1 Koreto 2 - La Bible en Otetela (Bible K'Ekila) 1991

Yimba ya Unyashungu la Yimba ya la Kete

¹ Anyasu, lamʼakamayi le nyu, dimi kundja la aui wa mamba kana wa yimba, dia ndjunyusambisha diui dia Unyashungu.

² Ne dia dimi kunsanguya dia mbeya dikambu dikina atei anyu, tshikima dia Jesu Kristu, lakadiakema lʼutamba a mpeketanya.

³ Dimi laki la nyu la wodu, la woma, la lukumba efula.

⁴ Ku aui ami la esambishelu kami, dimi kunyanga nyetawuya lʼaui a yimba, keli tshikima la enyelo ka Nyuma la ka wulu,

⁵ dia mbetawo kanyu tayalaki lu yimba yʼantu, keli lu wulu a Unyashungu.

⁶ Keli shu tatutaka aui a yimba lʼatei a wane wambutshunda. Keli aha yimba yʼetena kene, aha yʼembuledi wʼetena kene, weko wambanyema dia mumo.

⁷ Keli shu tatutaka yimba ya Unyashungu yaki lʼusheshe, yako yakashama, yakadjanga Unyashungu la ntundu ka tena ne, dia shu ndjala la lutumbu.

⁸ Nduku umbuledi otoi wʼetena kene wakeyi. Utuweya, tshiki vo kundjaka Uwandji a lutumbu lʼutamba a mpeketanya.

⁹ Keli, uku ufundami ati: Akambu wahatenyi ashu, akambu wahatuki atui; Akambu wahatoto lʼutema wʼuntu, Akambu ane mbakalongoswela Unyashungu wane wuianga.

¹⁰ Keli Unyashungu akatenyawo uma le Nyuma kandi, ne dia Nyuma atushishimaka akambu tshe, ee, ndu akambu a waki wa Unyashungu.

¹¹ Untu akona leya akambu wʼuntu, ndu aha nyuma kʼuntu keli le ndi? Okone nduku untu leya akambu wa Unyashungu, naka aha Nyuma ka Unyashungu.

¹² Keli shu kunungula nyuma ka la kete nye, takalungula Nyuma kʼuma le Unyashungu, dia shu mbeya ushasha wakatusha Unyashungu.

¹³ Akambu ane mbatututaka, aha la aui watetshaka yimba yʼantu, paka la aui watetshaka Nyuma.

¹⁴ Untu a la kete halungula akambu wa Nyuma ka Unyashungu, ne dia vo weko uku akambu wʼanyanya le ndi. Ndi heyi mbalimbitela, ne dia vo watulimbitshiyamaka le Nyuma.

¹⁵ Keli one leli la Nyuma, atulimbitelaka akambu tshe, ku nduku untu lulimbitshiya.

¹⁶ Akona akeyi yimba ya Khumadiondjo, dia ndi mbulakanya? Keli shu teli la yimba ya Kristu.