1 Samuele 1 - La Bible en Otetela (Bible K'Ekila) 1991

Eutwelu ka Samuele

¹ La Ramatayina-Zofima ka lu leke lʼakuna wa Efarayima kaki pami kemotshi, lukumbu landi Elekana, onʼa Jerohama, onʼa Elihu, onʼa Tohu, onʼa Zufu, usi Efarayima.

² Ndi aki la wadi ahendi: Hana, la Penina. Penina akuti ana, keli Hana aki ekumba.

³ Pami kako akunelaka uma lʼusumba andi lʼeleku lʼeleku utsha la Shilo, dia ntotemola Latuyalaka, Kanga lulimbilimbi, la dia ntulambula elambu. Leko kaki ana apami ahendi wa Eli: Hofeni la Finehasi, elombedi wa Latuyalaka.

⁴ Lamʼakakukaka etena ka Elekana nambula ulambu, ndi akashaka wadendi Penina la anʼandi wʼapami tshe ndu wʼamantu wakanduti la ndi, tenyi diawo.

⁵ Keli ndi akashaka Hana tena pendi, ne dia ndi akulangaka efula, keli Latuyalaka akawete ekumba.

⁶ One lakasusanaka la ndi diwala, akohenyahenyaka, ne dia Latuyalaka akawete ekumba.

⁷ Osoku mbakandohenyanenyaka lʼeleku lʼeleku lamʼakandatshokaka utsha lu luudu la Latuyalaka. Okone Hana akalelaka, kundeka ma.

⁸ Umendi Elekana akawumbula ati: Hana, okoko wana walelaye, ndu wahayali ma? Dikambu diakona diambunyangia utema aye? Undi, dimi handeki ana apami dikumi le ye?

⁹ Lamʼakawashili nde la no la Shilo, Hana akunela. Lʼetena keso, ku olombedi Eli udjashi lu edie kandi lʼekoho ka suku dia luudu la Latuyalaka.

¹⁰ Hana aki la wutshu a wulu lʼutema, akalombe Latuyalaka, akaleli wulu.

¹¹ Ndi akatshiki dokoloko ati: Latuyalaka, Kanga lulimbilimbi, naka we ayetawo menda lunyangu lami lone, dimi ukambi aye, naka we ayumbuho aha mbuhelami, dimi ukambi aye, ndu naka we ayumbisha, dimi ukambi aye, ona pami, dimi layukimo le ye, we Latuyalaka, nshi tshe ya lumu landi. Ndi hanyaki divu dia lʼote andi pundju.

¹² Lamʼakandalombe edja la ntundu ka Latuyalaka, Eli akawendaka lʼunyo.

¹³ Hana akalombaka lʼutema. Diui diandi kumbukema, paka elomo andi etu mbakakendakendaka. Ku Eli akakani ati: Ndi akadjwi wanu.

¹⁴ Okone Eli akawumbula ati: Edja ndu kaandi ayuyukimo mbidjo wanu? Ukimo etshelu ka no wanu.

¹⁵ Hana akûkaluya diui ati: Kema, khumemi, dimi hanwe nduku wanu kuyanga enono ka wulu. Dimi leli umuntu lambulula too la lunyangu lʼutema. Dimi lambukale utema ami la ntundu ka Latuyalaka.

¹⁶ Tenaki ukambi aye uku umuntu a kolo, ne dia efula ka lunyangu lami la ohenyohenyo lʼutema mbanteketsha edja ndu kakiane.

¹⁷ Eli akûkaluya diui ati: Utshu la ki, Unyashungu wa Isariyele uki dombelo diaye!

¹⁸ Ku Hana akûkaluya diui ati: Ukambi aye a umuntu ahumo lukulu lʼolo lu ashu aye. Ku ndi akatshu, akatole, kundjala la lunyangu ntu.

¹⁹ Vo waketo kʼolomo la pindju, wakatemola Latuyalaka. Vo wakakalula, wakatukuma lakawo la Rama. Elekana akeyana la wadendi Hana, ku Latuyalaka akawuho.

²⁰ Kʼeleku kako, Hana akatshu diemi, akuti ona pami. Ndi akawole lukumbu ati: Samuele, ata ati: Dimi lakolombe Latuyalaka.

²¹ Elekana la khumbu kandi wakatshu dia ntulambula Latuyalaka ulambu wakawalambulaka eleku lʼeleku, ndu dia ntushidiya dokoloko diandi.

²² Keli Hana kuntsho, ndi akatela umendi ati: Dimi hatshu, edja ndu ona ambukila awele, dia ntuweme la ntundu ka Latuyalaka, ndu dia ndi ntutshikala leko pundju.

²³ Umendi Elekana akûkaluya diui ati: Kawo, utshi uku ayuyala ololo lu ashu aye. Utshikali edja ndu lamʼayuyukidia awele. Latuyalaka ashikike diui diandi. Okone umuntu akatshikala, akalomiaka ona edja ndu lamʼakandukidia awele.

²⁴ Lamʼakandukidia awele, ndi akotole; akatshu ndu la ngombe ka deku satu, saka dia shima, la uhundi a wanu. Ndi akakumi la ndi lu luudu la Latuyalaka la Shilo. Laso ku ona eki dikenda.

²⁵ Vo wakadiaki ngombe kako; ku wakayi la ona le Eli.

²⁶ Hana akawutela ati: Khumemi, undu we hayumbeya. Uku weye la lumu! dimi leli umuntu lakalombaka Latuyalaka lane lasuki la ye

²⁷ Dimi lakolombaka ona, ku ndi akambisha onʼone.

²⁸ Okone dimi lambukimo le Latuyalaka, dia ndi ntshikala lu anya andi nshi ya lumu landi tshe. Ku vo wakatemola Latuyalaka.