1 Petero 2 - La Bible en Otetela (Bible K'Ekila) 1991

“Nyeko Wudja Wakawasonola, Elombedi wa lu Diuhu Dia Khumadiondjo, la Wudja wʼEkila”

¹ Okone nyunya kolo tshe, ndu adimbiyelu tshe, ndu kesu, ndu kandjema, ndu tendo tshe.

² Nyuyali uku ana wutshiwo kakiane. Nyulangi awele wa diui diʼololo diaha la lukesu, dia nyu mbula lu diui ne edja ndu nyayutana panda;

³ ne dia nyu nyambunganela memakana ka Khumadiondjo.

⁴ Nyuyi le ndi, le dive dia lumu, diakatuni antu, keli dio diakasonwama le Unyashungu, ndu dieko ushinga a wulu.

⁵ Okone ndu nyu nyeko uku ave wa lumu, wambunyete uku luudu la Nyuma, dia nyu ndjala elombedi wʼekila, ne dia nambula elambu wa Nyuma, wangenyangenya Unyashungu le Jesu Kristu.

⁶ Ne dia diui ne diambufundama lu efundelu ati: Enda, dimi lambushikike dive la Siona, Dive dia tshuku, diosonami, diʼushinga a wulu. One lawetawo, hutshama sonyi.

⁷ Ndi eko ushinga a wulu le nyu, nyu wane wetawo. Keli le wane wahetawo, Dive diakatuni ambiki wa luudu, Diakawakitsha lʼote a tshuku,

⁸ la, Dive, diayutakanya antu, Dive dia wuki diayuwamba, ne dia vo wambutakana lu diui, weko la uhedia, wakasonwama lu dikambu ne.

⁹ Keli nyu nyeko wudja wakawasonola, nyeko elombedi wa lu diuhu dia khumʼekanga, la wudja wʼekila, antu wa Unyashungu ndame, dia nyu menya akina ololo wa one lakanyeti uma lu udjima utsha lu yanyi yandi ya mamba.

¹⁰ Takinyu antu andi ntundu, keli kakiane nyambuyala antu wa Unyashungu. Nyu kunkundja ketshi ntundu, keli kakiane nyambukundja ketshi.

Nyetawo Elembe wʼAntu ne Dia Khumadiondjo

¹¹ Elangimi, dimi lambunyosengasenga uku angendangenda la ambitshanyimi nti: Nyoseke saki ya dimba, yatoloshaka etema anyu ta.

¹² Nyuyali la ditshelu diʼololo lʼatei wʼasi wedja. Okone, naka wambunyosongwela vati: Nyu nyeko atshi wa kolo, naka vo wayena etsha anyu wʼololo, ku vo wayutumbula Unyashungu, lu lushi layundakendela.

¹³ Nyetawo elembe tshe wʼantu ne dia Khumadiondjo, kuyanga wa khumʼekanga ka wuki, leli ladiku dia tshe,

¹⁴ kuyanga wʼembuledi wakandatumi dia nsobwela atshi wa kolo, la dia nemia atshi wʼololo.

¹⁵ Ne dia Unyashungu nangaka nyu nembohaya eteketateketa wʼakanga a dinginya lu ditshelu dianyu diʼololo.

¹⁶ Nyuyali uku akanga a ndjadjasela, keli kanyeteki ndjadjasela kanyu uku ukumbo wa nkumba kolo, keli nyuyali uku ekambi wa Unyashungu.

¹⁷ Nyolemia antu tshe. Nyulangi anyanyu. Nyuki Unyashungu woma. Nyolemia khumʼekanga ka wuki.

Daku le Ekambi

¹⁸ Ekambi, nyetawo aui wa akhumenyu la woma tshe, aha le wane wʼololo la memakana atu, keli ndu le akanga a ngala.

¹⁹ Dikambu ne mbetawomaka, naka untu ayushikikala lu nyangu lamʼawusuyawo anyanya, ne dia khumʼutema kandi keko le Unshashungu.

²⁰ Lutumbu lakona leko, naka nyayetawo lʼetetemalu lamʼayuwunyokomola ne dia akambu wa kolo wakanyatshi? Keli naka nyu nyayutsha ololo, la nyayetawo lʼetetemalu lamʼanyusuyawo, dikambu diako mbetawomaka lu ashu a Unyashungu.

²¹ Nyu nyaketama dia dikambu diako, ne dia Kristu akanyusuwela, akanyutshikela djimbitelu, dia nyu mbuyela lu wanya andi.

²² Ndi kuntsha dikambu dia kolo, kuntanema la lukesu lʼunyo andi.

²³ Lamʼakawotenge, ndi kumbatenga. Lamʼakandasuyama, ndi kumbanela, keli ndi akayakimo le one latulumbwanyaka ololo.

²⁴ Ndi akatembela wutshu wa kolo yasu lu dimba diandi lʼutamba, dia shu wane wakavu lu kolo ndjala la lumu lu akambu wʼololo. Nyu nyakakono dia wimbo andi.

²⁵ Ne dia nyu nyakanganela uku ekoko, keli kakiane nyambukalula le Ulami la Umumbi a nyumu yanyu.