1 Petero 3 - La Bible en Otetela (Bible K'Ekila) 1991

Daku le Wadi

¹ Okone nyu amantu, nyetawo aui a waumenyu, ne dia naka amotshi hawukitanyia diui dia Unyashuhgu ndu waha la diui dia Unyashungu, wayudietawo ne dia ditshelu dia wadiewo

² lamʼayuwena ditshelu dianyu diʼololo diosohanyi la woma.

³ Tanyusaleugaki la elelo ka divu, elengelo ka diango dia paunyi, kuyanga kʼelotelo kʼahondo.

⁴ Keli nyuyali la elengelo kʼushami lʼutema, elengelo kʼutema a memakana la ki kahalana, kʼushinga a wulu lu ashu a Uanyashungu.

⁵ Uku etshelu kene, amantu wʼekila wʼedjedja wakalungamelaka Unyashungu, wakayalenge, waketawo aui a waumewo.

⁶ Uku Sara, akakitanyiaka diui diʼAbarahama, akaweti Khumadioudio. Tukanula tandi mbenyu kakiane, naka nyu nyayutsha ololo la hanyutshama woma.

Daku le Waumi

⁷ Ndu nyu apami, nyudjase la wadienyu la yimba, uyuwalemiane dia vo wambunyuleka wodu, la dia vo weko ekito kame la nyu wa ngandji ka mamba ka lumu, dombelo dianyu diatukushimbama.

Daku le Antu Tshe

⁸ Diui dia ndjihelu ne, nti: Nyu tshe, nyuyali la utema otoi. Nyukani ketshi, nyukani ngandji uku untu lʼonangu. Nyuyali la etema wa memakana, nyuyakitshakitsha.

⁹ Tanyukaluyaki kolo lu kolo, kuyanga lotengo lu lotengo, keli nyotshokwani ne dia nyaketama dia dikambu ne, dia nyu nkita otshoko.

¹⁰ Ne dia, Untu latulangaka lumu, La atulangaka mena nshi yʼololo, Ashimbi lulimi landi uma lu kolo, Ndu elomo andi tawutaki kashi.

¹¹ Ndi akadimo uma lu kolo, atshaki ololo; Ayangi ki, akiyeli.

¹² Ne dia ashu wa Khumadiondjo weko le antu wʼololo, Atui andi weko hwe lu dombelo diawo. Keli elundji ka Khumadiondjo keko le atshi wa kolo.

Nyuyali la KhumʼUtema kʼOlolo: Wane Wasuwa DiʼAkambu wʼOlolo Weko la Otshoko

¹³ Untu akona ayunyutshela kolo, naka nyu la saki ka ntsha akambu wʼololo?

¹⁴ Keli naka nyu nyayusuwa diʼakambu wʼololo, nyu nyayotshokwama Tanyuwaukaki woma, tanyudidimaki.

¹⁵ Keli nyukidia Kristu uku Khumadiondjo lu etema anyu. Nyutayalongosodi dia nyu mbeya lama nkaluya diui le untu tshe lanyumbula, dia elungamelu keli lʼetema anyu. Keli nyutshi okone la memakana la woma.

¹⁶ Nyuyali la khumʼutema kʼololo, okone lu akambu, wane wanyosongwela, watonyolaka ditshelu dianyu diʼololo le Kristu, wayutshama sonyi.

¹⁷ Naka Unyashungu nangaka okone, nsuyama dia ololo ambuleka nsuyama dia kolo ololo.

¹⁸ Ne dia ndu Kristu akavu etena otoi ne dia kolo, untu ololo akasuwela antu wa kolo, ne dia ntela le Unyashungu. Dimba diandi diakadiakema, keli ndi aki la lumu lʼutema.

¹⁹ La lumu lako mbakandatshu la ntusambisha nyumu ya wa lu lukanu la nyoi,

²⁰ yaki la uhedia ntundu. Lamʼakakungaka memakana ka Unyashungu lu nshi ya Noa, lamʼakandatshaka watu a luudu, antu tshitshe mbakashimbamela loko lʼashi: antu enanei atu.

²¹ Dikambu ne dieko uku djimbitelu ya mete ya batiza kanyushimbela kakiane, aha dia minya mindu ka dimba, keli dia nomba khumʼutema kʼololo le Unyashungu uma lʼeulwelu ka Jesu Kristu.

²² Ndi akatshu lʼulungu, eko la lunya la pami la Unyashungu; andjelo, akanga a waulelu la akanga a wulu wakayala lʼokongo andi.