1 Koreto 9 - La Bible en Otetela (Bible K'Ekila) 1991

Okone Akatshi Paulu Dia Ndjadjasela Kandi kʼUtumami

¹ Dimi kema la ndjadjasela? Dimi kema utumami? Dimi komena Jesu Khumesu? Nyu kema ulimu ami le Khumadiondjo?

² Naka dimi kema utumami le akina, dimi leko utumami le nyu; nyu nyeko djimbitelu yulimu ami wʼutumami le Khumadiondjo.

³ Oso eli aui ami, wakamateketa le wane wakamumbulaka.

⁴ Undi, shu kema la wulu wa nde la no?

⁵ Shu kema la wulu wa mbeteta la wadi leli umbetawudi, uku atumami akina, ndu anangu Khumadiondjo, ndu Kefasi?

⁶ Kana dimi utu la Baranaba, mbaha la wulu wa nkimo ulimu?

⁷ Dimbi diakona diayafuta lʼulimu andi? Untu akona lune ekodi wʼelua, ku hali elua awo? Untu akona atushaka dungalunga mbu ya nde, ku hano awele adio?

⁸ Dimi lambuta akambu aso uku untu uka? Elembe hawuti pupu?

⁹ Ne dia ambufundama lʼelembe a Mose ati: Tukelekaki otei lʼunyo a ngombe lamʼatatakamakamela wuhu. Undi, Unyashungu nkanelaka ngombe tshu uka?

¹⁰ Ndi hateketa lu dikambu diasu? Elu, dikambu diasu mbakafundama ati: Dieli la untu lafusa, nfusa la elungamelu; la untu lasusula, alungameli dia ndjala la yema.

¹¹ Naka shu takanyunela diango dia Nyuma, undi, dikambu dia wuki mbedio dia shu muna diango dianyu dia dimba?

¹² Naka amotshi weli la wulu ladiku dianyu, shu hataleki uka? Keli shu kuntsha la wulu ako ulimu, ku tambetawo akambu tshe, ne dia tatukutshidia lukumu lʼololo la Kristu.

¹³ Nyu hanyeyi nyati: Wane watutshaka ulimu a diango diʼekila, watolekaka diango dia lu etemwelo; la wane watutshaka ulimu wʼediakelu, watuyalaka la etenyi kawo uma lʼediakelu?

¹⁴ Osoku mbakadjanga Khumadiondjo, dia wane watutaka lukumu lʼololo, wakundja diango diawo uma lu lukumu lʼololo.

¹⁵ Keli dimi kundjaosela nduku ema uma lu diango ne. Dimi hanyufundela akambu ane, ne dia mbosa diango ne; ndeka ololo dimi mvo, uleki untu mbete lutumbu lami anyanya.

¹⁶ Naka dimi lambusambisha lukumu lʼololo, dimi kema la dikambu dia ndjatumbula, ne dia okende weko ladiku diami. Fono keko le mi, naka dimi halasambisha lukumu lʼololo!

¹⁷ Naka dimi latutshaka okone uma lu lulangu lami, uimi la difutu. Keli naka aha uma lu lulangu lami, dimi la okende wakamalungula.

¹⁸ Difutu diami dieli na? Dio dieko nsambisha lukumu lʼololo lasambishami laha la ushinga, la aha ndjaosela wulu tshe weyami ndjaosela lu lukumu lʼololo.

¹⁹ Kuyanga dimi lakayala la ndjadjasela uma le antu tshe, dimi lakayaete fumbi kʼantu tshe, dia dimi ndeka mbetawuya antu efula.

²⁰ Le asi Juda, dimi lakayala usi Juda, dia dimi mbetawuya asi Juda. Dime kema la tshina diʼelembe, ku lakayala uku untu leli la tshina diʼelembe le wane weli la tshina diʼelembe.

²¹ Le wane waha la elembe, dimi lakayala uku untu laha la elembe, kuyanga dime laki uku untu laha la elembe wa Unyashungu. Keli laki la tshina dia elembe wa Kristu, dia dimi mbetawuya wane waha la elembe.

²² Le akanga a weodu, dimi lakayala wodu, dia dimi mbetawuya akanga a weodu. Dimi lakayala wehu wʼantu tshe, dia dimi nshimbela amotshi.

²³ Dimi latutshaka akambu tshe ne dia lukumu lʼololo, dia dimi nkundja yema loko.

²⁴ Nyu hanyeyi nyati: Wane wasaka luwangu, watusakaka tshe, keli otoi omotshi utu kayulungula difutu? Nyusaki luwangu osoku, dia nyu nungula difutu.

²⁵ Untu tshe latedikaka luwangu lu tokenyo, atuyakimelaka lu akambu tshe. Vo watutshaka osoku, ne dia nungula lufule la lutumbu layulana, keli shu tayulungula lone lahalana.

²⁶ Dimi latusakaka luwangu laha la wengengo. Dimi latolokaka, aha uku untu lakomola lopepe.

²⁷ Keli dimi latuyakomolaka, latuyalembiaka lu fumbi, ne dia lamʼasambishami akina, dime ntukuyala utunami.