1 Koreto 16 - La Bible en Otetela (Bible K'Ekila) 1991

Diango Diakawakongwela Asi Jerusalema

¹ Dia diango diakawakongwela ekilami, nyutshi uku akamadjangela ekelizia wa la Ngalatiya.

² Lu lushi la ntundu la lubingu, untu lʼuntu lʼatei anyu umbi diango lakandi uku akundjandi, dia nyu nyutukuyokongola diango lamʼayumuya leko.

³ Lamʼayumukuma, antu wayunyosonola, mbayumutuma la mikanda dia ntola eshasha anyu utsha la Jerusalema.

⁴ Naka eko ololo dia ndu dimi ntsho, vo wayusamba la mi kame.

⁵ Keli dimi layuya le nyu lamʼayumeta la Makedoniya, ne dia layeta la Makedoniya.

⁶ Undu, dimi layudjase lakanyu etenyi undu, kana ngondo ya tshitshi tshe, ne dia nyu ntatshokaka la mi lu lokendo tshe layumutsho.

⁷ Ne dia dimi halangi ntanyenyi wusu utu kakiane; ne dia lambulungamela mbidjase lakanyu nshi motshi, naka Khumadiondjo ayetawo.

⁸ Keli dimi layutshikala lʼEfeso, edja ndu Pentekosta;

⁹ ne dia suku dia wuki diambundjihwamela, dia dimi ntsha ulimu, la atunyi efula weko leko.

Paulu Ambuwatela Lama Ntshela Timote la Akina

¹⁰ Lamʼayuya Timote, kanyuwendaki, atukuyala la woma lʼatei anyu, ne dia ndi atukambelaka Khumadiondjo ulimu uku dimi.

¹¹ Untu tawonyolaki. Keli kanyutumi lu lokendo landi la ki, dia ndi ndja le mi, ne dia lambulungamela la anyasu.

¹² Keli dia unyasu Apolo, dimi lakosengasenga efula dia ndi ndja la anyasu le nyu, keli ndi kunanga ndja kakiane. Ndi ukuya lamʼayundena dihuli dia ndja.

¹³ Nyosene, nyushikikali lu mbetawo, nyutshaki uku apami, nyukikitali.

¹⁴ Nyutshi akambu anyu tshe la ngandji.

¹⁵ Anyasu, nyu mbeyaka nyati: Khumbu ka Stefana mbaki antu wa ntundu wakakadimula etema lʼAkaya, ndu mbakayakimo dia ntshela ekilami ulimu.

¹⁶ Dimi lambunyosengasenga nti: Nyuyali lʼokongo wʼantu a wuhu ako, la wʼuntu tshe latutukimanyiaka lʼulimu, la latenaka pa.

¹⁷ Dimi lakangenangena lamʼakayi Stefana, la Forotunato, la Akayiko. Vo wambukuka lu dihu li dianyu lamʼahanyu lindu,

¹⁸ ne dia vo wakakikitsha utema ami ndu etema anyu. Okone nyolemia antu a wuhu uku.

Paulu Ambatumela Moyo

¹⁹ Ekelizia wa lʼAsiya wambunyutumela moyo. Akula la Piriska, ndu ekelizia weli lu luudu lawo wambunyumtumela moyo efula le Khumadiondjo.

²⁰ Anyasu tshe wambunyutumela moyo. Nyushani moyo lʼononanelu wʼekila.

Dial diʼEtshokwelo

²¹ Dimi. Paulu, kufundji moyo one la lunya lami dime.

²² Untu lahuki Khumadiondjo ngandji, adjami mananu. Khumesu, yaka!

²³ Ngandji ka mamba ka Khumadiondjo Jesu Kristu kayali la nyu.

²⁴ Ngandji kami kayali la nyu tshe le Kristu Jesu! Ayali osoku!