1 Koreto 3 - La Bible en Otetela (Bible K'Ekila) 1991

Mbatana lu Ekelizia ka la Koreto

¹ Anyasu, dimi kumbeya nyutela diui uku akanga a Nyuma, keli uku antu wa la kete, uku le ana wʼashashi lu dikambu dia Kristu.

² Dimi lakanyusha awele, aha ma, ne dia nyu tanyaki la wulu; ndu kakiane nyu kema la wulu,

³ ne dia nyu nyeki lʼakambu wa dimba. Ne dia kandjema la tamu weki lʼatei myu, nyu kema wa lu alimba, hanyuyeli ditshelu diʼantu uka?

⁴ Lamʼayuta untu omotshi ati: Dimi usika Paulu; la ukina ati: Dimi usika Apolo; okone nyu kema uku antu wa la kete uka?

Atumami Weko Ekambi Etu

⁵ Akona eli Apolo? Akona eli Paulu? Ekambi mbewo, nyu nyaketawo dikambu diawo uku akawasha Khumadiondjo wulu untu lʼuntu.

⁶ Dimi lakune, Apolo akatela ashi, keli Unyashungu akatosha diango.

⁷ Okone ndu one lakune, ndu one lakatela ashi, kema la dikambu, paka Unyashungu latotoshaka diango.

⁸ One latuneka, ndu one latutelaka ashi, weko kame, keli untu lʼuntu ayulungula difutu uku ulimu andi.

⁹ Ne dia shu teko ekambi kame la Unyashungu, nyu nyeko ekambo ka Unyashungu, la luudu la Unyashungu.

¹⁰ Uku aki yediko ya ngandji ka mamba ka Unyashungu, kakandambisha uku uhiki a yimba, dimi lakahiki tshina dia luudu, la ukina ambuhikaka ladiku adio. Keli untu lʼuntu endi okone ahikandi.

¹¹ Untu heyi mpika hina dikina, paka tshina diakahikama; dio dieli Jesu Kristu.

¹² Keli naka untu ayuhika paunyi la fesa, la mboko yʼave ya ushinga a wulu, la etamba, la adiyu, la nengese, ladiku dia tshina diako —

¹³ ulimu wa untu lʼuntu wayenama, ne dia lushi la dienyanyu diʼelimu lu dja layuyala; dja yame yayuhimba ulimu wʼuntu lʼuntu okone wewo.

¹⁴ Naka ulimu wakahiki untu ladiku dia tshina diako ayutshikala, keti untu ako nungula difutu.

¹⁵ Naka ulimu wʼuntu ayulungula, ndi ayushisha difutu. Kuyanga ndame ayushimbamela, keli uku untu luhandji kwe lu dja.

Nyu Nyeko Etemwelo ka Unyashungu

¹⁶ Nyu hanyeyi nyati: Uku etemwelo ka Unyashungu mbenyu, la Nyuma ka Unyashungu atudjaseka lʼetema anyu?

¹⁷ Naka untu lalanya etemwelo ka Unyashungu, Unyashungu ayuwulanya, ne dia etemwelo kene ka Unyashungu keko ekila. Ndu nyu nyeko etemwelo kako.

¹⁸ Untu tayadimbiyaki. Naka untu ambukana ati: Dimi la yimba lʼatei anyu, ndi ayali enginya, dia ndi ndjala la yimba,

¹⁹ ne dia yimba ya la kete nye yeli enginya lu ashu a Unyashungu. Ne dia ambufundama ati: Ndi atundaka akanga a yimba lu lukesu lawo;

²⁰ la diui dikina ati: Khumadiondjo mbeyaka tukanyi tʼakanga a yimba ati: Anyanya mbeto.

²¹ Okone untu tayatumbulaki lu akambu wʼantu, ne dia diango tshe dieko dianyu.

²² Kana Paulu, kana Apolo, kana Kefasi, kana andja, kana lumu, kana nyoi, kana diango dieko, kana mango diayayi, diango diako tshe, dieko dianyu.

²³ Ku nyu nyeko wa Kristu; la Kristu keko ka Unyashungu.