Vo wayukutela vati: Punda yakayatshu dia ntuyanga, yakene. Kakiane sho ambutshika dikambu dia punda, ukulela we, ati: Ayumutsha ntu dikambu dia onʼami?

³ We ayutsho uma leko, we ayutukuma lʼutamba wʼulungu wa la Tabora. Laawo, we ayutuhumana la apami asatu watatshu le Unyashungu la Betele, omotshi ayembe ana asatu wa mbudi, ukina ekama esatu wa ma la ukina uhundi wa wanu.

⁴ Vo wayukemula, wayukusha ekama ehendi wa ma, kelunguli uma le wo.

⁵ Lʼokongo diku, we ayukuma lu dikuna dia Unyashungu, lene udjashi alimbi wʼasi Filistiya. Lamʼayuyukuma lʼusumba ako, we ayutuhumana la ului wʼamvutshi wayahulo uma lu dihuli dia ladiku, ndu ahumi wayuhumi ngomo, sese, akembi la pungi la ntundu kawo. Ku vo vame wayuta akambu wahatayi.

⁶ Nyuma ka Latuyalaka ayukahema wulu, ku ndu we ayuta akambu wahatayi kame la wo; la we ayukadimo untu ukina.

⁷ Lamʼayenama tulimbitelu tone le ye, kutshi akambu tshe wayuyutana dia ntsha, ne dia Unyashungu eko kame la ye.

⁸ Kutateli ntsho la ntundu kami utsha la Ngilingala, dimi layukuyela dia ntulambula ulambu wa lutshumba la elambu wa ki. Kutunkungi leko nshi esambeli, edja ndu lamʼayumukuma, dia ndjukenya akambu wayuyuhumba ntsha.

⁹ Kamʼakandediya Samuele okongo dia ndi mamwana la ndi, Unyashungu akawusha utema ukina. Ku tulimbitelu tako tshe takenama le ndi lushi lako.

¹⁰ Lamʼakawakumi la Ngibeya, wendi ku ului wʼamvutshi one wayayi dia ndjuhumana la ndi. Nyuma ka Unyashungu kakawahema wulu, ku ndi akati akambu wahatayi kame la wo.

¹¹ Lamʼakenyi waku wakaweyaka ntundu vati; Ndu ndi uta akambu wahatayi kame la amvutshi, vo wakambwana vati: Na dikambu diambuya le onʼa Kisha ne? Ndu Saulu kaya lʼului wʼamvutshi?

¹² Usi Ngibeya omotshi akawambula ati: Akona eli shewo? Diako mbatuwutaka lu yukedi vati: Ndu Saulu kaya lʼului wʼamvutshi?

¹³ Lamʼakandashidiya mvuta akambu wahatayi, ndi akambela utsha lu dihuli dia ladiku.

¹⁴ Onangu shi Saulu akawambula, ndi la ukambi andi, ati: Lendi akanyatshu? Saulu akûkaluya diui ati: La ntuyanga punda. Keli lamʼakisu kundjena, shu takatshu le Samuele.

¹⁵ Onangu shi akosengasenga ati: Onsanyia aui wakakutela Samuele.

¹⁶ Saulu akûkaluya diui ati: Ndi akatutela hwe ati: Punda yakenama. Keli ndi kumbutela nduku diui lu dikambu dia diulelu diakawutela Samuele.

¹⁷ Samuele akamotsha asi Isariyele la ntundu ka Latuyalaka la Mizipa.

¹⁸ Ndi akawatela ati: Latuyalaka, Unyashungu wa Isariyele, kata okone ati: Isariyele, dimi lakanyutundja uma lʼEdjibitu, lakanyutshungula uma lʼanya wʼasi Edjibitu, ndu uma le waulelu tshe wakanyusuyaka.

¹⁹ Elo kene, nyu nyambuntuna dimi, Unyashungu anyu, latunyushimbelaka uma lu pa yanyu la asui anyu. Keli nyu nyakati nyati Kema, utusha khumʼekanga dia ndi ntulela! Kakiane, nyutumbi la ntundu ka Latuyalaka uku wauhu anyu lu elui wa kinunu kinunu.

²⁰ Samuele akasukanya wauhu tshe wa Isariyele, ku diuhu dia Bendjamina diakandama uwali.

²¹ Vo wakasukanya diuhu dia Bendjamina uku khumbu yawo, ku khumbu ka Matiri kakandama uwali. Saulu, onʼa Kisha, akandama. Wakuyangi, keli kumbena.

²² Okone vo wakambula Latuyalaka ntu vati: Undi, untu ukina ekiko lahatakumi lane? Ku Latuyalaka akakaluya diui ati: Nyendi, ndʼone ushami lʼatei wʼetshumu.

²³ Vo wakalawo, wakatuwosa. Lamʼakandayemala lʼatei wʼantu, ndi akaleki vo tshe utali; wakawundaka paka lu diheka.

²⁴ Samuele akatela antu tshe ati: Nyu hanyenyi one lakanyosonwela Latuyalaka? Nduku untu lʼatei a wedja tshe ledimi la ndi. Ku wudja tshe wakahangohango vati: Khumʼekanga ulumbi!

²⁵ Samuele akalimbitshiya antu akambu wayuvala lu diulelu. Ndi akafundi lu buku, akadikitsha la ntundu ka Latuyalaka. Ku Samuele akadianganya antu tshe lawakawo.

²⁶ Ndu Saulu akakalula utsha lakawo la Ngibeya. Antu wa tutshundju wakananda Unyashungu ete awo, wakatshu la ndi.

²⁷ Keli antu amotshi wʼanyanya, wakati vati: Yaa! untu one kayukuka ntushimbela? Ku wakawonyola, kumbulambula nduku engo. Keli ndi akatshikala ki.