1 Petero 1 - La Bible en Otetela (Bible K'Ekila) 1991

Ambuwaemula

¹ Petero, utumami a Jesu Kristu, Le ambitshanyimi wa lʼehandjwelu wudjashi la Poto, ndu la Ngalatiya, ndu la Kapadokiya, ndu lʼAsiya, ndu la Bituniya,

² wakasonama uku akeyi Unyashungu Shesu ntundu, lʼekidiamelu ka Nyuma, dia vo ndjala la ukitanyia la emongelo ka dikila dia Jesu Kristu: Ngandji ka mamba la ki kafuli lenyu!

“Sangu Dia Pundju, Diahalana, Diahashisho”

³ Watumbuli Unyashungu Shi Khumesu Jesu Kristu! Ndi akatuti ntu uma lu ketshi kandi ka wuki, dia shu ndjala la elungamelu ka lumu ne dia eulwelu ka Jesu Kristu uma lu nyoi;

⁴ dia shu ndjala la sangu diahahonde, diahalana, diahashisho, diakawanyukitshiya lʼulungu.

⁵ Nyu ane wambulamema lu wulu a Unyashungu dia mbetawo kanyu, nyayuyala la panda kayenyama le nyu lʼetena kʼekumelu.

⁶ Dikambu ne diambunyongenyangenya efula, naka nyu mpumbaka dia nyangiema etenyi ka tshitshe lʼehimba efula.

⁷ Ne dia ehimbelu ka mbetawo kanyu kuleki paunyi, katushishoka lamʼakihimbawo la dja ushinga a wulu, katanemi la diandu la lutumbu la kenemo lʼenelo ka Jesu Kristu!

⁸ One lakinyu komena, nyu nyambuwuka ngandji. Nyu hanyuwenyi, keli nyambuwetawo, nyambutamanya ngenangena lu ongenongeno a lutumbu waheyama mvuta.

⁹ Nyu nyambulungula panda lʼetema anyu uku ekundjelu ka mbetawo kanyu.

¹⁰ Amvutshi wakayangi, wakakumiakumia dia panda kene, wakati dia ngandji ka mamba kayuya le nyu.

¹¹ Vo wakayangi etena kakona la wuhu akona wʼetena kakawatela Nyuma ka Kristu kaki lʼetema awo lamʼakandawatela dia asui wa Kristu la ntundu, la dia lutumbu lakayayakaka lʼokongo awo.

¹² Akenyama le wo ati: Vo kundjatshela akambu ane vame, keli wakanyutshela akambu ane watama kakiane lʼenyo a wane wakanyusambisha lukumu lʼololo le Nyuma kʼOlolo, kakatumama uma lʼulungu. Andjelo nangaka menda akambu ako.

¹³ Okone nyolongosole tumba tanyu, nyuyali ki. Nyushikike elungamelu kanyu lu ngandji ka mamba kayuwunyusha lʼenelo ka Jesu Kristu.

¹⁴ Nyuyali uku ana wʼukitanyia. Tanyuyafanyaki la saki kanyu ka ntundu lamʼakinyu dinginya.

¹⁵ Keli one lakanyeti, eko ekila, okone ndu nyu nyuyali ekila lu ditshelu dianyu tshe.

¹⁶ Ne dia ambufundama ati: Nyuyali ekila, ne dia dimi leko ekila.

¹⁷ Naka nyu nyatuwetaka nyati: Shesu, latulumbuyaka untu tshe uku akandatshi aha la shonodi, nyukaki woma lamʼekinyu lene akanyatshanyema.

¹⁸ Nyeyi nyati: Nyu kuntshungwama la diango diayulana, la fesa kana paunyi, uma lu ditshelu dianyu diʼanyanya, diakanyakiti uma le watshenyu.

¹⁹ Keli nyu nyakatshungwama la dikila diʼushinga a wulu, uku dia ona okoko laha la munga kuyanga vadi, dia Kristu ndame.

²⁰ One lakasonwama ntundu andja watatungama, keli akenama lʼekumelu kʼetena kene dia dikambu dianyu

²¹ Nyu nyambuyala embetawudi wa Unyashungu uma le Jesu lakandulula uma lu nyoi ndu lakandasha lutumbu, dia mbetawo la elungamelu kanyu ndjala le Unyashungu.

²² Ne dia nyu nyambedia etema anyu la ukitanyia anyu lu akambu wa mete, dia mbuka anyanyu ngandji mete, okone nyukani ngandji wulu lʼetema anyu.

²³ Nyu nyakutama ntu, aha lu wuhu wa diango diatulanaka, keli lu wuhu wa diango diahalana, lu diui dia Unyashungu dieli la lumu, dieli pundju.

²⁴ Ne dia diui ne dieko ati: Antu tshe weli uku adiyu, Lutumbu lawo tshe leli uku dembo diʼadiyu. Adiyu watolengelaka, alembo watokokaka,

²⁵ Keli diui dia Khumadiondjo dieko pundju. Diui diako dieli lukumu lʼololo lakawanyusambisha.